60
Us Pray Cuz Oua Army All Bus Up
Fo da main music guy sing um wit da tune, “Wat Da Lilies Tell.” Az one David kine song fo teach, fo tink bout da time David fight da Aram peopo from Two Rivas an Zobah. Den wen dey stay go home, Joab guys kill 12,000 Edom army guys too inside da Salt Valley.
1 Bummahs, God! You no give a rip fo us, o wat?!
You wen dump all us guys!
You wen let da odda army guys
Smash thru oua line!
You wen stay huhu wit us!
Now, we like you make us
Come okay one mo time!
2 You wen make da land shake
An split.
Now, fix all da place
Wea da land stay bus up,
Cuz az jalike da groun
Still stay shaking an no come solid.
3 You wen make yoa peopo suffa,
Jalike you make um
Drink da kine wine
Dat make um piloot
So dey no can stan up strait.
4 But fo da ones
Dat get choke respeck fo you,
Az jalike you give um one flag
Fo dem know wea fo run
Wen dey stay fight,
One place fo come togedda
Wen da odda guys shoot arrow,
No ways
Dey goin reach yoa guys!
(Time out fo da music.)
5 An cuz a dat,
Fo da peopo you get love an aloha fo,
I like fo dem get outa trouble.
You get plenny powa,
So go do someting fo help dem!
6 God wen tell dis, from inside da place
Dat stay spesho fo him:
“I goin feel real good inside,
Cuz I da winna!
I goin take ova da Shekem town lands
An da Sukkot Valley lands
An give um to my peopo.
7 Gilead side, all dat land stay mines,
Manasseh side, same ting.
Efraim jalike da helmet
Fo proteck my head.
Judah, he jalike da stick I carry
Fo show I da king.
8 Da Moab land, dass jalike da pot
I use fo wash hands,
Da Edom land,
Jalike I throw my slippas ova dem
Fo show I take um ova awready.
Wen I take ova da Filisha land,
I goin yell cuz I da winna!”
9 So! Who goin show me da way fo go
To da big town dat get strong wall?!
Who goin bring me to da Edom land?!
10 Goin be you, God, dat goin do dat,
No matta you da one
Dat wen dump us guys,
An you no go wit oua army guys
Wen dey go out fo fight!
11 Go come help us guys fo fight
Da ones dat stay agains us!
Wase time, tink dat odda peopo
Can get us outa trouble!
Ony you can!
12 Cuz us get God oua side,
Us goin be da winnas!
Him da One goin walk all ova
Da ones dat stay agains us!