12
Bàu Waiq Khàn Da Jê-rê-mi
1 Waiq Chuaq rìm yàng au hatùang ca Ìh,
Ìh hloi hloi ta-atoq ta rìm bìac,
'nhac ca 'màng aih mahaq au enh bòch Ìh mòiq bìac:
Hagleq mangai dù hloi hloi can padrŏng
wa mangai loq padô 'nùt hloi hloi jah catèm?
2 Ìh khoi pìt wì haq, wì haq khoi i riah,
khoi yòng càn wa loh plì;
bàu wì haq capoch dìq jaq hatenh ca Ìh,
mahaq manoh wì haq dìq jaq hangai ca Ìh.
3 Mahaq Chuaq ôi, Ìh loq ca au,
Ìh hnoq au, Ìh khoi thù manoh au enh ngìa ca Ìh.
Xìn Ìh lah wì haq tìah ca lah calùh trìu padon 'ràng trùh nòi broq jam,
xìn Ìh đòiq crài wì haq padon ca hì jêh đac.
4 Taneh diac ep xalep 'màng cô trùh jò leq?
Nhat ta tamang croh crenh 'màng cô trùh jò leq?
Ngè ta rôm wa chìm,
wì mangai dù khoi rùp dìq.
Wì doi:
“Chuaq ùh hnoq bìac broq da bèn.”
Boc Plình Tèo Hlài
5 “Tàng ìh cadàu thì ca mangai lam jènh mahaq ìh tagah lep,
èh broq 'màng leq ìh nui cadàu thì ca axêh?
Tàng nòi taneh gùng catèm mahaq ìh xôq tacro,
èh broq 'màng leq ìh nui ta'blêq ta rôm cràm kenh diac cròng Jôđan.
6 Cla oh daq ìh wa xinoi ìh hadai đang blòq hlài ìh;
wì capoch 'mèq ca ìh enh cloh ìh,
'nhac ca wì capoch rangot,
ìh apaq lùi wì.”
7 “Au khoi cađac hnem Au,
Au khoi cađac xôxech Au.
Au khoi cađac 'bài mangai Au ma dìq jaq loq
waq ca mangai ma git ca wì haq.
8 Xôxech da Au khoi tìah ca baco hlari ta rôm tajraq hlài ca Au,
taiq 'màng aih Au git ca haq.
9 Mangai xôxech Au aih cliang kèn habràu axan jam 'mòh?
Ma dìq ca cliang kèn ma 'noiq dudan ca haq rìm pah ùh?
Lam beq, tagop dìq ca ngè rôm hi 'ràng wì haq
đòiq caq xech haq.
10 Bàc mangai ban trìu khoi raliang đac wùan nho Au,
jôiq nunit đac taneh Au,
broq ca taneh Au ma dìq jaq loq
waq loh nòi croh crenh nòi catù.
11 Wì haq khoi broq ca taneh loh wìa nòi catù,
croh crenh;
haq crò hmoi enh ngìa ca Au;
dìq ca gùng loh ca wang wê ùh i mangai leq hèm trùh.
12 'Bài lình enh ta'blêq khoi trùh ta go ngùn,
wa ta đùng braih càn.
Ma jah 'màng aih chang gùm da Chuaq caq lŏn enh gàu cô trùh gàu tau da gùng,
ùh i ca chac xech leq jah catèm.
13 Wì haq rai adrech 'mau mì, mahaq toq gat adrech nhat,
wì haq khoi abroq dìq jaq tagah lep mahaq ùh gat jah cleq,
dìq jaq camaih ca bìac cleq pì khoi gat jah,
ma jah 'màng aih can nòih da Chuaq khoi ùc 'noh ta pì.”
14 Chuaq doi 'màng cô: “Dìq dŏng ca 'bài jàn ma hatenh hatìa gìa rep ma ngang dù, aih 'bài jàn khoi ta'miaq xôxech da Au khoi am ca Is-ra-ên: Au jah bùch đac wì haq loh khoi ca gùng wì haq Au hadai bùch hloi jàn Juđa loh khoi enh wì haq.
15 Mahaq atìq ca jò Au khoi bùch đac wì haq; Au xa-ŏch hlài ca wì haq. Au ahlài wì haq ta xôxech wì haq, rìm jàn jah hlài dèh ta taneh gùng cla wì.
16 Jò aih tàng wì haq hŏc tiaq jàn Au, yŏc hiniq Au đòiq pachac, ‘I Chuaq ma rìh hloi hloi jah hnoq’, tìah ca 'bài hì adroi nèh wì haq khoi hnài jàn Au canòm ca hiniq Ba-an đòiq pachac, 'màng aih wì haq jah cajap ŏi ta'ne jàn Au.
17 Mahaq tàng jàn leq ùh tamàng bàu Au, Au bùch wa jêh đac jàn aih.” Cô bàu Chuaq doi.