127
Eryting Come From Da One In Charge
Song fo sing wen you go up to da
Temple Fo God, one Solomon kine song
1 Poho da builda guys build one house,
An Da One In Charge
Not da one dat build um.
Poho da security guard,
Dat guard da town,
An Da One In Charge
Not da one dat watch um.
2 Ony wase time
Wen you guys wake up real early
An pau hana real late
Fo bus ass fo get food.
Cuz you know, God take kea
Da peopo he get love an aloha fo,
Even wen dey stay sleeping.
3 You know wat? Da One In Charge
Give peopo kids,
Jalike dey one gif from him.
Da ones born from you,
Az jalike he give you someting good.
4 Da boys dat born wen you still young,
Dey goin take good kea a you bumbye.
Dey goin be jalike da arrows
One army guy carry
Fo nobody make any kine to him.
5 Any guy dat get plenny boys lidat,
He can stay good inside,
Jalike one army guy
Dat get one bag full a arrows!
Bumbye, if get peopo
Dat stay agains his kids,
An dey poin finga dem
In front da town leada guys,
Da kids no goin come shame,
Cuz dey pono!