17
Manoh 'Nùt Amòng
1 “Tôiq lôi da jàn Juđa khoi achìh đòiq xam long achìh mem,
jah choh padì ta manoh wì haq xam gŏi kim cùang,
wa hadai ta aki da 'bŏng tadreo da wì haq.
2 Tìah ca wì haq hmàng dèh con xau,
wì haq hmàng trùh 'bŏng tadreo
wa jrang long tadreo enh ca'nàm long cràm hla
wa ta nòi go ha'nhèq,
3 Ta bôi wang wa ta đùng tamang,
Au jah am dìq cùng hang gè wa rìm ngè canaq
đòiq ta kho ca lình wì,
ma jah 'màng aih taiq tôiq lôi pì jàp crŏng taneh.
4 Cla pì lènh jò hnhung đac xôxech Au am ca pì;
èh Au thê pì lam broq hapŏng dìch ca mangai git ca pì,
ta nòi ma pì ùh lah trùh,
taiq pì khoi patep ùnh can nòih Au ma cheo yôt ùh jò leq dìq.”
5 Bàu Chuaq doi:
“Đang ca waiq hanip mangai leq canòm ca con mangai,
canòm con mangai đòiq i padren dêh,
èh manoh haq khoi wia hangai ca Boc Plình.
6 Haq tìah ca ramù tagôi ta đùng braih càn,
ùh jò leq hnoq xôq ramŏt,
mahaq toq ŏi ta đùng wang wê croh crenh
ta nòi taneh xang ùh i mangai ŏi.
7 “Xôq ramŏt dìq jaq ca mangai leq loq canòm ca Boc Plình,
ràih Boc Plình broq wìa nòi dađeh canòm.
8 Haq tìah ca long pìt trong thòng diac,
plôh riah tiaq trong diac, 'nhac ca glàm jò plình tôq, xôq ùh crè.
Hla haq xenh lem,
glàm hanam pađang xôq ùh yùq wa loh plì ùh jò leq dìq.”
9 Manoh da con mangai 'nùt amòng
wa 'mèq 'mac yi hnao ca rìm ngè bìac ma 'noiq.
Cabô jah canao loq?
10 “Au cô Chuaq ti ha'mrìh đòiq ngan,
manoh hèm da con mangai,
èh am ca rìm ngai,
tiaq bìac broq da haq broq.”
11 Mangai wìa padrŏng can tiaq trong ùh ta-atoq,
haq tìah ca chìm bù miao àm catap,
mahaq ùh xài cla haq xêh;
trùh 'ne 'nhòng rìh da haq bìac padrŏng can hù hnhung dìq;
pulùch 'nhòng rìh haq mangai blùng.
12 Gèq bùa 'ngah 'ngai ti 'nhèq enh jò baxèm,
aih nòi hnem cùh waiq da nhèn.
13 Ô Chuaq, Ìh joq bìac ngèh gòm da Is-ra-ên!
Dìq ca mangai leq cađac Ìh, èh jah camaih.
Mangai leq am rù ca Ìh wì haq khoi i hiniq 'bìq catùh ta taneh,
ma jah 'màng aih taiq wì khoi cađac diac tamŏc xèm da can rìh,
aih raq Chuaq.
14 Waiq Chuaq, xìn Ìh broq brêh ca au; 'màng aih au jah brêh!
Xìn Ìh dèch au, 'màng aih au jah dèch claih,
ma jah 'màng aih Ìh joq Boc Plình đang ca jah padèch.
15 Wì haq hloi hloi capoch ca au:
“Bàu Chuaq ta leq?
Broq đòiq xìt beq!”
16 Chuaq ôi, au ùh cađac bìac broq da au,
aih wèq ban con jàn Ìh.
Au ùh thê Ìh 'noh loh bìac ranàc ca wì haq.
Ìh khoi tàng rìm bàu au capoch.
17 Xìn Ìh paq broq ca au yùq crè;
Ìh joq nòi au hanình jò glàm bìac ranàc.
18 Xìn Ìh broq ca wì ma ti rùp au jah camaih,
mahaq paq am au camaih.
Xìn Ìh broq ca wì 'bìq manhài,
mahaq paq đòiq au 'bìq manhài.
Xìn Ìh 'noh am bìac ranàc trùh ca wì haq,
broq ca wì haq 'bìq raliang piang baiq phàn.
Phai Wèq Hì Sabat
19 Chuaq doi ca au 'màng cô: “Lam beq yòng nòi 'mang ngo càn, nòi dìq ca bùa Juđa mùt loh, èh hadai lam yòng nòi 'mang ngo phôq Jê-ru-sa-lem,
20 hi khoi doi ca wì: ‘Ô 'bài bùa da Juđa, Ô 'bài jàn Juđa, Ô! dìq ca jàn Jê-ru-sa-lem, dìq ca pi ma mùt loh trong ngo cô, Tamàng bàu Chuaq beq!
21 Cô bàu Chuaq doi: Rìm ngai phai wèq dađeh, pì ùh jah genh, tòng, xùi, loq pòq cleq lam cwa trong 'mang ngo cô hì Sabat.
22 Pì ùh jah genh, tòng, xùi, loq pòq dahwèq cleq loh khoi ca hnem hadai paq lam abroq ta hì Sabat, mahaq khòh wèq hì Sabat aih hì hadròih tiaq bàu Au khoi doi ca boc yaq pì,
23 Mahaq wì haq ùh tamàng ùh halang don ca bìac aih; wì cadoq manoh ùh enh tamàng wa hadai ùh nhàn yŏc bàu hnài anoq da Au.
24 Chuaq doi: Mahaq tàng pì tamàng bàu Au, ùh genh, tòng, xùi, pòq dahwèq cleq lam cwa trong 'mang ngo da phôq cô hì Sabat, mahaq wèq hì Sabat hì hadròih wa ùh abroq cleq ta hì aih,
25 èh jah mùt loh trong 'mang ngo cô, aih 'bài bùa ma ha'ngui ta gèq bùa Đawit, aih 'bài mangai còi xê axêh wa axêh, wì pajùm ca 'bài cwan, mangai calô da Juđa wa jàn da Jê-ru-sa-lem, èh phôq cô jah i mangai ŏi hloi hloi.
26 Èh jàn enh 'bài phôq da Juđa, 'bài phôq haten ca Jê-ru-sa-lem, enh gùng Bên-ja-min, enh đùng tamang, gùng rôm wang, wa enh gùng Nêghep jah lam trùh đòiq 'ràng ngè tadreo bùh wa ngè tadreo ma 'noiq, ngè tadreo ùh i ca mahem wa dàu xua thùm, ngè tadreo manè pôi lam trùh hnem Boc Plình.
27 Mahaq tàng pì ùh tamàng bàu Au, ma padèch hì Sabat loh wìa hì hadròih, èh genh, tòng, xùi, pòq dahwèq mùt Jê-ru-sa-lem lam cwa trong 'mang ngo cô hì Sabat, 'màng aih Au bùh ùnh jang ngo phôq wa ùnh aih jah bùh dŏng dìq rìm bìac ta Jê-ru-sa-lem, ùh i mangai leq jah pupat.’ ”