92
Nan Kantan Pundayaw ay Apo Dios
Heten psalm ya kantan ma'usal hi pundayawan.
1 Ma"ap'aphod ahan hi un munyaman ya mungkantah pundayaw ay He"a, Apo Dios an na'abbagbagtu.
2 Ya ipa'innilah awe'wewe'weet nan adi malumluman an pamhodmu
ya nan panalimunmuh amahdomahdom.
3 Ya maphod hi un me'dehhan an mipagangoh nan alpa ya nan lyre hinan pungkantaan.
4 Apo Dios, ma"amlonga' hinan do'ol an inatmun ha"in,
at mun'am'amlonga' an mungkankanta ti dumalat nan inatmu.
5 O Apu, nidugah an umipanoh'ay inatmu,
ya nunheglan mi'id di nipaddungan di punnomnommu!
6 Mu nan tatagun mid di nomnomda ya agguyda inila,
ya umat goh hinan manangpah an adida ma'awatan,
7 an ta"on un dumo'ol nan adi mangngol an umatdah nan holo' ya pumhod di nitaguanda,
mu hay ma'at ay didah angunuhna ya ma'ubahdah enggana.
8 Mu He"a, Apo Dios, ya munnonong'a,
ya mipabagbagtu'ah mi'id di pogpogna!
9 Ya nan mangubat ay He"a, Apo Dios, ya mun'atoyda,
ya an amin nan mangamangat hi nun'appuhi ya mun'iwa'atda.
10 Mu ha"in ya indatmuy bi'ah'u an umat hi bi'ah nan atap an manilhig an baka,
at nidugah di umamlonga' ti winagahana'.
11 Ya tinnig'uy na'abakan nan buhul'u,
ya dengngol'uy tu'u' hanan nun'appuhiy ugalidah nan na'apputanda.
12 Mu hanan na'na'unnud ya pumhod di nitaguanda an umat hinan ayiw an palma,
ya domo'oldan umatdah nan ayiw an cedar hi ad Lebanon.
13 Ya pumhodda an umatdah nan a'ayiw
an nitanom hinan Timplun Apo Dios an Dios tu'u
14 an gun bumunga an ta"on unda nun'ala'ay
ti ma'odhol di odolda,
ya mumballuy paya'da.
15 At ipa'inniladay aat Apo Dios an alyonday,
“Makulug an amin di aton Apo Dios,
ya Hiyay nipaddung hinan batun ihi'ugan tu'u,
ya mid ah nibahhawana!”