48
Siôn Lem Lình wa 'Ngah 'Ngai
Con Calô da Côra Achìh
1 Chuaq joq 'nàng i cwìang itai càn caiq,
joq đang ca padèch Haq ta phôq da Boc Plình da bèn, aih wang hadròih da Haq.
2 Wang hadròih da Chuaq dìq jaq ha'nhèq wa lem lình,
aih bìac bùi lem dìq ca con mangai crŏng taneh.
Wang Jê-ru-sa-lem, bôi ha'nhèq da Saphan,
aih phôq da Bùa càn.
3 Boc Plình ŏi ta hnem bùa da phôq,
Haq khoi patô Dađeh tìah ca đôn hanình.
4 Jò rìm bùa pajùm dabau
trùh tajêh phôq,
5 wì bù hnoq phôq hi khoi tarìt
yùq crè cadàu mot.
6 Ta aih wì tarìt tariang,
wa chìuq jìq tìah ca mangai cadrì jìq xa-ông.
7 Ìh blai padah padiang ca bong Ta-rê-si tìah
jò glàm cayeo hlôi enh pah mat mahì loh.
8 Bìac nhèn ma tàng;
nhèn khoi jah hnoq
ta phôq da Chuaq ma wèq dìq ca 'bình plình,
aih raq phôq Boc Plình da bèn,
Boc Plình broq phôq aih jah cajap hagao
hloi hloi.
9 Chuaq ôi! Ŏi ta hnem cùh waiq da Ìh,
nhèn hèm hamrìh ca can xa-ŏch xam manoh loq waq da Ìh.
10 Chuaq ôi! Hiniq Ìh 'màng leq,
èh dìq ca crŏng taneh jah dèch bàu calêu hiniq Ìh 'màng aih.
Tì pah 'ma da Ìh bình halùih bìac ta-atoq.
11 Wang Jê-ru-sa-lem lem bùi,
wì con cadrì da Juđa jah lem bùi
taiq bìac lem jang da Chuaq.
12 Lam ma jàp ca Jê-ru-sa-lem beq, lam dudan ca phôq;
rèn hnem gòm rap ha'nhèq da haq.
13 Hadro nòi ma cajap hagao da haq oq;
Lam ngan dìq ca hnem càn da haq,
đòiq jah anoi hlài
ca 'nhòng atìq.
14 Taiq Boc Plình cô, Haq Boc Plình da bèn.
Cla Haq raq jah ajènh bèn trùh jò cachìt.