113
Hay Mikantah Pundayaw ay Apo Dios
1 Madayaw hi Apo Dios!
Da'yun baal Apo Dios ya dayawonyu Hiya,
ya dayawonyuy ngadana!
2 At dayawonyud ugwan nan ngadan Apo Dios an minaynayun hi enggana,
3 at mete"ah buhu'an di algaw ta engganah alimuhana
ya mahapul an dayawonyuh Apo Dios!
4 Hiyay Ap'apuh an amin hinan abablubabluy hitun luta,
ya paddungnay linauhan di anabagbagtunay ad abuniyan!
5 Mi'id ahan ah ohah umat ay Apo Dios an Dios tu'u!
Hiya ya wah din inumbun hinan pumpapto'anad abuniyan,
6 mu u'uhdunganad daya ya tun luta.
7 Ya badangana nan nun'awotwot ya nan munhapul hi badang
ta adida munnononnong hinan anawotwotda,
8 at idatana didah nabagtun haad ta mumbalindah a'ap'apun nan tataguna.
9 Ya hom'ona nan bahig an babai ta idatnay holagna ta umamlong.
Madayaw hi Apo Dios!