149
Pariaq Jàn Is-ra-ên ca Padèch Chuaq
1 Ha-lê-lu-ya! Padràu hau ca Chuaq!
Calêu ca Chuaq mòiq 'bŏi calêu neo beq!
Padràu hau ca Haq ta'ne 'bài mangai hadròih da Haq beq.
2 Waiq ca Is-ra-ên lem bùi dèh ca Chuaq ma broq loh wì haq;
waiq ca mangai Jê-ru-sa-lem lem bùi dèh Bùa wì.
3 Waiq ca wì haq nhaiq muaq padràu hau hiniq Haq,
waiq ca wì haq padràu hau Haq xam tep clùng wa rawêh ranac cràu.
4 Taiq Chuaq lem bùi ca jàn Haq;
Haq yŏc bìac dèch claih anì am ca mangai 'bìq padit padiang.
5 Waiq ca 'bài mangai hadròih da Haq lem bùi ca bìac 'ngah 'ngai Chuaq.
Waiq wì haq calêu lem bùi dèh ta jùang!
6 Waiq bàu padràu hau padèch ha'nhèq da Boc Plình ŏi ta hacùng wì haq,
wa pla chang gùm hin baiq pah ŏi ta tì wì haq,
7 đòiq tabroq hlài ca 'bài Diac
wa baxa 'bài jàn;
8 đòiq càt 'bài bùa wì haq xam caxi mem tagwat,
wa càt xam caxi mem 'bài mangai gù craq da wì haq;
9 đòiq broq ca wì haq bìac baxa ma khoi achìh ca wì haq.
Aih can 'ngah 'ngai ca mangai hadròih da Haq.
Padràu hau ca Chuaq!