24
No Kabahayen ni Isaak
1 Binindisyonan ni ĀPO si Abraham do tābo kayayan na a mandad kaoltimo danan kalakay na.
2 Do asa karaw do dāwri, binata ni Abraham do katotorayanaw a adīpen na a iyaw mangaywanaw so tabo a dyira na a kāna, “Igpet mo payawanayan padang ko, as magsapata ka.
3 On, pagsapataen koymo do salapen ĀPO a Dyos no hanyit kan tanaya a mamidi kabas kabahayen pōtot kwaya dyirad mababakes sayad Kanaanaya a yanan ko sichangori.
4 Basbāli a mangay ka do tanaw a nakayanakan ko do kakabagyan ko saw, ta dawrinchiw panghapan mos baket ni Isaak a pōtot ko.”
5 Tominbay adīpen naw dya a kāna, “Ki an maskeh mabakesaw a monot dyaken do dyaya tana, hapen koris Isaak do tanaw a nakayanakan mo ah?”
6 Tominbay si Abraham a kāna, “Namna! Komwan aba. Hapen mwabaw pōtot kwaya dwādaw!
7 Si ĀPO a Dyos no hanyit, ki inhap na yaken yapo do kapamilyaan ni āmang ko kan tana a nakayanakan ko, as kan insapata na dyaken a kāna, ‘Itoroh ko nyaya tana dyirad kapotōtan mo.’ Toboyen nanchiw anghil na a manmanma kan imo a mangisagāna so hapen mwaw a kabahay ni Isaak.
8 Amnan maskeh a monot mabakesaw dyimo, maponas dananchiw sapata mwaya dyaken. Basta dyi mo a yangay pōtot kwaya daw.”
9 Katayoka na naychirin, inigpet no adīpenaw payawanaw no padang ni Abraham a āmo na, as nakapagsapata na a tongpalen naw bilinaw ni Abraham.
10 Sinpangan na, nagrobwat adīpenaw ni Abraham. Nakahap nas asa pohwaw a kamilyo no āmo na, kan kinargaan nas āro a kīta a mabalor a rigālo a inpahap no āmo naw. Katayoka na, nangay danad idyaw a yanan ni Nahor do Mesopotamya a tana.
11 Do nakapakarapit naw, pinaydogod na saw kamilyo naw do gaganaw no nawri a idi do masngenaw do akbodaw. Do dāwri, makoyab dana, ki nawriw ōras dan mababakes a mangay a mamoranom.
12 Sinpangan na, naydasal adīpenaw a kāna, “Mo ĀPO a Dyos a daydayāwen ni Abraham a āmo ko, sidongan mo pa yaken a maballīgi sichangori, kan ipaboya mo paw dya mabdibdis a kadaw mo di Abraham a āmo ko.
13 Ari ako na dya a maytēnek do masngen do akbodaya a pamoranoman dan babbalāsang saya do dya idi.
14 Anchan mawara sa, an myan asa paychirinan ko so, ‘Chāsi mo yaken, ta padisnahen mo paw malabi mwaya, ta machinomak pa,’ as atbayen na yaken so, ‘Minom ka, ta paynomen ko saw kamilyo mwaya,’ iya dana pakonom ĀPO pinidi mwaw a kabahay ni Isaak a adīpen mo. An komwan maparin, matonngan konchiw dya mabdibdis a kadaw mo di Abraham a āmo ko.”
No Nakapidi ni Rebekka
15 Ki do dāwri, sakbay a tayoka naydasal, naboya na si Rebekka a maysabhay so malabi. Iya, ki pōtot ni Betoel. As si Betoel, ki anak ni Milka a baket ni Nahor a kakteh ni Abraham.
16 Si Rebekka, ki asa mapintas a balāsang, kan ari pa abo nakasalid sya. Minosok do akbodaw a namoranom. Ki do nakapno naw so malabi naw, somonget dana.
17 Do dāwri, nanyeng a naypasngen dyaw adīpenaw ni Abraham, as nakabata na sya dya a kāna, “Ādi, maparin abawriw machinom so dēkey do malabi mwaya?”
18 Ki initbay na a kāna, “Minom ka, mo āpo.” Sigīda na pinagchin malabi naw, as nakapaynom na sya.
19 Do nakatayoka naw a mininom, binata no mabakesaw a kāna, “Aran siraw kamilyo mwaya, ki paynomen ko sa mandan makaywaw sa.”
20 Dawa, inalistwan na pinado ranomaw do malabi naw do inoynomanaw no binyay, as nakapayyayo na nangay a minirwa a nanghap so ranom. Komwan pinarin na a mandad nakapakaywaw da tabo no kamilyowaw.
21 Ki do dāwri, naylilyak abaw adīpenaw ni Abraham a nangboyboya di Rebekka, ta sintiren na an nawri danaw atbayaw ni ĀPO do dasal naw.
22 Do katayoka naw a napaynom siras kamilyo saw, napahtot adīpenaw ni Abraham so asa mangīna a arītos a balitok a para momodan kan dadwa rarakoh a porsilas a balitok a pinangay na do tanoro na saw.
23 Inyahes no adīpenaw di Rebekka a kāna, “Ādi, sino āmang mo? Maparin abawri an misan kami kan siraw rārayay ko saya do bahay nyo sichahep?”
24 Initbay na a kāna, “Yaken, ki pōtot ni Betoel a anak da Milka kan Nahor.”
25 Binata na pa a kāna, “Āro garami kan mākan dan kamilyo do bahay, as kan myan paw yanan nyo a pangpahabasan nyos ahep kan siraw binyay nyo saya.”
26 Do nakadngeyaw sya no adīpenaw, nagrōkob as nakapagdaydāyaw na di ĀPO.
27 Binata na a kāna, “Madaydāyaw si ĀPO a Dyos a daydayāwen ni Abraham a āmo ko, ta nainonolay nabaw kapodno kan dya mabdibdis a kadaw na do āmo ko. As an yaken, indaōlwan na yaken do bahay a yanan dan kakabagyan saw no āmo kwaw.”
28 Sinpangan na, nayyayo si Rebekka a naybidi do kapamilya saw ni ānang na, as nakaistorya na tabo so naparinaw.
29 Myan kakteh ni Rebekka a mahakay a mayngaran so Laban. Do nakadngey naw sya, nanyeng a nayyayo a nangay do akbodaw a yananaw no mahakayaw.
30 On, ta do nakaboya naw so arītosaw no momodan kan porsilas saw do tanoro na saw no kakteh naw, kan nadngey na paw inpadāmagaw ni Rebekka a iyaw inbaheyaw no mahakayaw, nanyeng a nangay do yananaw no mahakayaw. Do nakapakarapit naw do akbodaw, myan a maytēnek iyaw mahakayaw do yanan daw no kamilyo na saw.
31 Binata na do mahakayaw a kāna, “Mangay ka do bahay, mo āpo, imo a binindisyonan ĀPO! Āngo ta nāw nyo dya? Aryaw pagyanan nyo a naisagāna do bahay, kan myan paw yanan dan kamilyo nyo saya.”
32 Dawa, nachangay mahakayaw di Laban do bahay. Do kawara daw, diniskargaan Laban siraw kamilyo saw, as nakapakan na siras garami, as kan tinorohan nas ranom adīpenaw ni Abraham kan siraw rārayay naw tan lablaban daw kokod da.
33 Ki do nakaidasar danaw no kanen da, binata no adīpenaw ni Abraham a kāna, “Anchi kamo, ta koman akwaba, an dyi ko a ibahey dyinyo ranta ko a mangay dya.”
Ki tinbay ni Laban, “Naon, ibahey mo pa dyamen.”
34 Dawa, binata na a kāna, “Yaken, ki adīpen ni Abraham.
35 Rakoh bindisyon ni ĀPO do āmo kwaw, kan pinayparin na asa mabaknang a tawo. Tinorohan nas āro a karniro kan kalding, baka, pirak kan balitok, āro a adīpen a mahahakay kan mababakes, as kan āro a kamilyo kan asno.
36 Ki si Sara a kabahay no āmo kwaw, ki nakapaymanganak so asa mahakay a aran baket dana, as kan inpatāwid na tabo no āmo kwaw a si Abraham warawara na do dya pōtot na.
37 Masaw a pinagsapata na yaken a tongpalen ko bilin na. Binata na dyaken a kāna, ‘Mamidi kabas kabahayen pōtot kwaya dyirad mababakes saya dya a Kanaan a yanan kos sichangori.
38 Basbāli a mangay ka dyirad kapamilyaan kan kakabagyan sayan āmang ko, ta dawrinchiw panghapan mos baket no pōtot kwaya.’
39 Ki inyahes ko dya an āngo parinen ko an maskeh a monot dyaken machichwasan kwaw a balāsang.
40 Ki binata na dyaken a kāna, ‘Si ĀPO a nāw kwa anohdan, ki toboyen nanchiw anghil na a machirayay dyimo tan mahap monchiw panggep mo. Manghap kanchis kabahayen pōtot kwaya dyirad kakabagyan ko saw do pamilya ni āmang ko.’
41 Binata na pa dyaken a kāna, ‘An parinen mo nyaya a kangay mo do kakabagyan ko, as chaskeh da itoroh dyimo balāsangaw, ki maponas dananchiw sapata mwaya dyaken.’
42 “Dawa, do kayan kwaw kaychi do yananaw no akbod, naydasal akos akma syay, ‘Mo ĀPO a Dyos ni Abraham a āmo ko, sidongan mo pa yaken a maballīgi do panggep kwaya.
43 Ari ako na dya a maytēnek do masngen do akbodaya. An myan pakono balāsang a mangay a mamoranom, as an paychirinan ko so, “Chāsi mo yaken, ta machinomak pa do pinoranom mwaw,”
44 as atbayen na yaken so, “Minom ka, ta paynomen ko saw kamilyo mwaya,” iya dana pakonom ĀPO pinidi mwaw a kabahay no pōtotaw no āmo kwaw.’
45 “Ki dyik paw a tayokaw dasal kwaw kaychi, ki nawara si Rebekka a naysabhay so malabi. Minosok do akbodaw a namoranom, kan somonget dana. Ki do dāwri, binata ko a kon ko, ‘Ādi, chāsim pa yaken, ta machinomak pa.’
46 Ki nanyeng a pinabodis naw malabi naw, as nakabata na sya dyaken a kāna, ‘Minom ka, kan aran siraw kamilyo mwaya, ki paynomen ko sa.’ Dawa, mininom ako, as pinaynom na paw kamilyo ko saw.
47 “Sinpangan na, inyahes ko dya, ‘Sino āmang mo?’ Ki inbahey naw a, ‘Yaken, ki pōtot ni Betoel a pōtot ni Nahor di Milka.’ Do dāwri, pinangay ko arītosaw do momodan na, as kan porsilas saw do tanoro na saw.
48 Nagrōkob as nagdaydāyaw ako di ĀPO. On, dinaydāyaw ko si ĀPO a Dyos ni Abraham a āmo ko, ta iyaw nangidaōlo dyaken so kosto a rarahan a mangay do kakabagyan āmo ko tan nachichwasan ko balāsangaw a kabahayen pōtot no āmo kwaw.
49 On, sichangori, nadngey nyo na an āngo panggep ko. Dawa, ibahey nyo an machitōnos kamo na do chakeyaw no āmo kwaw. Ta an maskeh kamo, ibahey nyo pa tan chapatak ko pariparinen ko.”
50 Ki tominbay sa Laban kan Betoel a kon da, “Maynamot ta siraw nya, ki kaparin ni ĀPO. Abaw toray namen do dyaya.
51 Cha dya si Rebekka. Hapen mo, as mayam kamo na. Iyaw ipakabahay mo do pōtotaw no āmo mwaw a akmas inbilin ni ĀPO.”
52 Do nakadngeyaw no adīpenaw ni Abraham so binata daw, nagrōkob do tana, as nakaidaydāyaw nas ĀPO.
53 Katayoka na, napahtot siras pirak kan balitok a alāhas, kan ayowayob, as nakaitoroh na sya di Rebekka. Tinorohan na paw kakteh naw kan si ānang na so mangingīna a sāgot.
54 Sinpangan na, komninan kan mininom sa kan siraw rārayay na saw, as nakaysan das asa kahep daw. Do kamabekas danaw, napakatoneng adīpenaw ni Abraham, ta mayam dana sa. Binata na a kāna, “Maybidi kami na do āmo kwaw.”
55 Ki binata da Laban a kakteh ni Rebekka kan ānang na a kon da, “Namna! Matokos pas Rebekka ah! Myan pa dya so asa kalawas mana asa poho a karaw, as kangay nanchi.”
56 Ki binata no adīpenaw dyira a kāna, “Balabalayen nyo aba yaken, ta sinidongan yaken ĀPO do panggep kwaya. Dawa, mangtokto kamo pabas pamenpen nyo so kapaybidi ko do yanan ni āmo ko.”
57 Binata da a kon da, “Naon, ki tawagan tas Rebekka, ta yahes ta an āngo bata na.”
58 Dawa, tinawagan da si Rebekka, as nakaiyahes da sya dya a kon da, “Chakey moriw machirayay do dya mahakay?”
“On, makey ako,” tinbay ni Rebekka.
59 As dawa, do dāwri, pinalobōsan da si Rebekka a nachirayay do adīpenaw ni Abraham kan siraw rārayay na saw, kan pinarayay daw asaw a mabakes a nangtagtagībi sya.
60 Ki sakbay a komnaro sa, binindisyonan da si Rebekka, as binata da dya a kon da,
“Imom Rebekka a kakteh namen,
mayparin ka pakono a ānang dan riborībo a tawotawo,
as abāken da pakononchi no kamanganakan mo
nasnasyon saya a kabōsor da.”
No Kapaychabahay Da Isaak kan Rebekka
61 Do katayoka naw a nagrobwat, somnakay dana si Rebekka kan siraw kasidong naw a mababakes do kamilyo saw a minonot do adīpenaw. Komwan nakayam da.
62 Do dāwri, minyan si Isaak do Negeb do abagātanen no Kanaan, ki kawara na pa a yapo do payranswan naw a nangayan na a naginbirnaan do bobon a mayngaran so “Bobon no Sibibyay a Dyos a Makaboya Dyaken”.
63 Asa makoyab, minohbot si Isaak a mangay do bengkag a midibidi. Ki do dāwri, naboya na saw kamilyowaw a maypaypasngen dya.
64 Do nakaboyaw ni Rebekka si Isaak, nanyeng a gominchin do kamilyo naw,
65 as nakaiyahes na sya do adīpenaw ni Abraham a kāna, “Sino nawri a manakey a machibayat dyaten?”
Ki initbay na a kāna, “Nawriw āmo kwaw.” Ki insigīda na inhap abōngot naw, as nakatalob nas rōpa naw.
66 Do nakapaybabayat daw, inistorya no adīpenaw di Isaak tabo napariparin do nangayan naw.
67 Dawa, inhap ni Isaak si Rebekka do yanan naw no tolda ni simna ānang na. Do dāwri, nayparin si Rebekka a kabahay na. Oyod a chadaw nas Rebekka, as nahwahok dana a maynamot do mamayo naw do nakadimanaw ni ānang na.