91
Hi Apo Dios di Baliw nan Tatagu
1 Nan tagun mangiyokod ay Apo Dios an nidugah di abalinana ta Hiyay ehdolnah humalimun
2 ya mundenol an mangalih,
“Apu, He"ay okod an mangipapto' ya mangehwang ay ha"in,
ti He"a ya anggay di Dios'u an pundenola'!”
3 Ya umat ay hinay atom at umannung an baliwan da'an Apo Dios
hinan nipo"oy an hulu ya hinan pumatoy an dogoh
4 ti paddungnay hophopan da'ah nan paya'na ta halimunan da'a,
ya nan panalimunay paddungnay hapiawmu.
5 At hiyanan mi'id ta'tam hi ma'at ay he"ah nappuhih nan mahdom unu hinan mapatal,
6 ya mid goh ta'tam hinan atata'ot an dogoh hinan mahdom unu hinan mapatal.
7 Ya ta"on hi un way linibuh mun'atoy hinan way heneggonmu
mu mi'id ah nappuhih ma'at ay he"a.
8 Ya hay atom ya unmu tigon di amoltaan nan tatagun nun'appuhiy pangatda.
9 Ya gapu ta nan nidugah an na'abbagbagtuy nihi'ugam
ya pangedenolam an mangipapto' ay he"a
10 at makulug an melwang'a,
ya ta"on goh nan pamilyam hinan nappuhin ma'ma'at.
11 Ti honogon Apo Dios nan a'anghelna ta halimunan da'ah an amin an umayam,
12 ya ta"on hinan agaham ya odnan da'a ta adi mihuplit di hu'im.
13 Ya wa ay ta ah'upam nan atata'ot an layon unu cobra ya abalinam an patayon dida.
14 Ti alyon Apo Dios di,
“Halimuna' ya baliwa' nan tagun mangunud ya mamhod ay Ha"in,
15 ya wa ay ta mumpabadang ay Ha"in ya badanga' hiya.
Ya baliwa' hiya,
ya idat'uy ipabagtu'ana,
16 ya idat'uy du'du"oy hi pi'taguana ta engganah unna pohdon,
at tigonay panalimun'un hiya.”