49
Canòm ca Can Padrŏng, Aih Blùng
Con Calô da Côra Achìh
1 Dìq ca jàn ôi, tamàng bìac cô, dìq ca diac ta crŏng taneh ôi,
halang don tamàng oq;
2 dìq ca mangai i cwìang, loq mangai ùh i cwìang cleq,
mangai padrŏng can loq mangai pa hamoq.
3 Hacùng au jah capoch bàu khôn rabiaq,
manoh au jah hèm haboq trùh jò jah loq tàng trong broq rabiaq.
4 Au jah halang don tamàng bàu rabiaq;
au jah tèo hlài bàu bòch dìq jaq xa xam rawêh broc.
5 Taiq hagleq au ma khòh crè ta hì bìac ranàc trùh,
wa jò wì ma git ca au ŏi wawenh ca au?
6 Aih wì mangai canòm ca 'bac dađeh
wa catèh dèh bìac padrŏng can i rah da wì haq.
7 Ùh i mangai leq jah rŏt hlài can rìh dèh ca oh daq;
hadai ùh jah yŏc 'bac am ca Boc Plình đòiq rŏt dèch hlài haq.
8 Ma jah 'màng aih bìac ma rŏt hlài can rìh da haq dìq jaq canaq,
ùh jò leq nui ca'naih tôm tàu
9 đòiq haq jah i can rìh hloi hloi
wa ùh hìaq ep mùt ralùng hanang.
10 Ma jah 'màng aih mangai khôn rabiaq hadai cachìt,
mangai blùng wa mangai ranhùa hadai 'bìq jêh đac,
mahaq 'bac èh đòiq hlài ca mangai 'noiq.
11 Wì haq hèm ta manoh: Hnem au cô èh jah ŏi hloi hloi.
Nòi au cô èh jah cajap enh 'nhòng cô trùh 'nhòng tau.
Wì yŏc hiniq dađeh đòiq hiniq dèh ca đùng taneh dađeh.
12 'Nhac ca con mangai rahù rahìac jò can padrŏng,
xôq ùh rìh hloi; haq hadai tìah ca ngè aban phai 'bìq cachìt.
13 Trong da wì haq, aih bìac blùng da wì haq,
èh mangai ma tiaq wì haq lùi bàu capoch da wì haq.
14 Wì haq bu dàng lù trìu khoi pachì loh ta ralùng hanang;
can cachìt jah wèq ban wì haq.
Daxroq mangai ta-atoq wèq ban wì haq.
Chac hamac wì haq jah 'bìq hwenh ca'nìh ta Ralùng Hanang,
hangai ca nòi ŏi wì haq.
15 Mahaq Boc Plình jah rŏt dèch hlài mahua yiang au khoi ca cwìang da ralùng hanang,
ma jah 'màng aih Chuaq wèq ban au.
16 Paq crè ca mangai leq jò haq padrŏng can,
loq jò hnem haq loh ca rahù nhòm.
17 Ma jah 'màng aih jò cachìt haq ùh jah wê 'ràng cleq;
bìac rahù nhòm hadai ùh jah tiaq haq loh nòi cachìt.
18 'Nhac ca jò ŏi rìh haq jah padèch dađeh taiq dìq jaq tàu tìa,
wa 'nhac ca rìm ngai padèch bìac padrŏng can da haq;
19 mahaq haq hadai hlài dèh ta boc yaq.
Ta aih haq pi jah hnoq can 'ngah hòm.
20 Con mangai 'nhac ca padrŏng can, mahaq ùh 'nì loq bìac ro rang,
haq bu dàng ngè rôm lam trùh nòi cachìt.