15
No Tōlag no Dyos di Abram
1 Katayoka no nyaya, nagparmata si Abram, kan nadngey na no chirin ni ĀPO dya a kāna, “Mamo kaba, mo Abram, ta yaken pinakasarāpa mo do aran āngo a pakarārayawan mo, kan sinsinan abaw bindisyon ko dyimo.”
2 Ki tominbay si Abram di ĀPO a kāna, “Imom Āpo a DYOS, abaw maitoroh no rakohaya bindisyon dyaken an tod ako a madiman a abos pōtot. Ta anchan madiman ako, si Elieser a taga Damasko, iya lang magtāwid so warawara ko.
3 Abaya ngamin intoroh mo dyaken a pōtot ko. Iyayaw asaya dyirad adīpen kwayaw magtāwid so warawara ko.”
4 Ki nadngey naw atbay ni ĀPO dya a kāna, “Si Elieser abanchiw no magtāwid, an dyinchya iyaw mismo a pōtot mo a mahakay.”
5 Sinpangan na, inyangay ni ĀPO si Abram do gagan, as nakabata na sya dya a kāna, “Tomangay kad tohos, as kapadas mo sya bidangan bitohen saya. Komwan anchiw kāron kapotōtan mo.”
6 Do dāwri, nanganohed si Abram do inbaheyaw ni ĀPO, kan maynamot do dyaya nakapanganohed na, inbidang ni ĀPO a malinteg do salapen na.
7 Sinpangan na, binata ni ĀPO dya a kāna, “Yaken iyaw ĀPO a nangihtot dyimo do Or do Babilonya. Itoroh ko dyimo nyaya tana a dyira mo.”
8 Ki inyahes ni Abram dya a kāna, “Imom Āpo a DYOS, maypāngo kapatak ko sya a dyira ko nyaya tana?”
9 Ki tinbay ni ĀPO a kāna, “Mangyangay ka dyaken so mabinayi a bāka, mabinayi a kalding, kan malloko a karniro, kan siraw parihwaw a taytotdo so tawen, as kan mangyangay ka pas asa adekey a pahaw kan asa adekey a kalapāti.”
10 Sinpangan na, inyangay ni Abram do Dyos tabo naibaheyaya. Do dāwri, inidyowan ni Abram binyay na saw, kan ginelegel na saw manomanokaw. Binhabhak na saw binyay saw malaksid do manomanok saw, kan binatobatoy na sa so dadwa kabatoy. Pinaysasalap na sa sigon do kakchidaw no kāda binyay, tan myan ayaman do hobok naw.
11 Ki myan saw rarakoh a manomanok a akmay kangkang a dominna do karnyaw, ki binoyaw san Abram.
12 Do kasdep danaw no araw do dawri, pinaynepdep no Dyos si Abram. Ki do nakapaynepdep naw, myan inpaboya no Dyos a oltimos kasari a yanan, kan do dāwri, oltimo nakamo na.
13 Ki binata ni ĀPO dya a kāna, “Masigorādo a gan-ganaet sanchiw kapotōtan mo do tana no matarek. Mayparin sanchi a adīpen daw, as malidyalidyatan sanchi daw so apat a gasot a katawen.
14 Ki dosāen konchiw nawri a nasyon a mangadīpen dyira, as kan anchan ikaro ko sa do dawri a nasyon, āronchiw ahapen da a kinabaknang.
15 As imo, matahaman mwabaw nawri, ta matalna anchiw kadiman mo. Tod ka nanchi a machangangay a machonot dyirad simna aāpong mo saw do oltimo a kamalkem mo.
16 Anchan marapit danaw chapataw a kapotōtan, nawri dananchiw kapaybidi da dya a tana no kapotōtan mo saw, ta dosāen ko sabaw Amoreo a tawo a omyan do dya sichangori a mandad kapaglipyas no angang ko do karahet da. Nawrinchiw kadōsa ko sira.”
17 Do nakasdep danaw no araw, do kasari naranaw, naychihat a myan manghonghob a banga kan somdesdeb a ahoten a mayam do ayamanaw do hobokaw no karni saw.
18 Do dawri a naparin, do dawri a araw, nachitōlag si ĀPO di Abram a kāna, “Ikari ko a itoroh ko nyaya tana dyirad kapotōtan mo saw a yapo do oksong naw do Egipto a mandad magdindināmagaw a Oksong a Oprates.
19 Itoroh ko tabo nyaya tana dyira kontodo tana daya no Kenita, Keneseo, kan siraw Kadmoneo,
20 siraw Heteo, siraw Pereseo, siraw Repaim,
21 siraw Amoreo, siraw Kananeo, siraw Girgaseo, as kan siraw Jeboseo.”