11
Bìac Wêh Jao Khoi 'Bìq Raliang
1 Cô bàu Boc Plình doi ca Jê-rê-mi:
2 “Ìh tamàng bàu hnài da trong wêh jao cô, èh doi hlài ca jàn Juđa wa mangai ŏi ta phôq Jê-ru-sa-lem.
3 Ìh doi ca wì: Chuaq, Haq Boc Plình da Is-ra-ên, doi 'màng cô: ‘Mangai leq ùh iu bàu ta wêh jao cô, èh 'bìq waiq hanip.
4 Cô wêh jao Au khoi broq ca boc yaq pì ta hì Au 'nong wì haq loh enh Aicàp, aih loh khoi enh tanùh bùh hech ca mem’, Au doi ca wì: ‘Tàng pì iu bàu Au wa broq gêh rìm bìac Au khoi hnài, èh pì jah broq jàn Au, Au broq Boc Plình da pì.
5 Au jah broq gêh dèh bàu Au khoi hùaq ca boc yaq pì am ca wì haq gùng bình halùih sùa wa diac xùt’, aih nòi pì đang rìh manàiq.”
Au tèo: “Joq 'màng aih, Chuaq ôi.”
6 Chuaq doi ca au: “Ìh anoi dìq ca bìac cô loh ti phôq Juđa wa ti trong halah da Jê-ru-sa-lem beq. Ìh phai doi: ‘Tamàng wa broq tiaq bìac ta wêh jao cô.
7 Taiq Au khoi pa'nhùq yôt ca boc yaq pì enh hì Au khoi 'ràng wì haq loh enh Aicàp trùh manàiq. Au xôq hloi hloi bahmàng ca wì, Au doi: “Tamàng bàu Au beq.”
8 Mahaq wì ùh iu, hadai ùh tamàng bàu Au; blòq hlài; rìm ngai dìq rìh tiaq dèh manoh cadoq cadang ngang dù da cla. Taiq 'màng aih Au khoi pa'noh ca wì haq bàu waiq hanip khoi anoi ta sech wêh jao cô, aih wêh jao Au khoi thê wì haq phai iu tiaq, mahaq wì ùh iu tiaq.’ ”
9 Chuaq doi ca au: “Mangai Juđa wa jàn phôq Jê-ru-sa-lem khoi pađim ca dabau đòiq blàq blènh:
10 Wì haq khoi wìh hlài dèh ta tôiq lôi ma boc yaq wì haq khoi broq adroi nèh, aih 'bài mangai ùh tamàng bàu Au. Wì haq khoi tiaq 'bài can kiac, patìh bìac ca 'bài can kiac aih. Mangai Is-ra-ên wa mangai Juđa khoi blòq wêh jao Au broq ca boc yaq wì.
11 Taiq 'màng aih Chuaq doi: ‘Cô, Au 'noh bìac ranàc ca wì, wì ùh jah claih. 'Nhac wì haq waiq dang creo ca Au, mahaq Au ùh tamàng.
12 Jò aih 'bài jàn ta gùng Juđa wa gùng Jê-ru-sa-lem lam creo dang ca 'bài can kiac wì haq khoi dèch am ngè tadreo, mahaq 'bài can kiac aih ùh jah dèch wì haq ta jò wì glàm bìac ranàc cô.
13 'Màng aih Ô mangai Juđa, ìh i toq leq phôq hadai i toq aih can kiac! Phôq Jê-ru-sa-lem i toq leq toq trong hadai i toq aih 'bŏng tadreo ca 'bài can kiac broq loh toq bìac camaih; aih 'bŏng tadreo đòiq cùh waiq can kiac Ba-an!’
14 “ 'Màng aih, ìh, apaq waiq khàn am ca jàn cô, hadai apaq taiq wì haq ìh creo waiq dang Au, ma jah 'màng aih, Au ùh tamàng bàu wì haq ta jò wì glàm bìac ranàc.
15 “Mangai jàn Au dìq jaq loq waq,
haq ŏi jah mùt hnem Au jò haq broq bàc bìac 'mèq mac ùh?
Ngè tadreo haq ma dèch am ca can kiac jah dèch haq claih ca bìac ranàc cô
đòiq jò aih haq jah lem bùi ta manoh 'mòh?”
16 Chuaq khoi lah alìah doi ìh tìah ca long Ôliu cràm hla,
càn caiq, jìang lem, loh plì top;
mahaq manàiq cô i bàu creo hràng taiq Chuaq bùh đac hla haq,
goh đac hamenh haq.
17 Chuaq ma wèq dìq ca 'bình plình Haq khoi pìt ìh; cla Haq raq khoi 'noh bìac ranàc trùh ca ìh, taiq bìac ngang dù da Is-ra-ên wa Juđa khoi broq Au nòih xam bìac wì haq dèch ngè tadreo am ca can kiac Ba-an.
Wì Pacliac 'Mèq 'Mac Ca Jê-rê-mi
18 Chuaq khoi doi ca Au loq, au hadai khoi loq, jò aih Chuaq khoi am au loq bìac hatình 'mèq da wì haq.
19 Mahaq adroi ca aih, au tìah ca con trìu lem 'bìq wì dùng 'ràng trùh ta nòi broq jam; au ùh loq wì khoi ta pađim ca dabau chaq trong đòiq jêh đac au. Wì doi: Beq bèn cau đac long aih khoi èh hlêh hloi dŏng dìq plì haq, jêh đac haq ca cachìt, đòiq pàng cô pi i ca mangai leq ŏi hmàng trùh ca hiniq haq hòm.
20 Mahaq waiq Chuaq ma wèq dìq ca 'bình plình,
Ìh Mangai hadrah ta-atoq.
Ìh loq ca manoh hèm da rìm ngai;
xìn am au hnoq bìac tabroq chao da Ìh ca wì haq,
taiq au khoi phùq phàn rìm hiniq ca tì Ìh.
21 Taiq 'màng aih Chuaq doi bàu cô ca jàn A-na-tôt, aih jàn khoi enh jêh đac ìh. Wì doi: “Tàng ìh ùh enh nhèn jêh đac, ìh apaq canòm ca hiniq Chuaq capoch bàu Boc Plình hòm, đòiq ìh ùh hìaq 'bìq tì nhèn jêh đac.”
22 'Màng aih, Chuaq ma wèq dìq ca 'bình plình doi 'màng cô: “Cô! Au padon baxa wì haq! Mangai radam wì haq jah cachìt ca chang gùm; 'bài mangai cadrì wa mangai calô jah cachìt ca pangot hrah.
23 Ùh i ca mòiq ngai leq rìh, ma jah 'màng aih Au jêh dìq ca jàn A-na-tôt ta hanam Au baxa wì haq.”