148
Pariaq Rìm Ngè ca Padèch Chuaq
1 Ha-lê-lu-ya! Padràu hau ca Chuaq beq!
Enh 'bài lòp plình padràu hau Chuaq beq!
Padràu hau Haq ta nòi ma ha'nhèq da Haq!
2 Ô dìq dŏng 'bài 'bình plình, padràu hau Haq beq!
Ô dìq ca 'bình plình ta plình, padràu hau ca Haq beq!
3 Ô mat mahì, mat khê, padràu hau Haq beq!
Ô dìq dŏng halŏng xreo 'ngah, padràu hau ca haq beq!
4 4 Ô 'bài lòp plình yi ha'nhèq, padràu hau Haq;
ô diac ta 'bài lòp plình padràu hau ca Haq beq!
5 Waiq rìm ngè bìac padràu hau ca hiniq Chuaq beq;
taiq Haq 'noh bàu thê, èh dìq dŏng tajòi 'mòi jah broq loh.
6 Haq broq dìq dŏng aih hagao trùh hloi hloi ùh lùch;
Haq hadai am bàu thê ma ùh jò leq jah cađac.
7 Ô 'bài ngè càn caiq da diac raxìq,
wa nòi jrùq ta taneh, padràu hau Chuaq beq.
8 Ô ùnh wa mè preo, twiac wa yùc,
cayeo bahùt iu tiaq bàu thê Haq,
9 'bài wang wa 'bài go,
long i plì wa rìm long hùang nam,
10 jam rôm wa 'bài ngè aban,
ngè moq ta taneh wa 'bài chìm,
11 'bài bùa ta crŏng taneh wa dìq ca jàn,
con bùa wa dìq ca cwan hadrah da crŏng taneh,
12 gu radam wa gu adrùh,
mangai craq wa con 'yoh.
13 Dìq dŏng phai padràu hau ca Chuaq beq!
Ma jah 'màng aih toq hiniq Haq raq jah padèch ha'nhèq;
can 'ngah 'ngai Haq yi hnao dŏng ca crŏng taneh wa 'bài lòp plình.
14 Haq khoi dèch aki da jàn Haq tŏc;
Haq padèch ha'nhèq mangai hadròih da Haq,
ji jàn Is-ra-ên, aih jàn ŏi haten ti Haq.
Padràu hau ca Chuaq beq!