126
God Make Tings Come Good Fo His Peopo
Song fo sing wen you go up to da Temple Fo God
1 Wen Da One In Charge
Bring back da prisonas
From Babylon side to Mount Zion,
All us guys feel
Jalike az was one dream!
2 Dat time, erytime we talk,
Us laugh an yell
Cuz we stay good inside.
Even da peopos
Inside odda countries tell,
“Da One In Charge,
He stay do plenny good tings
Fo his peopo!”
3 Az fo shua, Da One In Charge
Stay do plenny good tings fo us.
Az how come us guys
Stay real good inside!
4 Eh! Da One In Charge,
Us like fo you make eryting
Come good fo us guys,
Jalike was befo time.
Jalike wen you fill up
Da dry gulches Negev side
Wit plenny watta.
5 Da ones dat plant food, dey stay crying.
But bumbye, wen dey harves da food,
Dey goin yell plenny
Cuz dey feel good inside.
6 Fo shua, whoeva go out
Wit one bag seed fo plant um,
No matta dey stay cry plenny
Dat time,
Bumbye, wen dey bring back
Da wheat dey tie up,
Dey goin yell plenny,
Cuz dey stay real good inside!