8
Sota maykepiton naybedbed shi papil, inokas nonta Kalniro id san kejanget sota enem ma trompita
1 Idi inokas nonta Kalniro sota maykepiton bedbed, enshiy en imes‐esel nin shi dangit ni kagoshowen oras.
2 Jet idi epospos ma iyay, inon‐an ko sota piton anghil ja ẃared ma sango‐an nen Apo Shiyos, ja nay‐aknan ira ni piton trompita.
3 Jet ẃaray sakey ya anghil ja dimaw ali nodta altar ja engegni ni malokong nga balitok ja shaka pemooli nonta kowan sha ey insinso. Jet in‐aknan sha ni eshakel la insinso ja kowan sha ey idaok to nodta shawat ira nonta emin na emati son Apo Shiyos nodta altar ja ebalitokan. Wara iyay nodta sango‐an nonta naykawen tongawan.
4 Sota asok nonta insinso, ja takshol nonta shawat ira nonta emin na emati, dimowet nodta inegni‐an ni anghil shi sango‐an nen Apo Shiyos.
5 Jet sota anghil, inda to sota kepemooli ni insinso et pinno to ni apoy ya edapo nodta altar asan toka ikespig shi dobong. Jet nontan, ẃaray intenengan kon makedsang nga kirol, tan bongog, jet ẃara pay i bagidat tan jegjeg.
6 Jet nontan ma sota piton anghil ja na‐peng ni sanseskey ya trompita, esagana ira ja pejenget sota trompita sha.
7 Sota pilmiron anghil, inpayanget to sota trompita to et inon‐an kon nandanti la ni kakembaleg, tan ẃara pay i apoy ja etaksholan ni shala ja na‐kas da shi dobong. Jet sota inkatdon sakop ni dobong, tan sota inkatdon kawad‐an ira ni kadasan, tan emin na angken nganton edet, epoolan.
8 Sota maykadẃen anghil, inpayanget to sota trompita to et ẃaray singa shontog ja emanshedang ja naykespig da shima baybay,
9 jet sota inkatdon sakop ni baybay, nanbalin ni embalengen pasiya ja singa shala, jet sota inkatdon palsowa ja emanbibiyag nodtan na baybay, etey ira, jet angken sota ira inkatdon kabebilang ni bapor ja ẃared ma baybay, esharal.
10 Sota maykatdon anghil, inpayanget to sota trompita to et sota sakey ya ebadeg ga talaw shima naykayang, na‐kas da shima dobong ja emanshedang ja singa silew. Jet nayponta so nonta ira inkatdon kabebilang ni pa‐dok, tan asolan.
11 Say ngaran nontan na talaw ja na‐kas da, kowan sha ey Toba et sota inkatdon shanom, etoba‐an et eshakel i toon etey.
12 Sota mayka‐pat ta anghil, inpayanget to sota trompita to et sota inkatdo so nonta sekit, bolan, tan sota ira inkatdon kabebilang ni talaw, simalsheng i niyal sha. Jet sota ka‐akawan tan kalebi‐an, na‐kal i inkatdon niyal nonta sekit tan bolan.
13 Jet idi onshemangak, ẃaray inon‐an kon ebadeg ga tolsho ja emantedjab shima kawa ni naykayang ja emankeljaw, ja kowan to ey, “Ka‐kaasi iren pasiya i nanbaley shi dobong, ta ẃara pay aliy tedon janget ni trompita ira nonta tedon anghil et shanshanin pejenget sha.”