128
How Fo Stay Good Inside
Song fo sing wen you go up to da Temple Fo God
1 All da peopo dat feel jalike dey sked
Weneva dey come
In front Da One In Charge,
An dat live da way he like dem fo live,
Dey can stay good inside.
2 Den, from da work you do
Wit yoa hands,
You goin get plenny fo eat.
You goin stay good inside,
An tings goin go good fo you too.
3 Yoa wife, inside yoa house,
Goin be jalike one grape plant
Dat give plenny grape.
Yoa boys dat sit aroun yoa table,
Goin be jalike da keikis
Dat grow up aroun da olive tree.
4 Dass da kine good tings God stay do,
Weneva get one guy dat feel
Jalike he sked
Wen he come in front
Da One In Charge.
5 I like Da One In Charge
Do good tings fo you,
Da One dat stay inside
Da Temple on top Mount Zion
All da time you stay alive!
Wen good tings happen
Fo da Jerusalem peopo,
I like dat happen to you too!
6 I like you see yoa grankids!
I like eryting go good
Fo da Israel peopo!