23
Hamenh Ta-Atoq Aih Mangai Mêsi Trùh Èh
1 Chuaq doi: “Nan xa ca 'bài mangai ban, jêh đac wa broq pac lac ca calùh trìu da đùng nhat Au!”
2 Taiq 'màng aih, phàn 'bài mangai ma wèq ban jàn da Haq, èh Chuaq Boc Plình da Is-ra-ên doi 'màng cô: “Pì broq pac lac đac ca calùh trìu Au, drùh đac wa ùh wèq ngan wì haq. Cô, Au jah baxa pì taiq bìac dù pì ma broq”; Chuaq anoi 'noh 'màng aih.
3 “Èh cla Au jah gop hlài 'bài con trìu ma ŏi xrong, enh 'bài Taneh Diac ma Au khoi drùh wì haq trùh, hi jah 'ràng wì haq hlài dèh ta cadrong; wì haq jah xa-ông loh bàc tam.
4 Au jah dèch 'bài mangai đòiq wèq ban wì haq; wì haq pi hìaq crè yùq hòm, wa ùh thìuq loq hù hnhung mòiq toq con leq”; Chuaq doi 'màng aih.
5 Chuaq anoi 'noh:
“Cô, 'bài hì trùh Au jah broq am ca hnem Đawit mòiq Hamenh Ta-atoq.
Haq wèq cwìang tìah ca bùa, caq ŏi khôn rabiaq,
broq bìac da-adàng ta-atoq ta crŏng taneh.
6 Ta 'nhòng bùa aih, Juđa jah dèch claih;
Is-ra-ên jah ŏi nòi hanình,
wa wì jah creo hiniq Haq:
Chuaq bìac ta-atoq nhèn!”
7 Chuaq anoi 'noh: “Taiq 'màng aih 'bài hì trùh, wì pi ŏi anoi: ‘Joq 'nàng tìah troi Chuaq ma rìh hloi, Haq ma khoi 'nong jàn Is-ra-ên loh khoi ca taneh Aicàp.’
8 Mahaq wì doi: ‘Tìah troi Chuaq ma rìh hloi, Haq ma khoi 'ràng mangai hnem Is-ra-ên hlài enh pah 'ngeo ca mat mahì loh, enh 'bài Diac ma Au khoi hnan wì haq trùh.’ Wì haq jah ŏi dèh ta taneh cla.”
Mangai Amòng Capoch Thai Boc Plình 'Bìq Kìan
9 Phàn da 'bài mangai capoch thai Boc Plình:
Manoh au hech hoch;
caxènh au ralenh raloih;
au tìah ca mangai bù,
tìah ca mangai bù brènh mat ca diac nho,
taiq nen Chuaq
wa bàu hadròih Haq.
10 Ta taneh gùng bình baoq bìac tango anang;
taneh loh ca mango taiq 'bìq waiq hanip;
'bài đùng nhat ta nòi đùng wang wê loh ca croh crenh.
Wì lam tiaq trong dù,
wì haq wèq cwìang ùh ta-atoq;
11 “Taiq mangai capoch thai Boc Plình wa pajàu Boc plình dìq dŏng broq ùh troq;
Au hnoq wì haq broq bìac ngang dù ta trom hnem Au;”
Chuaq anoi 'noh 'màng aih.
12 “Taiq 'màng aih, trong wì haq jah tìah ca nòi talia;
wa jah 'bìq hnan mùt ta clam,
èh tacro ta aih.
Ma jah 'màng aih khoi trùh hanam wì haq 'bìq baxa,
Au ca'nìh ca wì haq can ranàc,”
Chuaq anoi 'noh 'màng aih.
13 “Au khoi hnoq bìac ranhùa
da mangai capoch thai Boc Plình ta gùng Sa-ma-ri;
wì haq canòm hiniq Ba-an capoch bàu doi adroi,
broq ca jàn Is-ra-ên lam lac.
14 Mahaq Au khoi hnoq mòiq bìac ramòt
ta'ne mangai capoch thai Boc Plình ŏi ta Jê-ru-sa-lem:
Wì haq broq tôiq tango anang,
lam tiaq trong amòng;
wì haq broq hagao ca tì mangai dù,
trùh 'mòi ùh i cabô cađac dèh bìac dù.
Au ngan wì haq dìq dŏng tìah ca Sôđôm,
wa jàn wì haq tìah ca Gô-mô-ra.”
15 Taiq 'màng aih, phàn 'bài mangai capoch thai Boc Plình aih, Chuaq ma wèq dìq ca 'bình plình, doi:
“Cô, Au jah am ca wì haq caq ngè pagiang xang wa ôq diac đùc;
taiq enh 'bài mangai capoch thai Boc Plình ŏi Jê-ru-sa-lem khoi loh
bìac ùh troq jàp ca gùng aih.”
16 Chuaq ma wèq dìq ca 'bình plình doi 'màng cô:
“Apaq tamàng bàu da 'bài mangai capoch thai Boc Plình aih anoi ca pì.
Wì haq hnài pì bìac hù hnhung,
wa anoi bìac mahno 'noh tiaq manoh wì haq,
ùh xài loh enh hacùng Chuaq.
17 Wì haq doi ca mangai ma khìn Au:
‘Chuaq doi: Pì jah catèm.’
Doi ca mangai cadoq manoh:
‘Ùh i ca bìac ranàc leq trùh ta pì.’
18 'Màng aih cabô dràng yòng ta bìac hatình da Chuaq
đòiq ngan wa tàng bàu Haq?
Cabô khoi hèm haboq wa tamàng bàu Haq?
19 Cô, can nòih xrông da Chuaq
plôh loh tìah ca bahùt,
tìah ca cayeo wawenh dêh
loh ta gàu 'bài mangai dù.
20 Can nòih da Chuaq ùh jah hêq trùh
jò broq gêh trong khoi pajaq đòiq ta manoh.
Ta hì pulùch,
pì jah loq ro bìac aih.
21 Au ùh thê 'bài mangai capoch thai Boc Plình cô loh lam,
mahaq wì haq khoi cadàu lam anoi bàu dađeh;
Au ùh i anoi ca wì haq,
mahaq wì haq khoi capoch.
22 Mahaq tàng wì haq i tamàng bàu Au hatình,
èh jah broq ca jàn Au tamàng bàu Au,
wa khoi broq ca jàn Au cađac trong dù
bìac 'mèq wìh hlài ca Au.”
23 Chuaq anoi 'noh: “Au cô i xài Boc Plình ŏi haten,
ùh xài Boc Plình ŏi hangai 'mòh?”
24 Chuaq anoi 'noh: “I ca mangai leq jah cadoc dađeh
ta 'bài nòi hlèp đòiq Au ùh hnoq ùh?”
Chuaq doi: “Ma ùh xài Au bình halùih ta plình
wa jàp jìa rìm nòi ta crŏng taneh cô 'mòh?”
25 “Au khoi tàng bìac 'bài mangai capoch thai Boc Plình cô capoch, wì haq canòm ca hiniq Au capoch bàu loq adroi amòng 'màng cô: ‘Au apô hnoq; joq 'nàng, au apô hnoq!’
26 'Bài mangai capoch bàu doi adroi aih, tiaq dèh manoh amòng capoch bàu doi adroi amòng, wì haq i manoh aih trùh jò leq?
27 Nhò bìac apô wì hèm jah broq ca jàn hèt ca Au, hadai tìah ca boc yaq wì haq taiq Ba-an wì hèt ca hiniq Au.
28 Mangai capoch thai Boc Plình leq i apô hnoq, jah anoi hlài bìac apô aih, mahaq mangai leq khoi nhàn bàu Au, phai i manoh joq 'nàng anoi hlài bàu Au! Hri jah achùa ca hadròc 'mau 'mòh?” Chuaq doi 'màng aih.
29 “Bàu Au ma ùh tìah ca ùnh, tìah ca tamoh tùq padah hmu 'mòh?” Chuaq doi 'màng aih.
30 Taiq 'màng aih Chuaq anoi doi: “Cô, Au tajraq hlài ca 'bài mangai capoch thai Boc Plình amòng atùng bàu dabau capoch 'noh hi doi aih bàu Au.”
31 Chuaq anoi 'noh: “Cô Au tajraq hlài ca 'bài mangai capoch thai Boc Plình yŏc dèh rapet anoi 'noh: ‘Chuaq doi 'màng aih.’ ”
32 Chuaq anoi 'noh: “Cô, Au tajraq hlài ca 'bài mangai yŏc bìac apô amòng, anoi hlài wa yŏc bàu 'nùt catèh broq ca jàn Au lam lac. Au ùh i thê wa hadai ùh thê wì haq lam anoi; wì haq hadai ùh i broq lòiq cleq ca jàn cô.” Chuaq anoi 'noh 'màng aih.
33 “Tàng mangai capoch thai Boc Plình loq pajàu, bòch ìh: ‘Bàu genh trap Chuaq anoi 'noh ca ìh, aih cah cleq?’ Ìh khòh tèo: ‘Bìac genh trap aih? Chuaq doi: Pì raq broq genh trap ca Au, 'màng aih Au jah cađac pì.’
34 Phàn da mangai capoch thai Boc Plình, pajàu loq mangai jàn leq doi: ‘Cô genh trap da Chuaq,’ èh Au jah baxa mangai aih wa hnem haq.
35 'Màng aih, cô bàu anoi ca rìm ngai khòh doi dèh mangai haten: ‘Chuaq khoi tèo bàu 'màng leq?’ ‘Chuaq khoi capoch 'màng leq?’ ‘Chuaq khoi hnài cleq?’
36 Mahaq pì ùh jah ràu trùh genh trap da Chuaq hòm, taiq bàu mangai leq jah wìa genh trap ca cla haq, taiq pì khoi broq tawech ca bàu da Boc Plình ma rìh hloi, aih Chuaq ma wèq dìq ca 'bình plình, Haq Boc Plình bèn.
37 'Màng aih ìh khòh doi ca mangai capoch thai Boc Plình: ‘Chuaq khoi tèo bàu am ca ìh 'màng leq?’ Loq: ‘Chuaq khoi anoi 'noh ca ìh 'màng leq?’
38 Mahaq tàng pì ŏi doi: ‘Cô bìac genh trap da Chuaq,’ èh Chuaq anoi 'noh 'màng cô: Taiq pì anoi bàu cô: ‘Cô bìac genh trap da Chuaq,’ mahaq Au khoi thê mangai trùh ta pì đòiq hnài pì: Pi jah doi: ‘Cô bìac genh trap da Chuaq.’
39 Taiq nen aih, cô, Au jah hèt ca pì; Au cađac pì, pì wa phôq ma Au khoi am ca pì wa boc yaq pì, jah hangai ca ngìa Au.
40 Au jah broq ca pì chìuq camaih hloi hloi, wa paha'neq dìq jaq, ùh jò leq jah hèt.”