81
Lissen Wat God Tell We Gotta Do
Fo da main music guy sing um wit da kine harp dey make Gat side. One Asaf kine song
1 Yell fo oua God,
Cuz you stay good inside
An him da One make us guys strong!
Make big noise fo God,
Da one oua ancesta guy Jacob
Wen pray to!
2 Start one song, bang da tammorine!
Play da small harp dat soun nice,
An da ten string one too!
3 Wen da month start, da new moon time,
Blow da sheep horn trumpets!
Same ting
Fo oua spesho religious kine ceremony
Wen da moon come full!
4 Cuz dass one rule fo us Israel peopo.
Da God dat Jacob wen pray to,
He tell us fo make
Dat kine religious kine ceremony.
5 Da time God wen go
Agains da Egypt peopo,
He wen tell da ones
Dat come from Joseph
Wat dey suppose to do.
I wen hear one voice
Dat I neva know who dat.
Da voice tell:
6 “I wen take off da heavy load
From yoa back,
An I take da basket a bricks
From yoa hands too!
7 Wen you was presha out,
You wen yell to me fo help you.
An I wen get you outa trouble.
I was dea, but you neva see me,
I stay hide in da middo
A da thunda cloud.
An you wen call,
An I wen do plenny fo you.
Den, Meribah side,
Da place wea no mo watta,
I wen tes you
Fo find out
If you goin trus me, o wat.
(Time out fo da music.)
8 “Eh! You my peopo!
Lissen, cuz I stay tell you,
You betta watch out!
I wen like you Israel peopo
Lissen to me, but you neva!
9 You betta not pray to odda gods
Dat not fo you,
You betta not go down
In front odda gods from odda places.
10 Me, Da One In Charge,
Da God dat wen bring you hea
Outa da Egypt land.
If you stay ready fo take
Wat I like give you,
I goin give you plenny!
Jalike you open yoa mout fo eat
An I give you plenny food!
11 “But my peopo, dey no like lissen
Wat I tell.
Da Israel peopo neva like do
Wat I tell um fo do.
12 Me, I let dem do wat dey goin do
Cuz dey hard head
An dey ony like do
Wateva dey tink good fo dem.
13 Bummahs! I like
Fo my peopo lissen me,
But dey no lissen!
I like fo da Israel peopo do tings
Da way I do um!
14 If dey lissen,
Real fas, I can make um
So da ones dat stay agains dem
No mo powa no moa.
But my peopo no lissen.
Dass why I no bus up
Da peopo dat like fight dem.
15 If my peopo lissen,
Den da ones dat hate me,
Da One In Charge,
Goin fall down cuz dey sked a me,
An I goin punish dem foeva.
But my peopo no lissen,
Az why all dat no happen!
16 If you lissen,
I can give you
Da bestes kine wheat fo eat
An give you plenny honey
From da big rock,
Fo fill you up.
But you no lissen!”