7
Si Jesus, tan sota ira a‐aki to, ira ekipiyasta
1 Idi enshiy bayag to, shi Galilia bengat i nan‐ak‐akshan nen Jesus, ta eg to kosto ja manshedan shi Jodia, ta sota ira pangolo ni Hodiyos shiman, piyan shen bono‐en si Jesus.
2 Jet nontan na timpo, shanshani ma sota piyasta ni Hodiyos ja kowan sha ey piyasta ni Kampo.
3 Jet sota a‐aki nen Jesus, kowan sha son si‐kato ey, “Ilekjas mo iyay ya dogad, jet daw ka shi Jodia, say asen ira nonta emati son si‐kam shiman sota ira moka dagdag‐a ja kaskasshaaw.
4 Say too, ja piyan ton amta‐en ni karakdan, aliẃen to en i‐emot i dag‐en to, no diket dag‐en tod karakdan ni too, say asen ni emin na tood ja dobong.”
5 (Sajay i inkowan ira nonta a‐aki to, tep nontan, angken si‐kara, eg sha nin pinati si Jesus.)
6 Jet si Jesus, simongbat ja kowan to son si‐kara ey, “Si‐kak, aneng nin sota timpon pengipa‐sas ko ni maypangkep son si‐kak. Nem si‐kayo, angken bina‐ngatan mangoy dag‐anan jo so ni piyan jon dag‐en, angken ngaranton akew.
7 Si‐kayo, aliẃen kontra shakejo niya tood ja dobong, nem si‐kak, kontra sha‐ak, tep naka pan‐ikowan son si‐kara sota ngaaw wa aramid sha.
8 Daw kayo mango shima piyasta, nem si‐kak, ekak nin ondaw ta aneng sota koston timpok.”
9 Sajay i inkowan nen Jesus son si‐kara, jet ebay‐an mango nin shi Galilia; eg ekidaw son si‐kara.
10 Idi enaksheng den dimaw ira sota a‐aki to nodta piyasta, timened si Jesus son si‐kara ni abos to, ja enshiy maka‐amta.
11 Jet nonta marama sota piyasta, pan‐enapa ira nonta pangolo ni Hodiyos si Jesus, jet shaka ibagabaga nem ẃaray engasas son si‐kato.
12 Jet nontan na timpon piyasta, ẃaray toon na‐olnong, jet say kowan ira nonta eshom, kowan sha ey, “Mapteng i ogadi nen Jesus.”
Nem sota ira eshom son si‐kara, kowan sha ey, “Enshi, si‐katoy kaon‐awis so ni toon mandeka ni ngaaw.”
13 Nem sajay iren too, eg sha inkowan shi karakdan i maypangkep son Jesus, tep entakot ira so nonta pangolo ni Hodiyos.
Nantoro si Jesus shima Timplo
14 Idi nankawa ma sota piyasta, dimaw si Jesus shima Timplo jet en nantoro so nonta ira totoo.
15 Jet sota ira eshom ma pangolo ni Hodiyos, ja engitneng ni inkowan nen Jesus, ireka messhaaw, jet kowan sha ey, “Toway inpasing niyay ya toon dimaing, ey ootik met i ashal to?”
16 Idi intenengan nen Jesus iyay ya inkowan ira nonta pangolo ni Hodiyos, simongbat ja kowan to ey, “Saja naka pan‐itoro, aliẃen na mismon edapod nemnem ko, no diket sajay i kowan nonta engibetkag son si‐kak.
17 Jet sota toon piyan ton onoren i kowan nen Apo Shiyos, idasin to no sipay edapo‐an niyay ya naka pan‐ikowan — no nemnem ko, ono si Apo Shiyos i edapo‐an to.
18 Sota toon say toka pan‐itoro ket sota maypangkep met laeng ni bakdang to, say ẃared nemnem to bengat, sota kayshedjaw to shorog. Nem sota toon say ẃara son si‐kato ket sota kayshedjawan nen Apo Shiyos ja engibetkag son si‐kato, enshiy kolang ni toka ikowan; podnon emin.” Kowan nen Jesus.
19 Idi enaksheng iyay ya inkowan nen Jesus, kowan to so nonta ira pangolo ni Hodiyos ey, “Sota dinteg nen Moises, ẃara son si‐kayo ja joka ad‐ashala, nem angken sakey son si‐kayo, enshiy emati nontan na dinteg nen Moises, ta no ẃara koma, apay nga kowan jo ey bono‐en jowak?”
20 Jet sota ira totoo, simongbat ira ja kowan sha ey, “Kaka man‐engaw! Sipay engikowan ey bono‐en shaka?”
21 Jet si Jesus, simongbat ja kowan to ey, “Nonta pinsak, ẃaray inpamapteng kon emansekit nonta akew ni ngilin, jet nontan, kayoka emesshaaw, no apay nga dingkak sotan.
22 Say sakey ya dinteg ja in‐akan nen Moises, ja tineẃid to so nonta appo to la, sota kowan tayo ey kogit, jet sajay, angken na akew ni ngilin, joka pandag‐a say metongpal sotan na dinteg.
23 Jet no timpo ni ngilin joka pandag‐a iyay ya kogit, say eg koma mesheshal i dinteg pangkep ni kogit, apay nga no ẃara mangoy dag‐en ko ja panmaptengan ni toon emansekit ni akew ni ngilin ket kayoka onbonget?
24 Aliẃen jo iba‐ngat ey ngaawak pangkep nonta inon‐an jon dingkak, no diket nemnem jo koma sota dingkak ja panmaptengan ni too.”
Pantatabali nonta ira totoo no si Jesus sota naypadton mengisedakan ali
25 Sota eshom ma tood Jerusalem, idi intenengan sha iyay ya inkowan nen Jesus, kowan sha ey, “Sajay met sota toon kowan ira nonta pangolo tayo ey bono‐en sha ja shaka en‐enapa?
26 Iyay met gayam shiyay ya emantosho shi karakdan ni too, jet apay nga eg sha met a‐degken? Sigosho ireka emo memati ma ey si‐kato sota naypadton mengisedakan ali ja ibetkag nen Apo Shiyos.
27 Nem say naypadto met ket sota toon ibetkag ali nen Apo Shiyos, angken sipa, enshiy maka‐amta ni kedepo‐an to. Nem sajay ya too, amta tayo met i edapo‐an to.”
28 Isonga si Jesus, nonta ẃared ma Timplo ja emantosho, inkedsang toy esel to ja kowan to ey, “Say kowan jo, amtayowak, tan amtayoy edapo‐an ko. Nem aliẃen nemnem koy dinaẃan ko did jay, no diket ẃaray engibetkag son si‐kak, ja si Apo Shiyos ja kedepo‐i ni podno. Jet eg jo amtes Apo Shiyos.
29 Nem si‐kak, amtak ta edapo‐ak son si‐kato, jet si‐katoy engibetkag ali son si‐kak ja ondaw alid ja dobong.”
30 Idi enaksheng nga inkowan to iyay son si‐kara, piyan sha ma ja a‐shelen si Jesus, nem enshiy angken sakey ya engitodoy, ta aneng nin sota timpon naykesheng nga pandikat to.
31 Nem sota eshakel la too, ẃara ngoy eshakel la emati so nen Jesus, jet say kowan sha, “Enshiy eshom ma toon tayoka sesseskesha ja ibetkag ali nen Apo Shiyos. Si‐kato iyay ya too, ta no bilang ey ẃaray ondaw ali ja eshom, eg to ingesen i dingdingka niyay ya too.”
Sota ira kowadja, dimaw ira ja istay mengshel son Jesus
32 Sota ira Parisiyo, intenengan sha iyay ya inkowan ira nonta totoo pangkep son Jesus jet sajay iren Parisiyo, tan sota ira apo ni papashi, engibetkag ira ni kowadja ja en mengshel so nen Jesus.
33 Nem si Jesus, amta toy ẃared nemnem sha, jet kowan to so nonta ira toon eshakel ja esa‐nop ey, “Say kawashak son si‐kayo, entikey ya timpo. On‐oli‐ak ka shagos so nonta engibetkag son si‐kak alid ja dobong.
34 Jet en‐enapen jowak no toway dinaẃan ko, nem eg jowak sepolen. Jet shima daẃan ko, eg mebedin na on‐onod kayo son si‐kak.”
35 Jet sota pangolo ni Hodiyos, idi intenengan sha iyay ya inkowan nen Jesus, kowan sha ey, “Towa konoy dogad ja daẃan to? Ampet siya ey, ondaw shima dogad ja nay‐araẃi ja nayẃarisan ira nonta kait tayon Hodiyos, jet mengitoshod man so nonta ira aliẃen Hodiyos. Jet mebedin noman na eg tayo ma on‐an.
36 Apay nga kowan to ey tayo en‐enapen nem eg tayo sepolen? Tan shima daẃan to kono, eg tayo mebedin na onoren. Ngaranto emoy piyan ton a‐selen?”
Si Jesus, ẃaray inkowan to nonta ka‐onoran na akew ni piyasta
37 Sota ka‐onoran na akew ni piyasta ni Hodiyos, si‐katoy kapatkan son si‐kara, jet nontan na akew, imetan si Jesus shi sango‐an ira nonta eshakel la too jet inkedsang toy esel to ja kowan to ey, “No sipa ira sota na‐kew ni shanom, ondaw ira di son si‐kak jet man‐inom ira.
38 Ta say kowan ni esel nen Apo Shiyos ja naysolat nonta bayag da, kowan to ey, ‘Sota memati son si‐kak, may‐eshig ey ẃara ni olay son si‐kato sota shanom ja singa temtem ja eg ma‐ti‐an.’ ”
39 (Sajay ya inkowan nen Jesus, piyan ton ikowan ey si‐katoy kedepo‐an nonta Ispirito Santo nen Apo Shiyos ja eẃaten ira di nonta memati son si‐kato. Nem aneng nin, ta mesepol la metey si Jesus, jet manbiyag mowan. Ondaw pay shi dangit, asan toka i‐eẃat ma sota Ispirito Santo.)
Sota ira totoo, nanshowa ira ja eg man‐inawatan
40 Idi intenengan ira nonta totoo iyay ya inkowan nen Jesus, kowan ira nonta eshom ey, “Siya, sajay nga agpayso sota para padto ja tayoka sesseskesha.”
41 Jet angken sota ira eshom, kowan sha ey, “Sajay nga agpayso sota naypadton mengisedakan ja ibetkag ali nen Apo Shiyos.”
Nem sota ira eshom, kowan sha ey, “No si‐kato sota naypadton mengisedakan ja ibetkag ali nen Apo Shiyos ket aliẃen shi Galilia komay edapo‐an to,
42 ta say kowan ni para padto nonta bayag da, sota mengisedakan ja ibetkag ali nen Apo Shiyos ket mandepo kono shi poli nen Ari David, tan shi Bitlihim kono pay i kedepo‐an to, ta si‐katoy ili nen Ari David.” (Sajay i kowan sha ta say pangkep sha, nay‐anak si Jesus shi Galilia.)
43 Isonga nontan ma, eg nan‐i‐inges i kowan ni totoo.
44 Jet sota ira eshom, piyan shen a‐shelen si Jesus, nem enshiy mengshel son si‐kato.
Sota ira pangolo ni Hodiyos, eg ira memati son Jesus
45 Sota kowadja ja istay en mengshel son Jesus, nay‐oli ira so nonta engibetkag son si‐kara ja Parisiyo, tan apo ni papashi, jet kowan ira niyay so nonta ira kowadja ey, “Apay nga eg jo di inshel?”
46 Sota ira kowadja, simongbat ira ja kowan sha ey, “Angken sipen too, enshiy mi inon‐an ja inges toy kepantosho niyay ya too.”
47 Jet sota ira Parisiyo, kowan sha ey, “No kasta, angken si‐kayo, imonod kayo so nonta kowan to ja o‐owap?
48 Emin na pangolo jo, tan angken si‐kamin Parisiyo, angken sakey son si‐kami, enshiy en imonod son si‐kato.
49 Sota ira toon imonod son si‐kato, eg sha amtay dinteg nen Moises, nem angkena, ta meshosa met laeng ira.”
50-51 Jet si Nikodimo, sakey so ira nonta Parisiyo nodtan. Si‐kato sota dimaw son Jesus nontan da; isonga si‐katoy simongbat ja kowan to ey, “Say ẃared dinteg tayo, eg mebedin na mayba‐ngat i pengigsheng no nanbasol i sakey ya too ono enshi, no eg nin mebistigal no ngantoy basol to.”
52 Nem sinongbatan sha et si Nikodimo ja kowan sha ey, “Apay nga moka pan‐ibaliẃi? Sakey ka gayam ma kaidiyan ton i‐Galilia? Basam kari sota inpaisolat nen Apo Shiyos nonta bayag da: amta‐en mo ey enshiy para padton mandepod Galilia.” Sajay i inkowan sha son Nikodimo.
53 Jet sajay iren esa‐nop, nansisi‐jan iren imakad shi baley sha.