39
Can Rìh da Con Mangai Aih 'Ngwan
Đawit Achìh
1 Au doi ca dađeh: “Au wèq ngan trong dađeh
đòiq hacùng bàu da au ùh broq tôiq.
Jò i wì mangai dù enh ngìa ca au,
au bàng đac dèh hacùng.”
2 Mahaq jò au hatenh,
mòiq nà bàu lem xôq ùh capoch,
èh can mango da au tam yi hnao hòm.
3 Enh dalam manoh au tôq;
Jò au 'nang hèm haboq, ùnh cheo;
èh hacùng bàu au phai capoch doi:
4 “Chuaq ôi! Xìn am loq bìac lùch da 'nhòng rìh au;
Bahmàng au hì da 'nhòng rìh au i toq leq hì,
wa bahmàng au can rìh con mangai ùh dùnh dàng leq.
5 Chuaq ôi! Ìh khoi am 'bài hì da 'nhòng rìh au dùnh dàng mòiq wàu hada tì,
'bài hanam da au tìah ca mòiq rahyàc enh ngìa ca Ìh.
Joq 'nàng, can rìh rìm ngai tìah ca hòi hihèm.
6 “Joq 'nàng 'màng aih, rìm mangai cadiang lam bu dàng 'mù,
Joq, con mangai cadàu wawenh broq bìac toq dech 'ngwan.
Con mangai tagop đòiq cùng hang,
èh ùh 'nì cabô nhàn yŏc cùng hang aih.
7 “Chuaq ôi! Manàiq cô au ŏi ngèh gòm cleq hòm;
bìac ngèh gòm da au ŏi ta Ìh.
8 Xìn dèch au claih enh rìm bìac broq ùh troq da au.
Xìn paq đòiq wì mangai blùng khìn au.
9 Au ŏi hatenh ùh capoch leq,
ma jah 'màng aih Chuaq khoi broq ca au 'màng aih.
10 Xìn yŏc 'noh long roi Ìh khoi ca au;
au khoi loh ca jôq jrê taiq bìac baxa da Ìh.
11 Xam bàu lech, Ìh baxa con mangai taiq tôiq lôi da wì haq;
Ìh broq đac bìac ngèh enh wì haq loh ca bùc hech.
Ma jah 'màng aih 'nhòng rìh da con mangai bu dàng mòiq hòi hihèm.
12 “Chuaq ôi, xìn Ìh tamàng bàu waiq khàn da au;
cachình don tamàng bàu dang creo da au,
xìn paq bàng don jò diac mat au catôh,
ma jah 'màng aih enh ngìa ca ìh, au cô tamoi ùh canao;
mangai ŏi đò ta crŏng taneh cô tìah ca boc yaq au.
13 Xìn Chuaq baxŏng tôiq ca au,
èh au jah bùi lem adroi ca au loh lam.”