38
Bàu Waiq Khàn da Mangai Cađac Dèh Manoh Broq Tôiq
Đawit Achìh
1 Chuaq ôi, jò Ìh đang xrông, xìn paq lech ca au,
jò Ìh nòih dìq jaq, xìn paq baxa au.
2 Ma jah 'màng aih rang panenh da Ìh khoi mùt ta chac au,
capiang tì Ìh khoi padit au.
3 Ma jah 'màng aih taiq can nòih da Chuaq chac au loh ca pi tadêh,
taiq tôiq lôi bàc da au, caxènh au loh ca pi jah catèm.
4 Ma jah 'màng aih tôiq lôi da au khoi yi dôch ca gàu au,
haq bu dàng pòq trap dìq jaq trap ca au.
5 Taiq bìac blùng da au,
rìm habau da au loh ca xua om wa loh đùh.
6 Crŏng au loh ca cŏc, gàu cùp ha'neq,
xèq ca hì au lam ba'yàt rai hràng.
7 Ma jah 'màng aih cliac da au tôq tiang tìah ca ùnh 'nang bùh.
Chac hamac au ùh jah tadêh.
8 Au 'bìq jùq jàm wa jôiq hmet, trùh pi i ca padren.
Au hràng taiq khoi manhài ta manoh hèm.
9 Chuaq ôi, Ìh loq dìq rìm bìac ngèh enh da au,
bàu hmoi hràng da au ùh hlèp ca Ìh.
10 Plì nòih au rađah, padren au pi pàng leq,
mat au hadai pi ngah.
11 Mangai loq waq ca au wa bua au dìq wia hangai
ca au jò au glàm bìac ranàc. cô oq.
12 Wì mangai chaq jêh au khoi bet rahoch ca au;
wì mangai enh broq 'mèq ca au, pa'nhùq raliang đac au;
xèq ca hì wì hèm broq bìac pađim 'nùt.
13 Au tìah ca mangai clìch pi jah tàng cleq,
bu dàng mangai làu ùh jah capoch cleq.
14 Joq, au bu dàng mangai ùh jah tàng,
hacùng ùh i bàu tèo.
15 Mahaq Chuaq ôi! Au canòm gòm nòi Ìh.
Chuaq ôi, Ìh Boc Plình au, Ìh raq tèo bàu ca au.
16 Au doi: “Xìn paq đòiq wì lem bùi taiq bìac au,
paq đòiq wì catèh wa padèch dađeh jò au lia tacro.”
17 Ma jah 'màng aih au khoi ten cro,
can mango hloi hloi ŏi enh ngìa ca au.
18 Au pa'noh tôiq lôi da au;
manoh au bình mango taiq tôiq lôi au.
19 Mahaq wì mangai tajraq hlài ca au xôq rìh wa tadêh tadon,
èh wì bàc ma git ca au joq 'nàng ùh i nen cleq.
20 Wì mangai yŏc bìac lem ca'naih hlài bìac dù,
tajraq hlài ca au taiq au broq tiaq bìac lem.
21 Chuaq ôi! Xìn Ìh paq cađac au, ôi Boc Plình da au.
Xìn Ìh paq hangai ca au.
22 Waiq Chuaq, Ìh raq Chuaq dèch claih da au,
xìn renh trùh jùp đò au.