37
Wì Canòm Chuaq Jah Catèm Wì ùh Canòm Chuaq Ùh Catèm
Đawit Achìh
1 Paq 'bìq ua-ac ca mangai ngang dù,
hadai paq tagrình ca mangai broq 'mèq 'mac.
2 Ma jah 'màng aih wì haq renh 'bìq gat đac bu dàng nhat,
wa hŏnh renh bu dàng nhat nga.
3 Canòm ca Chuaq beq wa broq bìac lem.
Phai ŏi dèh ta gùng wa loq wèq bàu da Haq.
4 Lem bùi ŏi ta Chuaq oq,
èh Haq jah am ca ìh bìac manoh ìh ngèh enh.
5 Jao am rìm bìac broq da dađeh ca Chuaq beq,
wa dìq ca manoh lùi canòm ca Haq, èh Haq jah broq gêh da ìh.
6 Chuaq jah broq bìac ta-atoq da ìh xreo 'ngah tìah ca mat mahì daxroq,
wa trong hèm hadrah jang lem da ìh tìah ca mat mahì jò 'ne hì.
7 Hatenh enh ngìa ca Chuaq beq,
àt dèh manoh gòm Haq,
paq 'bìq ua-ac jò hnoq mangai dù padrŏng can,
loq mangai ma broq bìac ngang dù.
8 Cađac bìac loq nòih wa manoh loq xrông beq.
Paq 'bìq ua-ac taiq trong aih loq 'ràng ìh trùh bìac broq dù.
9 Ma jah 'màng aih mangai broq dù èh 'bìq jêh đac,
mahaq mangai canòm ca Chuaq, èh jah i taneh broq xôxech.
10 Pi dùnh toq leq mangai dù èh dìq,
'nhac ca ìh chaq nòi ŏi haq xôq pi hnoq.
11 Mahaq mangai paha'neq dađeh jah i taneh broq xôxech,
wa jah rìh lem bùi ŏi ta can catèm wa can padrŏng càn caiq.
12 Mangai ngang dù broq pađim tajraq hlài ca mangai ta-atoq,
wa cadrit hanenh ca haq.
13 Chuaq do ca mangai dù, ma jah 'màng aih Chuaq
loq hì lùch da wì haq khoi trùh haten.
14 Mangai dù dèch chang gùm,
'nat panenh
đòiq jêh đac mangai pa wa mangai nan tùng,
đòiq jêh đac mangai i manoh caq ŏi lem jang.
15 Mahaq chang gùm wì pàc hlài plì nòih ca wì,
wa panenh wì haq 'bìq tagoh đac.
16 'Bac mangai ta-atoq 'nhac ca toq 'biaq,
mahaq lem yi hnao ca bìac padrŏng can da bàc mangai dù.
17 Ma jah 'màng aih cŏng da mangai dù èh tagoh,
mahaq Chuaq broq cajap ca mangai ta-atoq.
18 Chuaq loq 'bài hì da mangai ta-atoq,
xôxech wì haq jah ŏi hloi hloi.
19 Jò glàm bìac 'mèq ranàc wì ùh hìaq 'bìq camaih;
ta 'bài hì pangot hrah wì jah caq panàc tàu tìa.
20 Mahaq wì mangai dù èh 'bìq jêh cachìt;
mangai git ca Chuaq tìah ca riang ta đùng taneh,
khoi èh 'bìq hnhung, hnhung bu dàng nhòi ùnh.
21 Mangai dù mùan wai mahaq ùh enh ca'naih hlài,
mangai ta-atoq am dech am rùng rai.
22 Ma jah 'màng aih mangai leq jah Chuaq am xôq ramŏt,
èh jah i bàc taneh broq xôxech;
mangai leq Haq waiq hanip,
èh 'bìq cachìt hù hnhung.
23 Chuaq broq cajap lem trong da mangai ta-atoq,
èh Chuaq bùi manoh ca trong haq lam.
24 'Nhac ca haq catŏih xôq haq ùh tacro hatàp gàu,
ma jah 'màng aih tì Chuaq dèch tì haq.
25 Adroi nèh au 'yoh hanam, manàiq au khoi craq,
au ùh lah hnoq mangai ta-atoq leq 'bìq Chuaq cađac,
wa con xau haq ep lam xìn caq.
26 Xèq ca hì haq i manoh rùng rai wa am mùan,
con xau haq jah wìa xèm xôq ramŏt.
27 Wia hangai ca bìac dù wa broq bìac lem beq,
èh jah rìh catèm hloi hloi.
28 Ma jah 'màng aih Chuaq loq waq ca mangai ta-atoq
wa ùh cađac mangai hadròih da Haq.
Chuaq wèq wì hloi hloi,
mahaq con xau da mangai dù èh cachìt lùch.
29 Mangai ta-atoq jah i đùng taneh
wa jah ŏi ta aih catèm hloi hloi.
30 Hacùng da mangai ta-atoq toq pa'noh bàu khôn rabiaq,
rapet da haq toq capoch bàu ta-atoq.
31 Ranenh da Boc Plình jah ŏi ta manoh haq,
jènh haq ùh talia.
32 Mangai dù toq gòm rap mangai ta-atoq đòiq
chaq trong jêh đac haq.
33 Mahaq Chuaq ùh cađac haq mùt ta tì mangai dù,
hadai ùh đòiq haq 'bìq ta'mòq tôiq jò wì yòng enh ngìa ca mangai hadrah.
34 Gòm Chuaq oq, èh wèq cajap trong da Haq,
Haq jah dèch pì đòiq jah nhàn xôxech taneh.
Jò Chuaq jêh đac wì mangai dù,
pì jah hnoq.
35 Au khoi lah hnoq padren dêh da mangai dù,
broq ca dađeh càn dêh tìah ca long càn lem ta gùng i taneh lem.
36 Mahaq mòiq rahyàc haq cachìt, pi i hòm,
'nhac ca au ti chaq xôq pi hnoq haq hòm.
37 Ngan wì mangai ta-atoq beq! Ngan wì mangai lem jang manoh beq!
'Nhòng rìh atìq da wì haq jah catèm.
38 Mahaq dìq ca mangai i tôiq èh 'bìq jêh cachìt hù hnhung,
con xau da wì haq hadai cachìt hnhung.
39 Mahaq bìac dèch claih da mangai ta-atoq trùh enh Chuaq.
Chuaq, Haq can dêh da wì haq jò glàm bìac yat dè.
40 Chuaq jùp đò wì haq wa dèch wì haq.
Chuaq dèch wì claih enh mangai dù wa am ca wì haq can rìh,
ma jah 'màng aih wì haq khoi loq hanình ca Chuaq.