62
God Goin Take Kea Me Fo Shua
Fo da main music guy Jedutun sing um, one David kine Song Fo God
1 Inside, I stay quiet an wait ony fo God.
God da ony one
Goin get me outa trouble.
2 He da ony one dat stay
Jalike one big rock wea I can hide,
An he get me outa trouble.
He jalike one strong wall fo me.
Nobody goin make me
Fall down real hard.
3 How long you guys
Goin attack one guy?!
How long all you guys
Goin bus him up
Jalike you bus up one wall
Dat lean one side
O one fence dat litto mo fall down?!
4 Dem guys ony make plan
Fo bring down dis guy
Dat get one good rep.
Erytime dey bulai somebody
Make dem feel good.
Wit dea mout, dey tell,
“I like God do good tings fo you!”
But inside, dey tink,
“I like put kahuna on top you!”
(Time out fo da music.)
5 Inside, I stay quiet, wait ony fo God.
God da ony one I stay wait fo,
Cuz I know he goin do someting.
6 He da ony one dat stay
Jalike one big rock wea I can hide,
An he get me outa trouble.
He jalike one strong wall fo me.
Nobody goin make me
Fall down real hard.
7 God da one dat get me outa trouble
An make da peopo get respeck fo me.
He jalike one big strong rock
Wea I can hide.
I stay tight wit God,
An he da One stay hide me.
8 Eh you peopo! Trus God foeva!
Tell him eryting you tink bout!
God, he da One
Stay hide us guys from trouble.
(Time out fo da music.)
9 Da peopo dat not importan,
Dey jalike da air.
Da importan peopo,
No can trus wat dey tell you.
Wen dey breave, dat air mo heavy
Den all dose peopo togedda.
10 No tink you goin come rich
Wen you presha out peopo
Fo give you money,
O wen you bus um up
Cuz dey no give you money,
O wen you rip off dea stuffs.
An if bumbye you get plenny money,
No tink dass da mos importan ting.
11 God tell dis one time,
An I hear dis even moa:
God, da ony one
Dat get powa fo real kine.
12 Eh, my Boss, you God!
An you da ony one
Dat stay tight
Wit yoa peopo fo real kine!
You pay erybody
Fo wateva dey wen do.