14
No Kaisalākan ni Abram si Lot
1 Do chimpo daw no apat saw a āri, ki myan gobat. Siraw apat saw a āri, ki sa Amrapel do Babilonya, si Aryok do Elasar, si Kedorlaomer do Elam, kan si Tidal do Goyim.
2 Ginobat daw dadima saw a āri a sa Bera do Sodoma, si Birsa do Gomorra, si Sinab do Adma, si Semeber do Seboyim, kan iyaw āri do Bela mana Soar.
3-4 Siraw dadima saya āri, ki intorayan sa no bonggoyaya ni Āri Kedorlaomer so asa poho kan dadwa katawen. Ki do chaasa poho naranaw kan tatdwa katawen, nagtotōlag saw dadima saya a bonggoy no āri a machiribīldi do bonggoy daw da Āri Kedorlaomer. As dawa, chinpeh da no dadima saw bōyot daw do Payahosonganaw no Siddim do bīt naw do bata daranayas changori a Nadiman a Tāw.
5 Ki do chaasa poho naw kan apat a katawen, nangay sa Kedorlaomer kan rārayay na saw a āri kontodo bōyot da saw, as inābak da saw tawotawowaw a Repaim do Asterot-karnaim, siraw tawotawo a Sosim do Ham, siraw tawotawo a Emimeo do Tanap no Kiryataim,
6 kan siraw tawotawo a Horeo do katokotokonanaw do Edom. Linakatan da sa a nandad El-paran do payis danaw no let-ang.
7 Sinpangan na, naybidi sa do Kades mana Enmispat, ngaran na do kaychowa. Sinākop da tabo tana saw no Amalekita a tawotawo kan siraw Amoreo a tawotawo a minyan do Hasason-tamar.
8 Sinpangan na, rinaparapa da no ar-āri no Sodoma, Gomorra, Adma, Seboyim, kan Bela (mana Soar) siraw bōyot da saw do Payahosongan no Siddim.
9 Dawriw nangnanayan das nakagobat daw siras āri saw do Elam, Goyim, Babilonya, kan Elasar. Dawriw nanggobatan das apat saya āri no dadima saya āri.
10 Do payahosonganaw a paggogobatan da, ki āro saw aridos a napno so birya. Do dāwri, naābak dadima saya āri. As dawa, do nakapaychapayapayyayo daw do dawri a gobat, siraw kadwan saw a soldādo dan āri no Sodoma kan Gomorra, nasday sa do aridos saw. Ki siraw soldādo dan kadwanaw a āri, ki nakapayyayo sa a kominwan do paytokotokonanaw.
11 Sinpangan na, siraw apataw a āri a nangābak, ki inhap da tabo warawara do Sodoma kan Gomorra kontodo chabyay da saw, as nakakaro da.
12 Do dāwri, pinachahahap da pa si Lot a kaanakan ni Abram, kan tabo warawara naw, ta do Sodomaw yanan na.
13 Do nakakaro daw, myan nakapagtālaw a asa mahakay a nayyayo a nangibahey di Abram a Hebreo so tabo napariparinaw. Do dāwri, omyan si Abram do masngenaw do nagdindināmagaw a kayokayo a dyira ni Mamre a Amoreo a kakteh ni Eskol kan Aner. Nagtotōlag saw makakaktehaya kan si Abram a maysinsisidong sa.
14 Do nakapatakaw sya ni Abram a natiliw si Lot a kaanakan na, chinpeh na saw 318 saw a tawo a nasanay do gobat a nayanak sa do kampo na. Sinpangan na, linakatan da saw apataw a āri a nandad tana do Dan.
15 Do kamahep naranaw, pinaychakarwa na saw rārayay naw, as nakadarop das kabōsor da saw, as kan inābak da saw apataw a āri. Dawa, do nakapayyayo daw no āri saw, ki linakatan da sa da Abram a nandad nakapakarapit da do Hobah do ammyānan no Damasko.
16 Nahap ni Abram tabo sinamsam daw no apataw a āri, kan winayawayaan na pa si Lot a kaanakan na, as pinaybidi naw tabo warawara na. Insalākan na paw mababakes saw kan siraw kadwan paw a tawotawo a nabahod.
No Kabindisyon ni Melkisedek si Abram
17 Do nakapaybidi danaw ni Abram do nakaābak naranaw sa Kedorlaomer kan rārayay na saw a āri, ki binayat no āryaw no Sodoma do Tanap no Sabe a napangaranan pa so Tanap no Āri.
18 Sinpangan na, binayat na si Abram ni Melkisedek a āri no syodad a Salem, kan iya pa, ki pādi no Katotohosan a Dyos. Napantad so tināpay kan arak di Abram.
19 Binindisyonan na si Abram, as nakabata na so nya a kāna, “Iya pakono Katotohosan a Dyos a iyaw Namarswa so hanyit kan tana, mangbindisyon dyimo, mo Abram.
20 Madaydāyaw pakono iyaw Katotohosan a Dyos a nanoroh dyimo so bīleg a nangābak dyirad kabōsor mo saw.” Sinpangan na, no pinarin ni Abram, ki intoroh na dyaw apagkapolwaw no tabo nahap na a kinabaknang dyirad apataw a āri.
21 Sinpangan na, binata no āryaw no Sodoma di Abram a kāna, “Dyira mo na tabo nahap mo saya warawara. Iya lang akdawen ko dyimo, ki pabidyen mo saw tawotawo kwaya.”
22 Ki initbay ni Abram do āryaw no Sodoma a kāna, “Isapata ko di ĀPO, iyaw Katotohosanaya a Dyos a iyaw Namarswa so hanyit kan tana a
23 polos a dyi ako a manghap so aran āngo a dyira mo, aran dēkey a akmas asa kakteb no bolabola mana itan no sapatos. Tan komwan, abanchya polos batan mo sya a, ‘Mabaknang si Abram a maynamot do intoroh ko dya.’
24 An yaken, hapen ko abaw aran āngo. Iya lang kinan darana saya no rārayay kwayaw dyi ko a mapaybidi. Ki siraw rārayay kwaya a somnidong dyaken, torohan mo sa so dyira da, sa Aner, Eskol, kan Mamre.”