82
God, Da Judge Fo Da Odda Gods
One Asaf kine Song Fo God
1 God, he sit on top his throne
An all da odda “gods”
Come togedda by him
Cuz he da One dat judge all dem.
He tell:
2 “Eh you guys!
No do wass not right no moa
Wen you judge yoa peopo!
No make nice no moa
To da peopo dat do bad kine stuff!
(Time out fo da music.)
3 “Wen you guys judge da peopo
Dat nobody like help
An da kids
Dat no mo faddah-muddah guys,
Do da right ting fo da ones
Dat odda peopo tink
Dey not importan,
An da ones dat no mo notting!
4 Make shua nobody hurt
Da peopo dat nobody like help
An da ones dat get real hard time!
Make shua da bad guys
No goin get powa ova dem!
5 “Dem odda ‘gods,’ da ones in charge,
Dey donno notting!
Dey no undastan notting!
Any place dey go, bad tings happen
Jalike inside one dark place!
Eryting dat make da world solid
Stay shaking cuz a dem!”
6 God tell: “Me, I wen tell dis awready:
You guys, peopo tink you ‘gods.’
All you guys, litto bit like me,
Da God Dass Mo Importan
Den All You Odda ‘Gods.’
7 But fo shua, you guys goin mahke
Jalike peopo!
You goin fall down mahke
Jalike even da alii guys mahke!”
Dass wat God tell.
8 Kay den, God! Go fo broke!
Go be da judge
Fo all da peopo inside da world!
All da diffren peopos, dey yoas!