114
Hay Mikantah Panginomnoman hidin Nakakan nan Hudyuh ad Egypt
1 Hidin nakakan nan holag Israel ad Egypt an ni'babluyanda ta immanamutda
2 ya numbalinon Apo Dios ad Judah hi pundayawan ay Hiya,
ya pun'ap'apuwanad Israel.
3 Nan Mumbolah an Baybay ya paddungnay tinnignah Apo Dios, at nunhiyan,
ya nan danum hinan Wangwang an Jordan ya dimminong an umayuh.
4 Ya nan aduntuduntug ya ay paddungnay limmattu'da an umatdah nan buta'al an kalnilu,
ya nan dudunduntug ya paddungnay limmattu'da goh an umatdah nan uyaw an kalnilu.
5 Hay na'at ay he"an Mumbolah an Baybay, anaad ta nunhiyan'a?
Ya he"an Wangwang an Jordan, anaad ta dimminong'a an umayuh?
6 Ya da'yun atata'nang an duntug, anaad ta limmattu' ayu an umat ayuh nan buta'al an kalnilu?
Ya da'yun dudunduntug, anaad ta limmattu' ayu an umat ayuh nan uyaw an kalnilu?
7 He"an luta, umalyog'a an dumalat di ta'otmuh nan Ap'apu an Dios Jacob hidin aliana
8 an din nangipabuhu' hi danum hinan daplah
ta nawaday ginnaw ya lobong.