13
Caxi Càt Ca'nam Khoi Raliang
1 Chuaq doi ca au: “Ìh lam rŏt caxi càt ca'nam xam bai briang khoi èh càt dudan ca ca'nam beq, mahaq paq tàm haq ta diac oq.”
2 'Màng aih au lam rŏt caxi càt ca'nam xam bai briang, càt dèh jang ca'nam tiaq bàu Chuaq thê.
3 Chuaq doi ca au yàng ma baiq:
4 “Yŏc caxi càt ca'nam ìh ma khoi rŏt 'mat, càt aca'nam, khoi èh lam trùh ta cròng diac U-phra-tê cadoc haq ta mòiq cop hmu ŏi ta aih.”
5 'Màng aih au lam cadoc caxi càt ca'nam aih ta còp hmu kenh cròng diac U-phra-tê.
6 Khoi ca aih dùnh hì, Chuaq doi ca au: “Lam trùh ta cròng diac U-phra-tê yŏc caxi au ma thê ìh cadoc ta aih beq.”
7 Au padinh yòng lam trùh cròng diac U-phra-tê, chìa chaq hlài dèh caxi ca'nam au khoi cadoc ta aih, mahaq pi wìa waq taiq haq khoi bùc dìq, 'nhac ca broq ta bìac cleq hadai pi wìa.
8 Khoi ca aih Chuaq doi hòm ca au.
9 “Chuaq doi: ‘Au hadai raliang đac can catèh da Juđa wa can catèh càn caiq da Jê-ru-sa-lem.
10 Jàn ngang dù cô ùh iu bàu Au, wì lam tiaq dèh manoh cadoq cadang da wì haq, lam tiaq 'bài can kiac patìh bìac wa cùh waiq 'bài can kiac aih. Taiq 'màng aih jàn cô èh hadai tìah ca caxi càt ca'nam cô, 'nhac ca broq bìac cleq hadai pi wìa.
11 'Màng ca caxi càt ca'nam da mòiq ngai 'màng leq, Au hadai càt dìq ca jàn Is-ra-ên wa dìq ca mangai Juđa hadai hatop ca Au 'màng aih.’ Chuaq doi: ‘Đòiq wì haq jah wìa mòiq jàn crài ca Au, waq ca jah 'ràng ca Au tìang 'bang, calêu padèch wa jah 'ngah 'ngai, mahaq wì ùh chìuq tamàng.’
12 “Ìh doi ca wì haq bàu cô: ‘Chuaq Boc Plình da jàn Is-ra-ên doi 'màng cô: Rìm cabi alac phai ùc bình alac.’ Wì doi ca ìh: ‘Bìac aih nhèn khoi loq rìm cabi alac phai ùc bình alac.’
13 Ìh doi ca wì: ‘Chuaq doi 'màng cô: Au padon broq dìq ca jàn ta gùng cô, enh bùa ma ha'ngui ta gèq bùa Đawit trùh 'bài pajàu, 'bài mangai capoch thai Boc Plình wa dìq ca jàn ta Jê-ru-sa-lem bù, pi jah yòng.
14 Au broq wì haq tajêh dabau, mangai cô tajêh ca mangai tau, con ta jêh dèh ca baq, Au ùh 'nhùa tì, ùh xa-ŏch ùh loq waq jò Au jêh đac wì haq.’ ”
Jàn Juđa 'Bìq 'Ràng Lam Broq Hapŏng Dìch
15 Halang don tamàng cô,
tamàng ma ro haq, apaq catèh,
ma jah 'màng aih bàu da Chuaq doi.
16 Dèch am can 'ngah 'ngai ca Chuaq beq,
Haq Boc Plình da pì,
adroi ca jò Haq am can clam trùh,
adroi ca jò jènh pì catŏih ta wang jò plình clam.
Pì ngèh gòm can 'ngah,
mahaq Boc Plình da pì khoi broq can 'ngah loh ca clam
wa broq tam yi clam hòm.
17 Tàng pì ùh iu bàu,
mahua yiang Au toq loq hmoi ca manoh loq catèh da pì,
diac mat Au loh ùh xŏch,
ma jah 'màng aih Au crò hmoi ca trìu da Au,
'bìq wì rùp lam broq hapŏng.
18 Ìh phai doi ca bùa wa miq haq:
“Xìn loh enh gèq bùa ha'ngui ta taneh beq,
ma jah 'màng aih can 'ngah 'ngai
da cadoh bùa khoi hangai ca gàu ìh.”
19 'Bài phôq ŏi ta gùng Nêghep khoi 'bìq dudan dŏng,
ùh i cabô nui blah yŏc hlài,
dìq ca jàn Juđa wì khoi rùp lam broq hapŏng,
ùh mòiq ngai leq jah claih.
20 Blèch mat beq,
ngan 'bài mangai trùh enh pah 'ngeo ca mat mahì loh!
Lù trìu Au khoi am ca Ìh wèq ban,
manàiq ta leq?
Aih lù trìu lem lình da ìh.
21 Ìh hèm 'màng leq jò 'bài mangai ìh khoi hnài wì haq,
wa aih 'bài bua ìh,
mahaq manàiq cô wì baxa hlài ìh?
Ìh ma ùh dìq jaq jìq
tìah ca mangai cadrì jìq jò wì xa-ông 'mòh?
22 Jò ìh hèm ta manoh doi:
“Gleq bìac cô ma trùh ca au?”
Aih taiq tôiq lôi da ìh dìq jaq càn,
hatù ìh khoi da hŏc,
bìac xriu da ìh pi i hòm.
23 Mangai Ê-thi-ô-bi i jah broq dèh akia gam loh ca taboc ùh?
Chùa jah halìh dèh clep ta chac haq ùh?
Pì hadai 'màng aih. Pì khoi broq bìac dù,
'màng leq pì jah broq lem ùh?
24 “Taiq 'màng aih Au rai pì
tìah ca Au rai manùh enh ngìa ca bahùt ta nòi braih càn.”
25 Chuaq doi: “Aih bìac da ìh,
ma jah 'màng aih Au khoi pajaq ca ìh,
taiq ìh khoi hèt ca Au;
ìh khoi canòm bàu amòng.
26 Au dèch hatù ìh paclùm ca hadrò ìh,
đòiq phù cròng hnoq nòi ma ìh dìq jaq camaih.
27 Au khoi hnoq bìac broq dìq jaq ramòt da ìh:
Jò enh tango ìh tìah ca axêh bòch calô,
tango anang rah pah, ta bôi wang,
nòi đùng tamang.
Nan xa ca ìh, ô Jê-ru-sa-lem,
ìh ùh broq hreo dađeh trùh jò leq.”