9
An Amin di Logom ya hi Apo Dios di Okod
1 Inhamhamad'un ninomnonomnom di aat hatun amin an na'na'at, ya ininnila' an ta"on un nan nahamad di aatnan tagu ya nanomnoman, ya mi'id di iniladah ma'ma'at ay dida ti un anggay hi Apo Dios hi nanginnila.
2 Ti umat hina an, an amin di tagu an nahamad ya nan nappuhiy aatda, ya nan maphod ya nan nibahhaw di pangatda, ya nan tagun alyon di Uldin hi maleneh ya nan mibilang hi adi maleneh, ya nan mun'onong ya nan adi mun'onong ay Apo Dios ya numpapaddungda an agguyda inilay ma'at ay dida
an ta"on un nan nun'abaholan ya nan agguy,
ya nan munhapata ya nan adi.
3 Hiyah te nappuhih aat an amin di ma'ma'at hitun lutan napapaddung di ma'at ti nan tatagu ya nan nun'appuhiy nomnomnomondah tun ataguda an hay laylaydon di odolday ato'atonda, mu hay umangunuh ya mun'atoyda damdama.
4 Mu ad ugwan an atagu tu'u ya waday hahalimidon tu'u, at hiyanan on'onaynay matagu ya un nan natoy an umat hi a'on'onaynaan di matagun ahu ya un nan natoy an layon!
5 Nan mun'atagu ya inilada an matoydah udum di algaw,
mu nan nun'atoy ya mi'id ah inilada.
Ya mi'id goh di maphod hi ma'at ay dida,
at la'tot ya na'aliwanda.
6 At nan pamhodda, ya nan amabungotda, ya nan apalda ya mi'yubah ay dida,
at adida me'yat hinan malgom an ma'ma'at hitun luta.
7 At hay pohdon Apo Dios nongkay hi aton tu'uh tun luta
ya umamlong tu'un mangan ya uminum,
8 at munlubung tu'uh maphod,
ya munhugud tu'u.
9 Ya mun'am'amlong tu'un middum hinan ahawan pohpohdon tu'u ya anggay eten nahnot an naligat an nitaguan tu'u ti hiyah ne lagbu tu'un tumamutamu.
10 Ya an amin nan abalinan tu'un aton ya ilulud tu'un mangat ti awni ta matoy tu'u at adi tu'u muntamu, ya adi tu'u numanomnom, ya mid hulbin di la'eng ya ananomnoman tu'u!
11 Ya wada goh di udumnah na'innilaa' an ma'ma'at hitun luta
ti nan mungwilit an tumagtag ya bo'on dida ya anggay di gun mangabak,
ya nan mun'abi'ah ya bo'on dida ya anggay di gun mangabak hinan way gubat.
Ya nan nun'anomnoman ya bo'on dida ya anggay di waday tanudna,
ya adi an amin nan nanomnoman ya umadangyan.
Ya nan way adalna ya bo'on dida ya anggay di gun munhaad hinan nabagtun haad
ti waday gutud hi a'atan di nappuhi ya maphod hi an amin hinan tatagu.
12 Mi'id ah ohah nanginnilah un way ma'at ay hiya
an umat hinan ekan an ma'nah nan hidu',
unu umat hinan hamutin ma'nah nan hulu,
ya umat goh hinan tagun un himbumaggay ma'at hi nappuhin hiya.
13 Ya wada goh di nat'on an tinnig'un maphod hi pangipaddungan hi umatan nan anomnoman hitun luta
14 ti wada han ohan babluy an nahnotday nunhitun lini'ub nan tindalun nan ohan alin nidugah di abalinana, at nun'ammadah dalanonda ta hogponda.
15 Mu agguyda inila an heden babluy ya wah di han tagun nawotwot, mu nanomnoman. Ya hiyay nunnomnom hi inatdan nangibaliw eden babluy. Mu unat goh nalpah heden na'at ya inaliwanda hiya.
16 At inali' di, “On'onayna nan ananomnoman ya un nan amabi'ah!” Mu gulat ta nan nawotwot di nanomnoman ya adida e'gonan di hapitona!
17 Mu on'onaynah un nan tagun nanomnoman an ma'ulay di panapitnay unudon
ya un nan tagun nappuhiy pumpapto'nan un hay tumu'utu'u'.
18 On'onaynay ananomnoman ya un nan almas di mi'gubat
ti ta"on un ohay bahol ya abalinanan pa"ion nan do'ol an amaphod.