18
1 Cô bàu Chuaq trùh ca Jê-rê-mi, doi:
2 “Yòng beq, loh ta hnem mangai thòq broq abôq, ta aih Au jah doi ca ìh loq bàu Au.”
3 Tajòi 'mòi au lam trùh nòi hnem mangai thòq broq abôq; haq 'nang yòng broq jang maiq daxài.
4 Mahaq abôq taneh thòq aih 'nang broq khoi troq padah, èh thòq aih broq hlài ma 'noiq lem tiaq manoh enh da haq.
5 Wop jò aih bàu Chuaq doi ca au:
6 “Ô mangai hnem Is-ra-ên, Au ùh jah broq ca pì tìah ca mangai thòq taneh khoi broq ca taneh cô 'mòh?” Chuaq doi: “Cô taneh ta tì mangai thòq broq abôq 'màng leq, pì ŏi ta tì Au hadai 'màng aih!
7 Jò au padon bùch đac, raliang đac, jêh đac, mòiq gùng loq mòiq Taneh Diac leq aih,
8 mahaq tàng Taneh Diac Au ma padon jêh đac aih loq cađac dèh manoh broq tôiq, èh Au ùh đòiq bìac 'mèq ranàc trùh ta wì haq hòm.
9 Èh hòm, Au padon broq loq pìt hlài mòiq Taneh Diac leq aih,
10 mahaq tàng Taneh Diac aih broq bìac dù enh ngìa ca Au, ùh broq tiaq bàu Au, èh Au jah tawìh manoh ùh hnhu am xôq ramŏt ca wì haq hòm.
11 “ 'Màng aih, manàiq cô ìh doi ca mangai Juđa wa jàn phôq Jê-ru-sa-lem: ‘Chuaq doi 'màng cô: Au đang padon bìac ranàc trùh ca pì, đòiq tajraq ca pì. Rìm ngai ŏi ta pì cađac dèh manoh broq tôiq, trong wa bìac broq ngang dù beq.’
12 Mahaq wì haq doi: ‘Đòiq da nhèn 'màng aih raq. Nhèn broq tiaq dèh manoh enh, rìm ngai broq tiaq dèh manoh cadoq cadang.’ ”
13 Taiq 'màng aih Chuaq doi:
“Bòch rìm Diac beq,
i mangai leq khoi lah tàng bìac 'màng cô:
aih jàn Is-ra-ên gu adrùh da Au
khoi broq bìac dìq jaq 'mèq.
14 Bôi wang Liban i jò leq xŏt dìq ca twiac,
wa còi diac i jò leq xŏt ca diac ùh?
15 Mahaq jàn Au hèt ca Au;
wì haq bùh jreo xua thùm tadreo ca 'bài can kiac ùh loh cleq,
'màng aih wì haq khoi tacro,
ùh tiaq trong troq enh calah nèh,
mahaq wì lam trong crài trong ùh troq.
16 Wì khoi broq dèh ca Taneh Diac loh ca wang wê,
trùh 'mòi dìq can rìh 'bìq jù lê,
rìm ngai lam hlài trong aih loh ca hamrìh
wa ngu ngìu gàu.
17 Tìah ca cayeo pah mat mahì loh hlôi dêh,
Au jah broq ca wì haq cadàu rah pah enh ngìa ca mangai git ca wì haq.
Au ùh patô ca wì hadrò da Au,
mahaq Au am rù ca wì haq ta hì wì haq glàm bìac ranàc.”
18 Èh wì doi: “Beq bèn pađim ca dabau tajraq hlài ca Jê-rê-mi. Joq bàu ranenh ùh hìaq 'bìq hnhung khoi ca mangai pajàu, wa xôq ŏi i mangai ragài đòiq tah bàu ca nhèn; xôq ŏi i bàu da mangai capoch thai Boc Plình am ca nhèn! Nhèn phai kìan haq xam bàu amòng, èh nhèn hadai ùh nhàn cleq bàu capoch da haq.”
19 Waiq Chuaq, xìn Ìh hèm trùh ca au,
tamàng bàu wì ma tajraq hlài ca au.
20 Khòh broq bìac dù đòiq ca'naih hlài bìac lem da au 'mòh?
Ìh hmàng au khoi lah yòng enh ngìa ca Ìh,
capoch bàu lem thai ca wì haq
đòiq gagè wì haq khoi ca can nòih da Ìh.
21 Taiq 'màng aih, xìn Ìh am pangot hrah trùh ca con xau wì haq,
am chac hamac wì haq ca chang gùm.
Đòiq 'bài mai wì haq ùh i con hi khoi wìa hadrô.
Đòiq ŏng wì haq 'bìq jêh cachìt,
wa 'bài mangai radam cachìt ca chang gùm,
nòi tajêh poh.
22 Waiq thê bàu brêu loh enh hnem wì haq,
jò Ìh thê lình ta'ngàc trùh jêh wì haq,
ma jah 'màng aih taiq wì khoi bŏc trom taneh đòiq rùp au,
wa broq hlàp ca jènh au hlòp.
23 Mahaq Chuaq ôi,
Ìh khoi loq rìm bàu pađim wì broq đòiq jêh đac au.
Xìn Ìh paq baxŏng tôiq ca wì haq,
hadai apaq xùt đac lôi wì haq enh ngìa ca Ìh.
Xìn Ìh broq ca wì haq 'bìq cro enh ngìa ca Ìh;
wa xìn Ìh baxa wì haq ta jò Ìh loh nòih.