7
No Katayēnep ni Daniel so Apat a Bolaw a Animal
1 Do manōma a tawen no kapagāri ni Belsassar a āri no Babilonya, naytayēnep si Daniel kan nakaboya siras parmata do kayan naw a maypoktad do katri na. Sinpangan na, intolas naw tayēnep naw, kan nya iyaw paytābwan na.
2 Binata ni Daniel a kāna, “Nakaboya kwaw so parmata do dāwri a mahep. Myan apat a salawsaw no hanyit a mangibkibor so hapotaya no rakoh a tāw.
3 Myan paw apat a taywara so kararakoh a bolaw a animal a minohtot a yapo dawri a tāw a matatarek iyaw langa no kāda asa dyira.
4 “No dāmwaw, ki akmay lion kan myan panyid na sa a akmay kangkang. Do nakaboybōya kwaw sya, nabagot saw panyid naw. Naipatohos iyaw animalaw a yapo do hapot nayan tana, kan naipatēnek do dadwa a kokod na a akmay tawo, as kan natorohan so akmas aktokto no tawo.
5 “Sinpangan na, myan somnarono a animal a akmay oso. Naipatohos do pawdyi saw a kokod na, kan myan tatdo a taglang a sinangpah na do payawan saw no nyepen na. Myan nangibahey dya a kāna, ‘Maytēnek ka! Maybobsoy ka so karni.’
6 “Do nakatayoka nya, nakaboya ko so asa pa animal a akmay lipardo so langa. Myan apat a panyid na do bokot naw a akmay panyid no manomanok. Myan paw apat a oho na, kan naitoroh dyaw panakabalin na a magtoray.
7 “Do nakatayoka no nya, nakaboya ko na do parmata do dāwri a ahep, myan chapat da a bolaw a animal a makamwamomo kan makaam-amak, kan oltimo so kayit. Myan saw rarakoh a nyepen na a pasek, kan sinangpah kan ginalemgem naw natiliw na saw, as nakatokatokap na so nabidin naw. Nachitarek dyirad tabo nanma saw a bolaw a animal, as myan asa poho a olong na.
8 “Do kayan kwaw a nangtokto siras olong saw, myan tomnobo a dēkey a olong a yapo dyirad olong na saw. Nabagot tatdo saw a sīgod a olong na tan myan pachisdyatan dēkeyaw. Iyaw nya olong, ki myan saw mata na a akmay mata no tawo, kan myan dangoy na a maychirin so mapangas.
9 “Do nakaboybōya kwaw sya, myan saw trono a napangay. As no laklakayanaw a mayngaran so Ogma, ki nangay a naydisna do disnan naw. Iyaw laylay naw, ki akmay kaydak no yilo. As no boboh na, ki akmay kaydak no boboh no orbon a karniro. Iyaw trono na, ki akmay apoy a gomilgilāyab. As siraw līgay naw, ki akmay somdesdeb a apoy.
10 Myan akmay oksong a apoy a moyog a yapo do yanan naw. Rinibrībo saw no nagsirsīrbi dya, as kan myan saw riniwriwriw a naytēnek do salapen na. Nangrogi iyaw kāso para do kapangokom, kan naywangan saw libro.
11 “Tinongtong ko omboybōya sya a maynamot do mapangasaw a kapaychirin na no dēkeyaw a olong. Nāw ko a chiniban a mandad nakaipadiman no chapat naw a animal, as narārayaw no inawan na kan naitapwak do gomilgilāyab a apoy.
12 As siraw kadwanaw a tatdo dyirad animalaw, ki napakaro dyiraw kapagtoray do pagāryan da. Ki aran komwan, napalobōsan sa a mabyay so dēkey lang a chimpo.
13 “Do nakaboybōya kwaw so parmata ko do kamahep, nakaboya kos asa a akmay anak no tawo a mangay a nachirayay dyirad demdemaw no hanyit. Naypasngen do mayngaranaw so Ogma kan naiyangay do salapen na.
14 Natorohan so kapagtoray, glorya, kan panakabalin tan tabo nasnasyon kan tawotawo do kāda kapaychirin, ki magsirsīrbi dya. As iyaw kapagtoray na, ki abaw pandan na a dya polos a mabo. As iyaw pagāryan na, ki dya polos a marārayaw.”
No Kaibahey so Chakey na Batahen Parmataw
15 “An yaken a si Daniel, ki taywara a nariribokan ako. Ta siraw parmata a nangay do kapangtokto ko, ki binakebakel da yaken.
16 Naypasngen ako do asa dyirad maytēnekaw daw, kan inyahes ko no oyod a chakey na a batahen no tabo nya.
“Dawa, inbahey na dyaken, kan inpakatoneng na dyaken chakey na a batahen.
17 Binata na a kāna, ‘Siraw apataya a taywara a rarakoh a bolaw a animal, ki siraw apataw a pagāryan a naptnek do tanaya.
18 Ki siraw tawotawowaw no Katotohosan a Dyos, ki siranchiw mangrawat so pagāryan, kan dyira danchi a abos pandan.’
19 “Do dāwri, chinakey ko a mapatakan iyaw oyod a chakey na a batahen a maynamot do chapat naw a animal a nachitarek dyirad kadwan saw. Ta iya, ki taywara a makamwamomo a myan so nyepen a pasek kan koko a tombāga. Nya bolaw a animal, ki nanangpah kan nanggalemgem so natiliw na saw, as nakatokatokap na so nabidin naw.
20 Chinakey ko pa a mapatakan iyaw no maynamot do asa pohwaw a olong do oho na kan iyaw no asaw a tomnobo, as kan inasday na saw tatdwaw. Iyaw nya dēkey a olong, ki myan saw mata na kan myan dangoy na a naychirin so mapangas. Iyaw langa naw, ki akmay mabilbīleg kan siraw kadwan saw a rārayay na.
21 Do nakaboybōya kwaw so nya olong, ki ginobat na saw tawotawo saw no Dyos, kan inābak na sa
22 a nanda do nakawara ni Ogma, kan naitoroh kapangokom na a nachipangokoman dan tawotawo no Katotohosan a Dyos. As narapit danaw chimpo da a nangrawat so pagāryan.
23 “Nyaw nailawlawag dyaken: ‘Iyaw no chapat naya a animal, ki iyaw chapat nanchi no pagāryan do tanaya. Machitarek do tabo kadwan saw a pagāryan. Rārayawen nanchiw no intīro a tana a lasalasagan kan homhomken.
24 As siraw asa pohwaw a olong, ki siraw no asa poho a āri a mohtot anchi a yapo do nya pagāryan. Katayoka na, mohtot anchiw asa pa a āri a matarek kan siraw nanmaw. Iyanchiw mangābak dyirad tatdo saw a āri.
25 Maychirin anchi so maikontra do Katohosan a Dyos, kan nāw na idadanes sanchiw no tawotawo no Dyos. Padāsen nanchi a balīwan siraw naikeddengaw a chimpo dan pista kan siraw linteg a maynamot do kapanganohed do Dyos. As siraw tawotawo no Dyos, ki maiparawat sanchi dya a itorayan na do irahem no tatdo kan godwa a katawen.
26 “ ‘Ki myan anchiw kapangokom do pangokoman do hanyit, kan ikeddeng danchi a pakarohen iyaw kapagtoray na a rārayawen a hanyiben a abos pandan.
27 As iyaw kapagāri, kapagtoray, kan kabīleg dyirad tabo pagāryan do tanaya, ki maitoroh anchi dyirad tawotawo no Katohosan a Dyos. Iyaw pagāryan da, ki magnanayon anchi, kan tabo no magtotoray do tanaya, ki magsirsīrbi kan magtongpal sanchi dyira.’
28 “Nya danaw pandan no parmata. Yaken a si Daniel, ki taywara a mariribokan do kapangtokto ko, kan somnohaw rōpa ko. Ki aran komwan, abaw nangibaheyan ko aran sino.”