6
No Kaitapwak ni Daniel do Yanan dan Lion
1 Chinadaw ni Daryos iyaw nangitongdo so 120 a pangpangōlo a mangitoray siras probinsya do intiro a pagāryan.
2 Namidi pa so tatdo a torayen da a matortoray kan sira. No asa dyira, ki si Daniel. Siraw pangpangōlwaw tombay dyirad tatdwaya tan abo makorakot a dyira ni āri.
3 Sinpangan na, si Daniel, ki mabigbig a kagaganayan dyirad tabo saw a torayen kan pangpangōlo. Maynamot ta machitatārek kabaelan na a nawriw nangipanggepan sya ni āri a itongdo a mangidaōlo so intīro a pagāryan.
4 Do dāwri, siraw kadwanaw a torayen kan siraw pangpangōlwaw, ki naychichwas sa so gondāway a pangidaroman da si Daniel do kapangidaōlo na so pagāryan. Ki abaw machichwasan da a riro na mana pakababalawan na. Ta iya, ki mapagtalkan, kan mainonolay nabaw rebbeng na kan abaw dyīdo do kaparin na.
5 Sinpangan na, binata da a kon da, “Abayaw machichwasan a pangidaroman ta si Daniel malaksid do myanaw do linteg no Dyos naya.”
6 Do dāwri, nāsa saw torayenaw kan pangpangōlo a nangay di āri, kan binata da a kon da, “O Āri Daryos, mabyay ka pakono a magnanayon!
7 Yamen a tabo a mangidaōlo do pagāryan mo, komisyonado, pangpangōlo, mamagbaga, kan gobirnador, on, nagtotonōsan namen a nangtokto a maganay āno an mamarin ka so pangeddeng kan inkapilītan a matongpal. Do irahem no tatdo a poho a karaw a mangrogi sichangori, no aran sino a maydasal do aran āngo a dyos mana tawo malaksid dyimom āri, ki maitapwak do marahemaw a aridos a yanan dan lion.
8 Sichangori, mo āri, ipakat mo naitolasaya a pangeddeng kan pirmaan mo tan dya matādyan sigon do linteg da no taga Medya kan taga Persya.”
9 Dawa, pinirmaan ni Āri Daryos nawri a naitolas a pangeddeng.
10 Do nakapatakaw sya ni Daniel a napirmaan danaw no naitolasaw a pangeddeng, somnabat do bahay na, kan nangay do mamanyitwaw a kwarto na do yanan dan naywangan saw a bintan a somalap do mangket do Jerosalem. Do maypitdo do asa karaw, maydogod a maydasal a magyāman do Dyos na a akmas sīgodaw a pariparinen na.
11 Sinpangan na, siraw nangayaw di āri, ki nāsa sa a nangay do bahay ni Daniel, kan naboya da a myan a maydasal a mangdaw so sidong do Dyos na.
12 Dawa, nangay sa do salapen ni āri, kan inbahey da a maynamot do pangeddeng naw a kon da, “Mo āri, pinirmaan mo abawriw naitolasaw a pangeddeng a do irahem no tatdo a poho a karaw a mangrogi sichangori, no aran sino a tawo a maydasal do aran āngo a dyos mana tawo malaksid dyimom āri, ki maitapwak do marahemaw a aridos a yanan dan lion.”
Initbay ni āri a kāna, “On, matādyan abaw pangeddeng ko sigon do linteg da no taga Mede kan taga Persya.”
13 Do dāwri, binata da di āri a kon da, “Chapatak morim āri si Daniel a asa dyirad naakawaw a yapo do Joda? Taywaran inkaskāso naymom āri mana do naitolasaw a pangeddeng a pinirmaan mo? Katongtong naw so maydasal do maypitdo do asa karaw.”
14 Do nakadngeyaw no āri so nya, ki taywara a nariribokan. Nāw na nangtokto an maypāngo a isalākan na si Daniel. Naychamakoyaban a nangipamosposan so kaisalākan na sya manda do kasdep no araw.
15 Sinpangan na, nāsa dana sa a nangay di āri, kan binata da a kon da, “Nakmen mom āri a sigon do linteg da no taga Medya kan taga Persya, no naitolas a pangeddeng a pinirmaan no āri, ki matādyan aba.”
16 Dawa, inbilin ni āri a hapen da si Daniel a maitapwak do marahemaw a aridos a yanan dan lion. Binata ni āri di Daniel a kāna, “Isalākan na pakono imo no Dyos mwaya a nāw mo a pagsirsīrbyan.”
17 Nanghap sa so rakoh a bato a pinaneb da do aridosaw, as kan sinilyowan no āryaw so bōkod naw a singsing a pangsilyo. Komwan met pinarin dan mabigbigbig saw a tawotawo na tan dya maisalākan si Daniel.
18 Do dāwri, naybidi si āri do palasyo na, kan naychararakan a nagayonar a dya nakaycheh. Abaw naiyangay dya a mangparagsak sya.
19 Do kapaysesēdang naranaw, naybangon si āri kan nakalyalisto a nangay do aridosaw a yanan dan lion.
20 Do nakapaypasngen naw do yananaw ni Daniel, taywara nabakel a nanawag sya a kāna, “Mo Daniel a pachirawatan no sibibyay a Dyos, naisalākan nawri imo do lion saw no nāw mwaya pagsirsīrbyan a Dyos?”
21 Tominbay si Daniel do āryaw a kāna, “O āri, mabyay ka pakono a magnanayon!
22 Tinoboy no Dyos ko anghil na, kan initem na saw dangoy dan lionaya tan dyi da yaken a paynyinan, ta nachichwasan na yaken a abos pakapilāwan do kapanyideb na. Aran do kapanyideb mo, mo āri, abaw pinarin ko a madi.”
23 Taywaraw nakasoyot no āryaw, kan inpaibilin na dyira a awnen da si Daniel do aridosaw a yanan da no lion. As do nakaawon daw si Daniel, ki abaw nachichwasan da a nakaynyinan na, ta nagtalek do Dyos na.
24 Do dāwri, inbilin no āryaw a iyangay da sa dyaw nangidaromaw di Daniel, kan itapwak da sa do aridosaw a yanan da no lion mairāman saw babbaket kan anak da saw. Ki dyi pa sad dominna do aridosaw, ki linagto kan ginalemgem darana sa no lionaw tohatohang da saw.
25 Sinpangan na, naytolas si Āri Daryos do tawotawo do tabo nasnasyon kan kapaychirin do intīrwaw a tana a kāna, “Maypaypāngay pakono dyinyo talna kan kaasinso.
26 Ikeddeng ko a do tabo a pagāryan ko, machita no tawotawo iyaw kāmo kan kaanyib da do Dyos ni Daniel,
“ta iyaw no sibibyay a Dyos,
kan nāw na a abos pandan.
Iyaw pagāryan na, ki marārayaw aba polos,
kan machipandaba iyaw no kapagāri na.
27 Iya danaw Mangisalākan kan Mangispal.
Parinen na saw pangilasīnan kan makaskasdāaw
do hanyit kan do tanaya.
Insalākan na si Daniel
yapo do kabīleg dan lion saw.”
28 Dawa, iyaw nya Daniel, ki omnasinso do kapagāri ni Daryos kan do kapagāri ni Syros a taga Persya.