6
Si Jesus, pinekan to sota dimen dibon too
1 Idi enshiy bayag to, si Jesus, bimaliw shima baybay shi Galilia, ono sota kowan sha ey Tibirias, jet dimaw nodta shemang to.
2 Jet eshakel la pasiyay toon imonod son si‐kato, ta inon‐an sha sota kaskasshaaw wa dingka to, ni inmapteng ira nonta emanpansekit.
3 Si Jesus, inodop to iray too to, jet timiyed ira shima shontog, ja kowan to ey itod‐an to ired man.
4 Nontan na timpo, shanshani ma sota piyasta ni Hodiyos ja kowan sha ey Paskowa.
5 Idi ẃimingi si Jesus, inon‐an to ali ira sota eshakel la toon emandaw son si‐kato, jet kowan to ey, “Felipe, toway pengal‐an ni mekan ja on‐anay ya kenen ira niman na totoo?”
6 (Si Jesus, piyan ton peshasen bengat si Felipe, no ngantoy isongbat to, isonga inkowan to iyay. Nem si Jesus, amta to mangon shagos i pesing ton memekan nonta ira totoo.)
7 Jet si Felipe, simongbat ja kowan to ey, “Sajay ya karakel sha, angken pigen dasos i itongkal tayo ni tinapay, eg pay on‐anay son si‐kara, angken ko‐ko‐tiken tayo.”
8 Waray sakey nodta too nen Jesus ja si Andres i ngaran to ja agi nen Simon Pedro; kowan to ey,
9 “Waray sakey shiyay ya balodaki so nonta ira totoo, ja nanbalon ni dimen boknol la tinapay, tan showen piskaw. Nem enshi met i silbi to, ta eg met laeng on‐anay so ira niya eshakel la totoo.”
10 Jet si Jesus, inkowan to so nonta ira too to ey, “Patongaw jo ira ja totoo.”
Jet sota ira totoo, timanongaw ira nodta paway, jet say kabebilang ira nonta daleki, dimen dibo, powiray bibii tan a‐anak.
11 Jet nontan ma, si Jesus inda to sota tinapay tan sota piskaw wa balon nonta balodaki jet nan‐iyaman son Apo Shiyos, asan toka paiweshis sota mekan na shimakel so nonta ira totoo ja timanongaw. Jet sota ira totoo, engan ira ingkatod enapsel iren kosto.
12 Idi enaksheng ma ira sota totoo ja engan, inkowan nen Jesus so nonta ira too to ey, “Sa‐nop jo sota ira sobden tinapay, say enshiy en onkawas.”
13 Jet sina‐nop sha sota ebay‐an na eg sha kinan nodta dimen tinapay ja inpara‐kel nen Jesus. Jet say na‐olnongan nonta sobdara, sampolo tan showen baskit ja nankepno.
14 Sota ira totoo, idi inon‐an sha iyay ya dingka nen Jesus, ja inpara‐kel to sota mekan, nasshaaw ira, jet kowan sha ey, “Kinapodpodno to ey sajay sota para padto ja inpadtora nonta bayag da ey ondaw alid ja dobong.”
15 Si Jesus, amta toy ẃared nemnem ira niyay ya too, ey piditen shen si‐katoy panbedin shen ari sha; isonga si Jesus, indekjas to ira, jet dimaw ja abos to nodta nayda‐med den shontog.
Nan‐akad si Jesus nodta tapew ni shanom
16 Idi mama‐shem mala, sota ira too nen Jesus, enalong ira nodta kad‐an da ni baybay,
17 jet ira nandogan shi bangka, ta on‐oli ired Kapirnaom. Nem edabi mala ey eg pay laeng simabi si Jesus shi kadnan sha.
18 Jet nontan, sota shadoyon ni baybay, makedsang nga pasiya tep emansheshagem ma pasiya.
19 Idi ẃaray enem emon kilomitro ja nan‐akshan da nonta bangka ja nandoganan nonta ira too nen Jesus, inon‐an sha si Jesus ja eman‐ekad ali nodta naytapew ni shanom ja eman‐a‐sop son si‐kara, jet naykel‐eẃan iren pasiya.
20 Nem si Jesus, kowan to son si‐kara ey, “Karekayo ontakot, tep si‐kak iyay!”
21 Jet nay‐imdengan ira sota too to, jet inpandogan sha si Jesus nodta bangka. Jet mimotok iren shagos nodta dogad ja daẃan sha.
Sota ira totoo, sha inenap si Jesus
22-24 Nonta na mama‐shem, sota ira eshakel la totoo, inon‐an shay inda‐jat nonta ira too nen Jesus jet inon‐an shen enshis Jesus ja ekilokan nodtan. Isonga singked sha si Jesus nodta kawad‐an shen nay‐esop nodta enganan sha ni tinapay nonta naksheng nga nan‐iyaman si Jesus son Apo Shiyos. Kowan sha ey ẃares Jesus pay laeng nodtan na dogad, ta sakey bengat nonta bangka ja nandoganan ni too nen Jesus, enshiy eshom. Nem idi eẃa‐ẃa, enshi met gayam si Jesus. Isonga idi ẃara iray simalsheng nga bangken edapod Tibirias nodta kad‐an sha, nandogan ngo ira ja en mengenap son Jesus shi Kapirnaom.
Si Jesus, si‐kato sota may‐eshig ey tinapay ya mengi‐kan ni biyag
25 Jet sota ira totoo, simbira si Jesus nodta naybaliw jet kowan sha ey, “Apo, pigan aliy indaw mod jay?”
26 Si Jesus, simongbat ja kowan to ey, “Kinapodpodno iya ikowan ko son si‐kayo. Amtak ey jowakka en‐enapa ta engan kayo nontan ni tinapay, jet nanpesel kayon kosto; aliẃen sota kaskasshaaw wa dingkak i jowaksoka en‐enapi so.
27 Aliẃa komen sota mekan i jo kamkamkaman, ta say mekan, ema‐bos. Isonga say kamkaman jo koma ja jo enapen, sota may‐eshig ey mekan ja mengi‐kan ni biyag ja enshiy to engintegan. Sajay ya mekan na naka pan‐ikowan, sota kowan sha ey Anak ni Too, si‐kato i mengi‐kan son si‐kayo. Say ka‐amta‐an to ey ẃaray in‐akan nen Apo Shiyos ja kanebengan kon mengi‐kan ket inpa‐sas to ey towakka kosto‐i.”
28 Jet sota ira totoo, kowan sha son Jesus ey, “Ngarantoy kowan mo ey pesing mi ja mandeka ni kekosto‐i nen Apo Shiyos?”
29 Si Jesus, simongbat ja kowan to ey, “Sajay i piyan nen Apo Shiyos ja dag‐en jo: pamati kayo son si‐kak, ta si‐kak i inbetkag to ali.”
30 Nem sota ira totoo, kowan sha ey, “Ngaranto ngarod i ipa‐sas mo pay son si‐kami, say pati‐en mika? Ngantoy dag‐en mo ja inges toy dingka nen Moises nonta bayag da?
31 Ta sota ira appo tayo da, engan ira nonta tinapay ya kowan sha ey mana ja edapod dangit nonta ẃara ira nodta dogad ja nan‐ak‐akshan sha ja enshiy balbaley. Sajay i kowan nonta esel nen Apo Shiyos ja naysolat, ja kowan to ey, ‘In‐aknan nen Moises ira ni tinapay ja edapod dangit.’ ”
32 Si Jesus, simongbat ja kowan to ey, “Kinapodpodno iya ikowan ko son si‐kayo. Sota tinapay ya kinan sha, ja edapod dangit, si Apo Shiyos ja Amak i engi‐kan son si‐kara; aliẃen si Moises. Jet si Amak met laeng i emengi‐kan ni koston tinapay son si‐kayo ja medepod dangit.
33 Sota tinapay ya edapod dangit, ja in‐akan nen Apo Shiyos, si‐katoy emengi‐kan ni biyag ni tood ja dobong.”
34 Jet sota ira totoo, kowan sha ey, “Apo, aknim kami niman nita tinapay ya eg ma‐ma‐bos ingkatod ingka!”
35 Si Jesus, simongbat ja kowan to ey, “Si‐kak sota may‐eshig ey singa tinapay ya emengi‐kan ni biyag, jet sota ondaw ali son si‐kak ja memati, eg ma‐ekang, tan eg ma ma‐kew ni shanom.
36 Nem si‐kayo, angken inon‐an joy dingkak, eg kayo memati son si‐kak. Sajay, inkowan ko son si‐kayo nontan et inpinshowak mowan.
37 Sota ira i‐awat nen Amak son si‐kak, si‐karay memati son si‐kak, jet sajay ira ja ondaw ali son si‐kak, man‐imdengak ja mengeẃat son si‐kara.
38 Ta si‐kak, edapo‐ak alid dangit, jet say obda‐en ko bengat, sota piyan nonta engibetkag son si‐kak; aliẃen sota piyan ko.
39 Jet say piyan nonta engibetkag son si‐kak ja dag‐en ko, emin ira sota toon in‐awat to son si‐kak, ja emati, isingpet ko iren emin, jet shi ka‐onoran alin akew, panbiyag ko ali ira shi patey.
40 Say piyan pay nen Amak, emin ira sota toon eẃatan toy maypangkep son si‐kak, jet memati, may‐aknan ira ni biyag ja enshiy to engintegan, tan panbiyag ko ira di shi ka‐onoran na akew.” Kowan nen Jesus.
41 Waray eshom nodta Hodiyos ja eg makakosto son Jesus; idi inteneng sha sota kowan nen Jesus ey si‐kato sota tinapay ja edapod dangit, ireka mankotot,
42 ja kowan sha ey, “Sajay met si Jesus; amta tayo met iray maka‐anak son si‐kato! Angsan i to ikowan ey si‐kato ket edapod dangit.”
43 Jet si Jesus, kowan to son si‐kara ey, “Aliẃen kayo koma onkotot ni maypangkep niya inkowan ko la.
44 Angken sipa, enshiy en ondaw ali son si‐kak ja memati, no si Amak ja engibetkag son si‐kak ket eg to pannemnem sotan na too ja ondaw ali son si‐kak ja memati. Jet sota toon memati son si‐kak, panbiyag ko ali shi patey shi ka‐onoran na akew.
45 Jet angken nonta bayag da, ẃaray naysolat ja inkowan ira nonta para padto, ja kowan sha ey, ‘Emin na too, tod‐an ira nen Apo Shiyos.’ Sajay i inkowan ni para padto, jet sota metod‐an tan mengitneng son Amak, si‐karay ondaw ali ja memati son si‐kak.
46 Angken sipa, enshiy engasas son Apo Shiyos ja Amak, no diket si‐kak bengat, ta si‐kak, say edapo‐an ko, si‐kato; isonga inon‐an ko.
47 Kinapodpodno iya inkowan ko son si‐kayo. Sota memati son si‐kak, may‐aknan ni biyag ja enshiy to engintegan.
48 Si‐kak sota may‐eshig ey tinapay ya mengi‐kan ni biyag.
49 Agpayso ita kowan jo ey sota appoyo da, engan ira nonta tinapay ya kowan sha ey mana shima dogad ja nan‐ak‐akshan sha ja ayshiy balbaley. Nem iso met laeng nga etey ira.
50 Nem saja tinapay ya naka pan‐ikowan son si‐kayo niman, mismon edapo alid dangit, jet sota ira mengan so niyay, eg ira metey ingkatod ingka.
51 Si‐kak sota mismon tinapay ya sibibiyag ja edapod dangit, jet sota mengan so niyay ya tinapay, may‐aknan ni biyag ja enshiy to engintegan. Jet sota kowan ko ey tinapay, si‐kato iya bakdang ko ja i‐akan ko para so ni totood ja dobong say meẃad‐an ira ni biyag.” Sajay i kowan nen Jesus.
52 Nonta intenengan shay inkowan nen Jesus, nansosongbat ira sota kimotot nonta ekay da, ja kowan sha ey, “Toway pesing to konon mengi‐kan ni bakdang to son si‐katejo, ja kenen tayo?”
53 Isonga si Jesus, kowan to son si‐kara ey, “Kinapodpodno iya ikowan ko son si‐kayo. No eg jo kenen iya bakdang ko, tan eg jo inomen sota shalak, enshi son si‐kayo i biyag.
54 Jet sota mengan niya daman ko, tan menginom niya shalak, si‐karay may‐aknan ni biyag ja enshiy to engintegan, jet panbiyag ko ira di shi ka‐onoran alin akew.
55 Ta saja daman ko, tan saja shalak, si‐katoy agpayson emengi‐kan ni biyag ni too.
56 Jet sota mengan niya daman ko, tan menginom niya shalak, si‐karay ẃara son si‐kak, jet si‐kak, ẃara‐ak ngo ni olay son si‐kara.
57 Si Amak ja engibetkag son si‐kak, si‐katoy kedepo‐i ni biyag; isonga ẃara ngo son si‐kak i biyag. Jet sota mengan ni daman ko, i‐aknan ko ngo ni biyag.
58 Si‐kak sota tinapay ya mismon edapod dangit, jet si‐kak, aliẃen inges ko sota tinapay ya kinan ira nonta appo tayo da shima dogad ja nan‐ak‐akshan sha ja enshiy balbaley, ta etey met laeng ira. Nem sota mengan niya tinapay ya naka pan‐ikowan niman, ja si‐kato iya bakdang ko, si‐karay may‐aknan ni biyag ja enshiy to engintegan.”
59 Sajay i inkowan nen Jesus nonta inpantoro to shima sa‐nopan ira ni Hodiyos shi Kapirnaom.
60 Jet eshakel so nonta ira too nen Jesus i eg makakosto niyay. Idi itenengan sha iyay ya toro to, kowan sha ey, “Polibas ira jay ya toro to. Enshi emoy makabaal la on‐awat so!”
61 Enshiy engikowan son Jesus ey sajay i shaka pankototi, nem amta toy ẃared nemnem sha; isonga inkowan to ey, “Sota inkowan ko la, si‐katoy kabol ni eg jo ma pati‐an son si‐kak?
62 No bilang ey asen jowakka emankedjang ja on‐olid dangit, ikotot jowak pay laeng ngata?
63 Say emengi‐kan ni biyag ni bakdang, sota jasjas to. No eg onjasjas, enshiy silbi ni bakdang. Sajay i kay‐eshigan ni inkowan ko, ta emengi‐kan ngo ni biyag.
64 Nem amtak ey ẃara son si‐kayoy eg memati son si‐kak.” Kowan nen Jesus. (Sajay i inkowan nen Jesus, ta sigod ja amta to sota ira totoon eg memati, tan amta to sota toon mengibaag son si‐kato ali so nonta toon makakontra son si‐kato.)
65 Tan say kowan to pay, “Isonga inkowan ko son si‐kayo ey, angken sipa, enshiy en ondaw ali son si‐kak ja memati, no si Apo Shiyos ja Amak ket eg to pannemnem ira ja ondaw ali son si‐kak.”
66 Idi naksheng ma ja inkowan nen Jesus iyay, eshakel nodta ira istay too to i eg timoloy ja meki‐odo‐odop son si‐kato.
67 Jet si Jesus, kowan to so nonta ira sampolo tan showa ja apostol to ey, “Si‐kayo ngay? Piyan jo ngon maysi‐jan son si‐kak?”
68 Jet si Simon Pedro, simongbat ja kowan to ey, “Sipa ngay i daẃan min eshom no aliẃen si‐kam? Ket si‐kam bengat i kawad‐an ni esel ja emengi‐kan ni biyag ja enshiy to engintegan,
69 jet kamika memati son si‐kam, ta amta mi ey si‐kam sota shinotokan nen Apo Shiyos ja inbetkag to did ja dobong.”
70 Jet si Jesus, simongbat ja kowan to ey, “Say pinidik, sampolo tan showa, nem ẃaray sakey son si‐kayo ja dimonyo.”
71 (Sajay i inkowan nen Jesus, ta si Judas ja anak nen Simon Iskariote ja sakey nodta sampolo tan showen apostol to, si‐kato aliy mengibaag son Jesus so nonta ira toon makakontra son Jesus.)