पतरस की पहली पत्री
पतरस उन पयला चिट्ठी
परिचय
१ पतरस उन चिट्ठी प्रेरित पतरस उन द्वारा लिख्सकु आगीत. पतरस ईद अंदकु तान चिट्ठी इन सुरूवात माळदुन कि आव याव ईरोन अदिक यार साटी आव लिखसोन. आव आ सप्पा इसाईगोळी चिट्ठी संबोधित माळदुन यारी आव “अजनबीगोळ” १:१; १:१७२:११ अंदुन. अदिक आव तान पाठकगोळी ईत्ता प्रकार देल हापाळ अनली संदर्भित माळदुन यतिकी आंदुर ब्यार्र-ब्यार्र द्याशगोळ दा बगरूसेगीदुर. यतिकी ईद चिट्ठी थ्वाळासा तरीका देल इफिसीगोळी पौलुस उन चिट्ठी घाई कांळ्सतद, हापाळ लॉकुर मान्सतार कि मसीह अन जनम इन ६५ साल इन बाद्दा इफिसीगोळी पयला पतरस लिख्सकु आगीत. पतरस रोम नगर टु ईद चिट्ठी लिखसीदुन यदरी बेबीलोन अनतार ५:१३.
पतरस अनतान कि ई चिट्ठी इक “नीमी प्रोत्साहित माळली अदिक ईद प्रमाणित माळोद उद्देश देल लिख्सीन कि ईद परमेश्वर उन खरा कृपा हुन” ५:१२. १ पतरस २:११–३:७, इफिसिगोळ ५:१८–६:९ अदिक कुलुस्सिगोळ ३:१८–४:६ अन्द न्याड्या दा हापाळ समानता आव. ई मुरू किताबगोळ दा पारिवारिक रिश्तागोळ अदिक अधिकारगोळ्द पालन माळोद बारा दा निर्देश सिकतद. अद दुखी लॉकुरी दुखी आगदुर मा मजबूती देल प्रोत्साहित माळतद यतिकी अन्त हात्ती आद. ४:१
रूप-रेखा
१. पतरस खुद इक पेश माळतान अदिक तान पाठकगोळी संबोधित माळतान. १:१-२
२. बाक आव छुटकारा साटी परमेश्वर उन धन्यवाद माळतान कि आंदुर सप्पा मुंदुर साझा माळतार अदिक ईदुर मतलब आंदुर जीवन इन साटी येन आद १:३–२:१०
३. आव विश्वासीगोळी निर्देश कोळतान कि ह्यांग दुनिया दा वळ्लीद रीति देल ईरोद आद अदिक गांड्ड अदिक हिंग्स अदिक दास अदिक गुरु उन न्याड्या दा अलग रिश्तागोळी संबोधित माळोद हुन. २:११–४:११
४. पतरस दुखी लॉकुरी मजबूती देल प्रोत्साहित माळतान अदिक तान चिट्ठी बंद माळतान. ४:१२–५:११
५. आग आव तान चिट्ठी लिखसोद बंद माळतान. ५:१२-१४
1
1 पतरस उन दी टु जो यीशु मसीह अन प्रेरित आन,
आ निवळुस्कु आदुर परमेश्वर उन लॉकुर्द हेसुर जो तितर बितर आगकु पुन्तुस, गलातिया, कप्पदूकिया, आसिया अदिक बितूनिया दा ईरतार,
2 नीव परमेश्वर आप्प उन पूर्व उद्देश इन अनुसार निवळुस्कु आगीर अदिक आऊन आत्मा अन्द क्याल्सा द्वारा पवित्र लॉकुर ठहरूस्कु आगीर, इदुरसाटी कि यीशु मसीह अन आग्या मानसुल अदिक आऊन रक्ता अन द्वारा शुद्ध आगेगुल. नीमी अनुग्रह अदिक शांती बहुतायत देल सिकतेला ईरूल.
ऊंद जित्ता आशा
3 नाम प्रभु यीशु मसीह अन परमेश्वर अदिक आप्प उन धन्यवाद आगुल, याव यीशु मसीह अन सोत्तुर दा टु जित्ता आगोर द्वारा, तान हापाळ प्यार देल नामी जित्ता आशा कोळोर साटी व्हाशोद जनम कोट्टुन,
4 मतलब ऊंद अविनाशी, अदिक निर्मल, अदिक अजर विरासत इन साटी जो नीम साटी स्वर्ग दा ईटकु आद;
5 जो विश्वास इन द्वारा सुरक्षित आर, परमेश्वर उन सामर्थ्य अन द्वारा आ उद्धार इन साटी जो आखरी समय दा प्रगट आगोर साटी तयार आद.
6 ई कारण नीव हापाळ खुश ईरी, लेकीन येनारा थ्वाळासा समय इन साटी अलग अलग परीक्षागोळ दा बिदकु दुख नेगोद बिद्दीत;
7 अदिक ईद इदुरसाटी आद कि नीम्द विश्वास परखुसकु आगुल, शुद्ध होळी अदिक स्थिर ईरी, जो नाशवान व्हान्ना आद यदरी बेक्की दा परखुस्कु आगतद अदुर देल भी हापाळ यक्कुल बार्र आद, आ दिन याग यीशु मसीह प्रगट आदान आग नीमी प्रशंसा अदिक महिमा अदिक आदर प्राप्त आदीत.
8 नीव आऊन से प्यार माळतीर जब कि नीव आऊक नोळीदील, अदिक नीव आऊन मा विश्वास माळतीर जब कि नीव आऊक ईगल्या नोळीदील. रा नीव हापाळ महिमामय खुशी देल खुश आईर जो शब्दगोळ देल बयान माळकु आगसकाल;
9 नीम्द आत्मागोळ उद्धार ईद जो नीम्द विश्वास इन उद्देश नीव अदुर्दा प्राप्त माळतीर.
10 ईदा उद्धार इन बारा दा आ भविष्यवक्तागोळ ध्यान देल खोजबीन अदिक जाँच पळताल माळदुर, यार आ अनुग्रह अन बारा दा जो नीम मा आगली ईरोद, भविष्यवाणी माळीदुर.
11 आ भविष्यवक्तागोळ मसीह मा बरावाळा दुखगोळ्द समय अदिक अद महिमा जो ई दुखगोळ्द बाद्दा प्रगट आदव इदुर्द खोज मसीह अन्द आत्मा अन द्वारा माळदुन जो आंदुर दा ईरोद.
12 परमेश्वर आ भविष्यवक्तागोळ मा प्रगट माळदुन कि आंदुर तान ईला बल्की नीम्द स्यावा अन साटी ईव मातगोळ अनतोगोर, यार्द जानकारी ईग नीमी आंदुर्द द्वारा सिक्त यार पवित्र आत्मा अन द्वारा, जो स्वर्ग टु कळुकु आग्याद, नीमी खुशखबरी केळ्सदुन; अदिक ई मातगोळ इक स्वर्गदूत भी ध्यान देल नोळोद लालसा ईटतार.
पवित्र जीवन जगुसोद बुलाहट
13 ई कारण तान तान नेळु कटकु सावधान ईरी, खुद नियंत्रित ईरी, याग यीशु मसीह प्रगट आदान आग जो आशीष नीमी सिकोद आद, अदुर मा तान आशा पुरा रीति देल हचकु ईटी.
14 आग्या मानसावाळेर चिकोरगोळ घाई, आ समय इन बेकार इच्छागोळ्द अनुसार तान तान इक ढाल्सबाळी जो नीम दा पयले ईरोद, याग नीव अग्यानी ईरीर.
15 लेकीन ह्यांग नीम कारावाळा पवित्र आन, हांग अच नीव भी तान सप्पा चाल चलन दा पवित्र बन्सी.
16 यतिकी शास्त्र दा लिख्सकु आद, “पवित्र बन्सी, यतिकी ना पवित्र आईन.”
17 अदिक याग कि नीव “हे आप्प” अनकु आऊन से प्रार्थना माळतीर, जो बिना पक्षपात हर ऊंद उन क्याल्सा अन आचरण इन अनुसार न्याय माळतान, इदुरसाटी तान परदेशी आगोद समय अंज्क देल बितुसी.
18 यतिकी नीव जान्सतीर कि नीम्द निकम्मा चाल चलन तरीका जो आप्प दादागोळ हाती टु नळुतेला बरेत्याद, अदुर देल नीम्द छुटकारा व्हान्ना बेळ्ली मतलब नाशवान चिजगोळ द्वारा आगीदील;
19 बल्की किमती मसीह अन्द अर्पण इन द्वारा जो ऊंद निर्दोष अदिक कलंक रहित म्यांडा अन पाड्डा अन रक्ता अन घाई ईरोन.
20 दुनिया अन निर्माण इन पयले परमेश्वर उन द्वारा मसीह अक चुनुस्कु आगीत, लेकीन नीम साटी ईव आखरी दिनगोळ दा आऊक प्रगट माळकु आत.
21 आ मसीह अन द्वारा नीव आ परमेश्वर मा विश्वास माळतीर, यारी परमेश्वर आऊक सोत्तुर दा टु जित्ता माळदुन अदिक महिमा कोट्टुन ताकी नीम्द विश्वास अदिक आशा परमेश्वर मा पक्का आगुल.
22 ईग याग नीव सच्चाई इन पालन माळतेला खरा भाईचारा अन प्यार इक प्रदर्शित माळोर साटी तान आत्मागोळ इक शुद्ध माळ कोंडीर, रा पुरा मन इन सांगुळ आबुर दाबुर से प्यार माळी.
23 यतिकी नीमी नाशवान ईला लेकीन अविनाशी बींजा देल, परमेश्वर उन जित्ता अदिक हमेशा ठहरूसावाळा वचन इन द्वारा व्हाशोद जनम सिक्याद.
24 यतिकी पवित्रशास्त्र दा लिख्सकु आद:
“हर ऊंद मंळसा प्राणी काड्डा अन घाई आन,
अदिक आऊंद सप्पा शोभा आळी दाकळोद फूला अन घाई आव.
अदिक काड्डा वंळ्गेगतद, अदिक फूला झळसेगताव,
25 लेकीन प्रभु उन वचन हमेशा हमेशा संची ईरतद.”
अदिक ईदा खुशखबरी इन वचन आद जो नीमी घोषित माळकु आगीत.