25
Waiq Khàn Đòiq Chuaq Jah Jùp Đò, Ajènh Trong Wa Jah Baxŏng Tôiq
Đawit Achìh
1 Chuaq ôi,
au atŏc dèh mahua yiang enh ngìa ca Ìh.
2 Boc Plình ôi! Au canòm lùi Ìh,
xìn paq am au camaih,
paq am wì ma git ca au jah 'blêq au.
3 Joq 'màng aih,
dìq ca mangai leq canòm ca Chuaq,
ùh hìaq 'bìq camaih,
mahaq 'bài mangai loq blàq blènh jah 'bìq camaih.
4 Chuaq ôi, xìn am au jah loq trong lam Ìh enh,
xìn hnài au loq rìm trong da Ìh.
5 Xìn ajènh au lam ta nòi bàu joq 'nàng da Ìh wa hnài au;
Ma jah 'màng aih Ìh Boc Plình da bìac dŏih dèch au;
xèq ca hì au gòm ngèh Ìh.
6 Chuaq ôi! Xìn hmàng hlài manoh loq xa-ŏch wa loq waq càn caiq da Ìh.
Ma jah 'màng aih baiq bìac cô khoi i enh calah baxèm.
7 Xìn Chuaq paq hmàng hlài bìac tôiq lôi da au jò ŏi radam,
hadai paq hmàng jò au pòq tôiq ùh dì tiaq ranenh.
Chuaq ôi! Xìn Ìh hmàng trùh ca au tiaq manoh xa-ŏch wa can loq waq da Ìh,
tiaq manoh lem lình da Ìh.
8 Chuaq lem wa broq lem jang;
'màng aih Haq patô hnài ca mangai i tôiq trong lam.
9 Haq 'nong trong ca mangai ùh padèch dèh manoh ta trong ta-atoq.
Haq hadai hnài mangai ùh padèch dèh manoh tiaq trong da Haq.
10 Rìm trong da Chuaq aih can xa-ŏch xam manoh loq waq wa bàu joq 'nàng
ca mangai leq loq wèq bìac wêh jao wa bàu anoi hnài da Haq.
11 Chuaq ôi, Taiq hiniq Ìh, xìn baxŏng tôiq ca au,
'nhac ca tôiq aih dìq jaq càn.
12 Cabô mangai loq yùq crè ca Chuaq?
Haq jah patô hnài am ca mangai aih trong leq ma khòh ràih.
13 Haq jah rìh padrŏng can ta 'bài hì da haq,
con xau haq jah i taneh broq xôxech.
14 Hiniq hlèp da Chuaq jah am ca mangai leq loq yùq crè ca Haq,
Haq am ca wì loq wêh jao da Haq.
15 Mat au hloi hloi ngan pah Chuaq,
ma jah 'màng aih toq Chuaq raq jah dŏih jènh au loh khoi 'bìq hlac hlàm.
16 Xìn tawìh ta au, xa-ŏch ca au,
ma jah 'màng aih au lac ŏi mòiq ngai wa khoi 'bìq nan xa.
17 Bìac manhài khoi bàc tam ta manoh au,
xìn ca'naih au jah claih bìac nan xa da au.
18 Xìn ngan hnoq bìac nan xa wa manhài da au,
wa xìn baxŏng tôiq lôi da au.
19 Xìn ngan wì ma git ca au taiq wì haq khoi bàc;
wì dìq jaq git ca au.
20 Xìn wèq mahua yiang au wa dèch dŏih au;
paq đòiq au camaih,
ma jah 'màng aih au cô mangai canòm hanình ca Chuaq.
21 Xìn bìac broq troq wa bìac lem jang wèq ban au,
ma jah 'màng aih au canòm Ìh.
22 Waiq xìn Boc Plình rŏt dèch hlài Is-ra-ên loh khoi
enh bìac nan xa da wì haq.