61
God No Let Nobody Hurt Me
Fo da main music guy sing um wit string kine instrumen, one David kine song
1 Eh God! Wen I yell fo help, lissen!
Wen I pray, go hear wat I tell!
2 From da mos far place on top dis earth
I yell fo you help me
Weneva I feel all bum out
An weak inside.
Show me wea fo go
Fo hide on top one big rock
Dat stay mo importan den me,
3 Cuz you da one take kea a me
Fo me no get hurt.
You jalike one strong fort,
So dat da guys dat stay agains me
No can wack me.
4 I like stay wea you stay long time,
Inside yoa spesho place.
I like run by you an hide fo no get hurt,
An you cova me,
Jalike da muddah bird
Hide da small birds unda her wings.
(Time out fo da music.)
5 You, you my God.
An befo time,
Weneva I make one promise to you,
You wen lissen.
You wen give me da kine tings you get
Fo da peopo
Dat get choke respeck fo you,
Cuz dey know who you.
6 Give da king plenny mo year fo live!
Fo him, an fo da peopo
Dat bumbye goin come from him,
Fo come kings jalike him!
7 I like fo da king
Stay king foeva in front God!
I like fo God make shua
Notting bad goin happen to him.
I like God stay tight wit him,
An erytime do wat he tell he goin do.
8 Az how I goin sing foeva,
Cuz I know wat kine god you.
Ery day I goin do all da tings
I wen make one promise fo do.