55
Hay Luwaluh Pun'adawan hi Badang Apo Dios
Heten psalm ya maskil an intudo' David, ya hay intud'ana ya nan ap'apun di muntudtuduh kanta. Ya mahapul an hay instrumenton way gadengnay tukalonyu.
1 O Apo Dios, donglom ni' tun luwalu' ta badangana',
2 at donglom ni' ta ehmo'ana' ti ten nidugah an numanomnoma'.
3 Ti ten tumata'ota' hinan pana'ta'atot nan buhul'u,
ya numanomnoma' hinan nun'appuhin gunda aton ay ha"in ti nidugah an aboholana' ahan.
4 Ya nidugah an ten umob'o'ob'ob di puhu' ti ini ya matoya',
5 ya nidugah di wumogwoga' hi ta'ot'u an ten lumungtuya'.
6 At ninomnom'un alyo' di,
“Un ni' unna' umat hi kalapati an waday paya'na
at tumayapa' ta umuya' mun'anap hi pun'eblaya'!
7 Ya umuya' hinan adagwin lugal ta mihinaa' hinan mapulun,
8 ya nunnaudo' an mun'anap hi ihi'uga' hi un way mabi'ah an puo' ya tuyup!”
9 Apu, guluwom nan buhul'u ta mid poto' di hapitonda
ti inila' an nan tataguh nan babluy ya nidugah an unda mumpapattoy ya mumbobohhol.
10 Ya abigabigat ya amahdomahdom ya gunda wanwanon nan allup di babluy,
ya wah diday pumanapattoy ya mumbobohhol.
11 Ya do'ol goh hidih nan babluy di gun mangamangat hi nappuhi,
ya do'ol di umipalewah ya bumalbalih nan way a'am'amungan nan tatagu.
12 Gulat ta nan buhul di mamahiw ay ha"in at edpol'u,
ya gulat goh ta nan buhul di mi'hongngel ay ha"in at ipo"oya' hiya.
13 Mu he"a ahan an nahamad an ligwa an ni'yi'ibba' di nangat,
14 ya nahamad di gunta dimmanudugwaan ya immanul'ulgudan,
ya gunta duwan gun immuy hinan Timplun Apo Dios an nundayaw.
15 Himbumagga ni' ya nun'atoy hanan buhul'u an ta"on unda matattagu ya nun'ilubu'da
ti nan nun'appuhi damdamay gunda ato'aton an ta"on un hinan numpunhituwanda.
16 Mu ha"in ya mumpabadanga' ay Apo Dios ta baliwana',
17 ya hinan helhelong, ya hinan tongan di algaw, ya hinan mahdom ya numpabadanga' ay Hiya,
at donglonay ibaga'.
18 Ya gunna' halimunan ta mid al'alin ha"in hinan nun'appuhin gun aton nan buhul'un ha"in
19 ti hi Apo Dios an mi'id pogpog di pumpapto'ana ya donglonay luwalu',
ya ipa'abakna dida ti adida hukatan nan nappuhin ugalida,
ya adida goh ta'tan Hiya.
20 Ya din imbilang'un nahamad an ligwa' ya numbalin an buhul'u
ti imbahhawna din nuntulaganmi.
21 Ya ma'ulay din panaphapitna an umat hinan middum hi ma'an, mu hay wah nomnomna ya un bumobohhol,
ya nan panugun ya umat hinan lana,
mu pumatoy an umat hinan matadom an hinalung.
22 At e'kodyuy ligatyun Apo Dios,
at halimunan da'yu,
ya adina ahan iyabulut nan tatagun nahamad di ugalidan ma'abakda.
23 Mu nan lumayalayah ya nan pumatopatoy hi tagu ya agagom di atayanda, Apo Dios,
ya nun'ipiyuymu didad imbelnu.
Mu ha"in ya He"ay pange'koda' hi nitagua'.