9
Sota shoron ja menekit ni totoo
1 Jet sota maykedimen anghil, inpayanget to sota trompita to et ẃaray inon‐an kon edapod dangit ja singa talaw et nay‐awat son si‐kato sota tolbek ja mengilokat nonta osok ka ontorong shima nayshalem ma naybaloshan ni dimonyo.
2 Dinokatan to sotan na osok et dimowet alin pasiya ja inges to sota etoling nga asok ja emankedapo nodta ebadeg ga pogon, jet tinoding toy naykayang et eg ma‐sas sota akew.
3 Jet sotan na dowet ja edapo nodta osok, nay‐olop ali ira sota shoron et sotan iren shoron, naypalobos ja sekitan shay too, ja inges toy kamajan.
4 Naybilin son si‐kara ey baybay‐an sha ira sota edet, ono kompormin bimengis, ono kadasan shi dobong. Say sekitan sha bengat kono, sota ira totoo ja enshiy malka nen Apo Shiyos shi temok sha.
5 Naypalobos son si‐kara ey angken pedigaten sha ira sota totoo ni dimen bolan, nem eg naypalobos sa bono‐en sha ira. Jet say itsora ni shaka pesing nga memedigat ira nonta totoo, inges toy sakit ni kalat ira nonta kamajan.
6 Jet nontan na timpo, sota ira totoo, kowan sha ey angken metey ma ira, nem ayshi, eg mebedin, angken ngantoy pesing sha.
7 Say itsora ira nonta shoron, singa kabajon para kobat. Jet sota toktok sha, singa ekorona‐an ni balitok et sota dopara, singa dopa ni too.
8 Sota bowek sha ngo, singa bowek ni bii et sota sangi sha, singa sangi ni lion.
9 Sota siksik sha, singa sota ka‐osala ni too ja danshok ka sa‐din ni pagew. Sota bongog ni payad sha, no ontayab ira, singa janget ni eshakel la kabajo ja engigojod ni dokanan ira nonta solsharon en mekikobat.
10 Sota ikol sha, singa kamajan et sotan i emenodid. Jet sotan na tolid, si‐katoy memedigat ni too ni dimen bolan.
11 Waray ari sha jet si‐kato sota anghil ja emanbantay nonta naybaloshan ni dimonyo. Say ngaran to shi esel ni Hodiyos, kowan sha ey Abadon et shi esel ni Grigo ngo, kowan sha ey si Apolyon.
12 Sota pilmiron pandikat ni tood dobong, enaksheng da, nem ẃara pay i showen digat ja onsabi ali son si‐kara mowan.
13 Sota mayka‐nem ma anghil, inpayanget to sota trompita to et ẃaray intenengan kon esel ja edapo nodta epat ta shogo nonta altar shima kad‐an nen Apo Shiyos,
14 ja kowan to so nonta mayka‐nem ma anghil ey, “Ibodos mo ira sota epat ta anghil ja naypagod shima kilig nima ebadeg ga pa‐dok ja kowan sha ey Yopratis.”
15 Jet sota epat ta anghil, naybolos ira ja memono ni inkatdon kabebilang ni tood dobong. Naysagana iren nanseked niya koston oras ja inkowan nen Apo Shiyos ja ibo‐day sha.
16 Say intenengan kon kabebilang ira nonta solsharon nankabajo ja pemono nonta ira anghil, showen dibon dasos ja dibo.
17 Jet sajay i itsora ira nonta kabajo tan sota ira nankabajo ni in‐asas ko so ja singa kokokip: Sota sa‐din ni pagew sha, say kolor to, singa apoy ya embalenga, tan singa ẃara pay i kowan sha ey blue tan yellow. Sota toktok nonta kabajo, singa lion et say emanbo‐day shi bongot sha, apoy, ja etaksholan ni asok tan asopri.
18 Jet nontan ma, sota inkatdon kabebilang ni tood dobong, binono nonta apoy, asok, tan asopri ja emanbo‐day nodta bongot ni kabajo.
19 Ta say pemono ira nonta kabajo so ni too, sota medepod bongot sha, tan sota ikol sha. Sota ikol sha, singa oleg, ja ẃaray toktok to et sajay i onsogat so nonta ira totoo.
20 Sota ira toon eg etey, ja engilesat niyay ya digat, eg sha pay laeng inbi‐jag sota shaka panshedjaw nonta dingkara met laeng nga sinan shiyos; ireka pay laeng emanshedjaw so nonta ira dimonyo, tan sota ira sinan shiyos ja balitok, palata, boronsi, bato, tan kiyew. Enshiy biyag iren jay ya sinan shiyos — eg man‐esas, eg mantetneng, eg man‐ekad. Nem sota ira totoo, ireka memasig ga manshedjaw so ira niyay.
21 Eg ira pay nanbebawi ni inpamonora ni kait shen too, ono sota shaka panmantala, ono sota shaka pemii, ono sota inpangibot sha.