10
1 Ya umat goh hinan un itang an ibahhawan an bahibahona nan ananomnoman ya nan a'e'gonan
an umat hinan natoy an lalog an pa'agubonay nabanglun lana.
2 Nan tagun nanomnoman ya hay ma"aphod di nomnomonah atona,
mu nun'appuhiy nomnomon nan manangpah hi atona.
3 Ma'immatunan di aat nan manangpah
ti mattig hinan panaldalanay aid di nomnomna.
4 Ya gulat ta bumungot nan ap'apuyun da'yu ya adi ayu bum'on ya nun'aan ayuh nan tamuyu
ti awniat aliwana nan nibahhawanyu.
5 Ya wada goh han nibahhaw an tinnig'u an gun aton nan a'alih tun luta
6 ti nan manangpah ya diday midatan hinan nabagtun haad,
ya nan adadangyan di midatan hi na'ampan haad.
7 Ya tinnig'u goh an nan tatagalay nuntakay hinan kabayu,
ya wan un dinalan nan a'ap'apu an ayda tatagala.
8 Ya nan munluhu' hinan bitu ya mid mapto' ya hiyay mabitu,
ya nan mama"ih nan allup ta way atonan humigup ya mid mapto' ya alaton nan ulog.
9 Ya nan tagun munho'tab hi batu ya hiyaat nin goh di magat'unan,
ya nan mangiha ya mid mapto' ya hiyay mahugatan hinan giniha.
10 Ya wa ay ta ngilu nan wahay at mahapul an pa"olton an mangigeto' ta gumiha,
mu nan nanomnoman ya haitona ya unna usalon.
11 Mi'id di hulbin nan mun'amuh nan ulog hi un nahhun an na'alat!
12 Nan tugun di nanomnoman ya hiyay dumalat hi a'e'gonana,
mu nan panapit nan manangpah ya hiyay mama"in hiya.
13 Ti wa ay ta humapit ya mid upid di hapihapitona
ta la'tot ya immipab'on.
14 Ya un nonongan himmapihapit an paddungnay inilanan amin di ma'at hi udum di algaw.
Mu undan way taguh nanginnilah ma'ma'at hi udum di algaw?
15 Ya higanan nan manangpah an muntamu,
ya ta"on un nan umanamutana ya agguyna inilay owona!
16 At hiyanan gulat ta hiyay mun'ap'apuh nan babluy at mahmo' nan tataguh di
ti un iyalgaw nan nun'abagtun u'upihyalna an mangamangan ya mangin'inum.
17 Mu mipadenol nan tataguh un nan mumpapto' ay dida ya nan lala'in imbaluy di nahamad di nitaguana,
ya inilan nan u'upihyalnay gutud di angananda ta way i'ilogda,
ya adida mumbutong.
18 Wa ay ta higanan tu'un muntamu
at la'tot ya muntudu,
at matu"in nan abung tu'u.
19 Nan behta ya nan bayah ya hiyanay umamlongan di tagu,
ya wada ay di pihhu ya mawadan amin hana.
20 Hay oha goh ya ta"on un hi nomnom unu hinan kuwaltu tu'u ya adi tu'u pihulon nan ali ya nan adangyan
ti mid mapto' ya waday manginnilah umuy mangibaag hinan ninomnom tu'u
an paddungnay donglon nan hamuti ta hiyay umuy mangibaag hinan tatagu.