56
Hay Luwaluh Pangehdolan ay Apo Dios
Heten psalm ya mikitam an intudo' David an aat di naniliwan di iPhilistia ay hiyad Gath, ya hay intud'ana ya nan ap'apun di muntudtuduh kanta. Hay tunena ya “Hay Aat nan Kalapatih nan Niyadagwin Ayiw an Oak.”
(I Sam. 21:10-15)
1 Hom'ona' ni', Apo Dios, ti ten pohdon tun tatagun mangubah ay ha"in,
ya abigabigat ya unna' e'englan hinan buhul'u!
2 Ya iyal'algawdan mamihupihul ay ha"in,
ya do'olda ahan di mamohol ay ha"in!
3 Mu wa ay ta tuma'ota' ya He"ay pange'koda',
4 at hi Apo Dios an ipabagbagtu' di ehdol'u,
ya adia' tuma'ot hinan aton di tagun ha"in.
5 Inalgaw an nan hapito' di hahalepatandah un
way ibahhawa' ta pangiga'idandan mangat hi nappuhin ha"in.
6 Ya muntitilopdan amin ta mipo"oyda ta gunda tigon di malgom hi umaya'
ta bota'ona' ta way atondan mamatoy ay ha"in.
7 At moltaom dida, Apo Dios, an dumalat nan pangata'atandah nappuhi,
ya ubahom nan tatagu an dumalat di bungotmu!
8 Ya i'innilam din gun'u nunlungdayaan ya din limmanugwaa',
ya undan agguy nitudo' daten amin hinan liblum?
9 Ya wa ay ta madatngan nan gun'u pumpabadangan ay He"a ya pun'ihunod nan buhul'u,
ya hiyah ne panginnilaa' an hahalimunana'.
10 At iyamlong'u, Apo Dios, nan Tulagmu,
ya iting'i', Apu, nan hinapitmu.
11 Ya He"a, Apo Dios, di ehdol'u,
ya adia' tuma'ot hinan aton di tagun ha"in.
12 Ya ipa'annung'un aton nan intulag'un He"a, Apo Dios,
an e'nong'u nan onong hi punyamana' hinan do'ol an badangmu.
13 Ti He"ay gun nangelwang ay ha"in ta agguya' natoy,
ya binadangana' ta agguya' goh na'abak,
at ad ugwan ya He"ay nahamad hi unudo' hi mid pogpogna.