2
जित्ता कल्ल अदिक पवित्र प्रजा
1 इदुरसाटी सप्पा प्रकार इन बुराईगोळ अदिक पाखंड अदिक पुरा ख्वाटा मातगोळ या होत्तोद या अपमानीत माळोर भाषा देल तान तान इक ऊळस्कु ईटी.
2 व्हासा पैदा आगा चिकोर इन घाई हमेशा निर्मल आत्मिक हाल इन लालच ईटी, इदुरसाटी इदरी कुडोद द्वारा नीम्द विकास अदिक उद्धार आगुल.
3 जसा कि पवित्रशास्त्र दा लिख्सकु आद, “नीव तान तान इन साटी जान्स कोंडीर कि प्रभु याट भला आन.”
4 प्रभु उन हात्ती बरी, अद सजीव कल्ल जो लॉकुर द्वारा बेकार सम्सकु नकार्सकु आगीदुन लेकीन आव परमेश्वर साटी किमती आन जो परमेश्वर उन द्वारा निवळुस्कु आगीदुन.
5 नीव भी खुद जित्ता कल्लगोळ घाई ऊंद आध्यात्मिक मंदिर इन रूप दा माळकु आगेतीर, ताकी ऊंद हिंग पवित्र याजक मंडल इन रूप दा स्यावा माळ सकी यदुर्द कर्तव्य हिंग आत्मिक बलिदान समर्पित माळोद आद जो यीशु मसीह अन द्वारा परमेश्वर उक ग्रहण लायक आगुल.
6 ईद कारण पवित्रशास्त्र दा भी लिख्सकु आद:
“ना ऊंद किमती कल्ल निवळुस्कु
यारी ना सिय्योन इन क्वाना अन्द कल्ल माळकु ईटेतीन:
अदिक जो यावारा आऊन मा विश्वास माळ्यान, आव यातोदारा रीति देल निराश आगतीदील.”
7 नीव विश्वासीगोळ साटी ईद कल्ल हापाळ किमती आद; लेकीन जो विश्वास माळालुर आंदुर साटी
“अद कल्ल यारी राजमिस्त्रीगोळ बेकार सम्सकु इनकार माळीदुर,
अदा कल्ल सप्पा मुंदुर साटी महत्वपुर्ण क्वाना अन कल्ल बनसेत,”
8 अदिक शास्त्र दा ईद भी लिख्सकु आद,
“ईद अद कल्ल हुन जो अपराधी लॉकुरी ठेस पहुचुसोद कारण बनसीत,
ईद चट्टान लॉकुरी ठोकर हचकु केळदित.” आंदुर ठोकर तिंदार यतिकी आंदुर परमेश्वर उन वचन मा विश्वास माळालुर
अदिक ईदा आंदुर साटी परमेश्वर उन इच्छा ईरोद.
9 लेकीन नीव ऊंद निवळुस्कु वंश, राज-पदधारी याजकगोळ्द समाज, पवित्र जाती, अदिक परमेश्वर उन खुद इन लॉकुर आईर, इदुरसाटी कि याव नीमी अंधकार दा टु तान अदभुत ज्योति दा कार्सदुन, आऊन महान कार्य अन्द घोषणा माळी.
10 ऊंद समय दा नीव परमेश्वर उन लॉकुर ईला ईरीर, लेकीन ईग नीव आऊन लॉकुर हुईर; ऊंद समय ईरोद याग नीम मा परमेश्वर उन दया ईला आगीत, लेकीन ईग नीम मा आऊन दया आग्याद.
परमेश्वर उन दास
11 हे प्रिय संगीगोळा, ना नीम से, जो ई दुनिया दा अजनबीगोळ रूप दा आईर, निवेदन माळतीन कि आ शारीरिक इच्छागोळ देल दुर ईरी जो नीम्द आत्मा से लळुस्तेला ईरतद.
12 दुसरा जातीगोळ न्याड्या तान चाल चलन हिंग वळ्लीद माळकु ईटी कि चाहे आंदुर अपराधीगोळ्द रूप दा नीम्द आलोचना माळ्यार लेकीन नीम्द वळ्लीद कर्मगोळ्द परिणाम स्वरूप आऊन बरव दिन आंदुर परमेश्वर उक महिमा प्रदान माळुल.
13 प्रभु उन साटी तान तान इक हर मानव अधिकार इन हात्ती ईरी: राजा अन हात्ती इदुरसाटी कि आव सब मा शासन माळतान,
14 अदिक शासकगोळ्द, यतिकी आंदुर बुरा लॉकुरी दण्ड कोळोद अदिक वळ्लेव लॉकुर्द प्रशंसा अन साटी आऊन द्वारा कळुकु आग्यार.
15 यतिकी परमेश्वर उन नीम से ईद इच्छा आद कि नीव तान भलाई इन क्याल्सागोळ देल मूर्ख लॉकुर्द अग्यान देल तुमकु मातगोळ इक सुंगा माळबुळी.
16 स्वतंत्र मंळसा अन घाई जीवन बीतुसी, लेकीन तान स्वतंत्रता अन्द इस्तेमाल बुरा मातगोळ इक होच्चोर साटी माळबाळी; लेकीन परमेश्वर उन सेवकगोळ्द घाई जित्ता ईरी.
17 सप्पा मुंदुर्द आदर माळी, तान दुसरा विश्वासी वार्टुर से प्यार ईटी, परमेश्वर उन आदर इन सांगुळ अंज्क मान्सी, राजा अन सम्मान माळी.
मसीह अन्द तकलीफ इन उदाहरण
18 हे सेवकगोळा, तान तान इक तान स्वामीगोळ्द हात्ती ईटी, अदिक आंदरी पुरा रीति देल आदर कोळी, ना सिर्फ आंदरी जो वळ्लेर आर अदिक दुसरा अन भलाई माळतार बल्की आंदरी भी जो कठोर आर.
19 यतिकी अगर यावारा परमेश्वर उन विचार माळकु अन्याय देल दुख नेगुतेला क्लेश सहन माळतान रा ईद वळ्लीद आद.
20 यतिकी अगर नीव अपराध माळकु बुक्की तिंदीर अदिक धीरज हुळदीर, रा ईदुर दा येन बळाई इन मात आद? लेकीन अगर भलाई इन क्याल्सा माळकु दुख नेगुतीर अदिक धीरज हुडुतीर, रा ईद परमेश्वर उक भाऊसतद.
21 लेकीन नीमी परमेश्वर इदुरसाटी कारदुन, यतिकी मसीह नीम साटी दुख नेगदुन अदिक हिंग माळकु नाम्द साटी ऊंद उदाहरण बिट्टुन ताकी नीव भी आऊन पद-चमत्कारगोळ मा नळु सकीर.
22 आव येनु पापगोळ माळीदिल अदिक यावारा यागल्यारा भी आऊन बाय देल ख्वाटा मातगोळ केळीदील.
23 याग आव अपमानीत आदुन आग आव याऊकु अपमानीत माळकु प्रती उत्तर माळीदील, याग आव दुख झेल्सदुन आग आव यारूकु धमकी कोटीदील, बल्की आ खरा न्याय माळावाळा न्यायी परमेश्वर दा तान आशा अक ईटदुन.
24 मसीह खुद अच नामव पापगोळ तान मय मा ताकोमकु क्रूस मा येरेदुन, ताकी नाव तान पापगोळ्द प्रती नाम मृत्यु आगेगुल अदिक न्यायीपन इन साटी जीवन बितुसेव: ईद आऊन आ बलिदान इन कारण अच आत यऊर देल नीव चंगा माळकु आगीर.
25 यतिकी नीव पयले भटकुसकु म्यांडा अन घाई ईरीर, लेकीन ईग तान जीवगोळ रखवाला अदिक अध्यक्ष अन हात्ती बंदीर.