22
Jê-rê-mi Gòi Bàu Pa'nhùq Ca Phôq Jê-ru-sa-lem Èh Tacro
1 Chuaq anoi 'noh 'màng cô: “Loh trùh hnem bùa Juđa beq, anoi hlài ca haq bàu cô:
2 ‘Ô bùa da Juđa ma ha'ngui ta gèq Đawit: Ìh, hapŏng ìh wa jàn ìh mùt ti 'bài trom 'mang ngo cô, tamàng bàu da Chuaq beq!
3 Chuaq anoi 'noh 'màng cô: Broq bìac troq wa ta-atoq beq; dŏih mangai 'bìq padit padiang claih khoi ca mangai padit padiang; paq broq raliang wa padit padiang ca 'bài mangai ma ŏi đò ta pì, wa ca 'bài mangai lac loq 'bài mangai hadrô, paq broq ta-ùc mahem ca mangai ùh i ca tôiq ta nòi cô.
4 Tàng pì joq 'nàng iu tiaq bàu cô, èh jah i bùa ha'ngui ta gèq Đawit, còi xê wa axêh, cla bùa, hapŏng haq wa jàn haq jah mùt loh ti 'bài 'mang ngo cô.
5 Mahaq tàng pì ùh iu tiaq bàu cô’, Chuaq anoi 'noh: ‘Au patô dađeh đòiq pachac, hnem cô jah loh ca wang wê.’ ”
6 Chuaq doi ca bìac hnem bùa Juđa 'màng cô:
“ 'Nhac ca Au ngan ìh hadai tìah ca Ga-la-at,
hadai tìah ca bôi wang Liban,
mahaq ìh ùh claih ca Au broq ca ìh loh nòi wang wê,
loh 'bài phôq ùh i ca mangai ŏi.
7 Au padon đòiq 'bài mangai broq raliang đòiq ta'blêq ca ìh,
dìq wê ranac tajêh;
wì haq cau da ìh 'bài long hùang nam lem
wa hwenh 'mùt ta ùnh.
8 “I jàn enh bàc Diac lam cwa haten ca phôq cô, bòch dabau: ‘Gleq Chuaq khoi broq ca phôq càn cô 'màng cô?’
9 Jah i mangai tèo bàu, doi: ‘Aih taiq jàn aih khoi cađac dèh wêh jao da Chuaq Boc Plình da wì haq, èh lam cùh waiq wa patìh bìac 'bài can kiac.’ ”
10 Apaq hmoi ca mangai cachìt, paq rawòi ca haq.
Mahaq hmoi ca mangai loh lam beq,
taiq haq pi wìh hlài,
pi hnoq hòm dèh gùng ma xa-ông ca haq.
11 Ma jah 'màng aih Chuaq anoi ca Salum, con calô Jôsia, bùa da Juđa, tŏc thai dèh baq, aih Jôsia, hi khoi lam khoi nòi cô. “Haq pì wìh hlài ta aih hòm;
12 mahaq haq cachìt ta gùng haq ma 'bìq 'ràng trùh, pi ŏi jah hnoq taneh cô hòm.”
Bàu Anoi Bìac 'Bài Bùa
13 “Nan xa am ca mangai broq hnem xam bìac ùh ta-atoq,
broq adùq xam bìac ùh troq;
yŏc mangai haten hatìa abroq dech ca haq,
ùh ca'naih da wì 'bac cùng abroq;
14 Haq doi: ‘Au jah broq hnem rùng rai,
i 'bài adùq anàh;’
rong đòiq 'bài 'mŏc,
po cùa xam long hùang nam
wa xòn gòh ngèq.
15 “Ìh yŏc long hùang nam ta thì ca broq hnem lem,
nhò 'màng aih ìh jah broq bùa 'mòh?
Baq ìh calah nèh khoi caq ôq,
broq loh bìac ta-atoq lem lình?
Taiq 'màng aih haq jah xôq ramŏt.
16 Haq khoi broq loh trong tajang am ca mangai pa wa mangai ma thìuq, 'màng aih haq jah xôq ramŏt.”
Chuaq doi:
“ 'Màng aih ma ùh xài haq loq ca Au 'mòh?
17 Mahaq mat wa manoh pì ngan toq bìac ham,
broq ta-ùc mahem mangai ùh i ca tôiq,
wa broq bìac padit padiang ngang dù.”
18 Taiq 'màng aih, bìac ca bùa Jê-hô-a-kim, con calô da Jôsia, bùa da Juđa, Chuaq anoi 'noh 'màng cô:
“Ùh i mangai leq crò hmoi ca haq doi:
‘Ôi, oh daq calô au! Ôi, oh daq cadrì au!’
Hadai ùh i mangai leq 'ngwan ca haq doi:
‘Xa-ŏch ca craq au! Xa-ŏch ca bìac 'ngah 'ngai da haq!’
19 Haq 'bìq catùh tìah ca lùa 'bìq catùh;
'bìq dùi wa hwenh 'noh enh gùng
ca 'mang phôq Jê-ru-sa-lem.”
20 “Tŏc ta Liban creo dudan beq,
rayoih ta Basan;
creo dudan ta bôi wang A-ba-rim beq!
Ma jah 'màng aih dìq dŏng ca mangai ma loq waq ca ìh, dìq khoi 'bìq jêh đac.
21 Au anoi ca ìh 'nang jò ìh padrŏng can;
mahaq ìh doi: ‘Au ùh enh tamàng.’
Enh jò ìh ŏi nga, ìh khoi rìh caq ŏi 'màng aih,
ùh iu tiaq bàu Au.
22 Dìq ca 'bài mangai ma ban jàn ìh jah 'bìq cayeo hlôi đac,
mangai enh waq ca ìh jah 'bìq rùp 'nong lam broq hapŏng.
Jò aih, ìh jah camaih
wa paha'neq dađeh taiq rìm tôiq cla ìh.
23 Ìh mangai ŏi ta ‘Liban,’
broq pù xam 'bài long hùang nam,
jò ìh glàm bìac ranàc,
ìh jìq dìq jaq tìah ca gu cadrì jìq xa-ông!”
24 Chuaq doi.: “Joq 'nàng troi Au ma rìh hloi, 'nhac ca Jê-cô-nia, con calô Jê-hô-a-kim, bùa Juđa, 'nhac ca haq aih broq canhàng pateo ŏi ta tì 'ma Au, Au xôq hlôch đac ìh.
25 Au phùq ìh ta tì 'bài mangai enh jêh đac ìh, ta tì 'bài mangai ìh ma crè, aih tì Nê-bu-cat-nêt-xa, bùa Ba-bi-lôn, wa ta tì mangai Canđê.
26 Au hnan đac ìh wa miq khoi xa-ông 'noh ìh trùh ta mòiq gùng 'noiq, ùh xài gùng ma xa-ông ca ìh, wa ìh jah cachìt ta aih.
27 Phàn taneh ma mahua wì haq ngèh enh wìh hlài, èh ùh jah wìh hlài.”
28 'Màng aih Jê-cô-nia cô abôq ma 'bìq khìn đac wa 'bìq padah 'mòh?
Haq abôq ùh i cabô enh waq?
Gleq haq wa con xau haq dìq 'bìq hwenh đac,
'bìq hwenh ca'nìh ta gùng haq 'nhòq lah loq?
29 Ô taneh, taneh, taneh!
Tamàng bàu Chuaq beq!
30 Chuaq anoi 'noh 'màng cô:
“Achìh 'mùt hiniq mangai cô ta 'bài mangai ùh i ca con beq,
ta 'bài mangai lùch ca 'nhòng ùh padrŏng can;
ma jah 'màng aih con xau haq ùh i mòiq ngai leq padrŏng can;
pi ha'ngui ta gèq Đawit
wa pi wèq cwìang jàn Juđa hòm!”