25
Siraw Kadwan a Kapotōtan ni Abraham
(1 Kron. 1:32-33)
1 Minirwa nangabahay si Abraham so mayngaran so Ketora,
2 as inyanak na sa Simran, Joksan, Medan, Midyan, Isbak, kan Swa.
3 Si Joksan, nayparin a āmang ni Sheba kan Dedan. Si Dedan, kapoonan dan Assorim, siraw Letosim, kan siraw Leommim a tawotawo.
4 Siraw mahahakayaw a pōtot ni Midyan, ki sa Epa, Eper, Hanok, Abida, kan Eldaa. Yapo sa tabo di Ketora.
5 Ki inpatāwid ni Abraham tabo dyira naw di Isaak.
6 Ki aran komwan, sinagōtan na saw pōtot naw a mahahakay di Agar kan Ketora do kabyay na paw, as nakatoboy na sira a mangay do tana do dāya, tan machibawa sa di Isaak.
No Kadiman kan Kaitābon ni Abraham
7 Nadiman si Abraham do nakapagtawen nas 175 a katawen.
8 Ki do nakadiman naw a nachirapa dyirad simna aāpong na saw, taywara danaw kamalkem na, as napnek dana do nakapaybibyay naw do kayayan na do hapotayan tana.
9 Intābon da Isaak kan Ismael do aschipaw do Makpela do bengkag da a dayāen no tana a Mamre a dyira ni Epron do kachwaw a pōtot ni Sohar a Heteo.
10 Iyaw nyaw tanaw a ginātang ni Abraham dyirad Heteo saw. Dawriw nakaitabōnan da kan baket na.
11 Do nakadimanaw ni Abraham, binindisyonan Dyos si Isaak a pōtot na. Minyan si Isaak do masngenaw do bobonaw a mayngaran so “Bobon no Sibibyay a Dyos a Makaboya Dyaken.”
Siraw Kapotōtan ni Ismael
(1 Kron. 1:28-31)
12 Nyaw pakasaritāan dan kapotōtan saw ni Ismael a pōtot ni Abraham di Agar a taga Egipto a adīpen ni Sara.
13 Siraw nyaw ngarangaran dan pōtot na saw a mahahakay sigon do nakasarosarono da naiyanak: si Nebayot matoneng, kan si Kedar, Adbeel, Mibsam,
14 Misma, Doma, Massa,
15 Hadad, Tema, Jetor, Napis, kan Kedema.
16 Siraw asa poho kan dadwa mahahakay a pōtot ni Ismael, ki sira danaw kapoonan dan asa poho kan dadwa nasnasyon, as napangaranan idi daw so ngaran da.
17 Nakapagtawen ni Ismael so 137 do nakadiman na a nachirapa dyirad simna aāpong na saw.
18 Minyan saw kapotōtan ni Ismael do payawan no Habila kan Sor, do dayāen no Egipto do rarahanaw a mangay do Assirya. Nachisyay sas niyanan kan nāw da naysin-iipsok.
No Kayanak Da Esaw kan Jakob
19 Nyaw pakasaritāan dan kapotōtan saw ni Isaak a pōtot ni Abraham.
20 Nagtawen si Isaak so apat a poho do kapaychabahay da kan Rebekka a pōtot ni Betoel a asa Arameo a taga Mesopotamya. Si Rebekka, ki kakteh ni Laban.
21 Ki maynamot ta hopes si Rebekka, naydaydasal si Isaak di ĀPO, as inakdaw na a matorohan so pōtot. Inadngey ni ĀPO dasal naw, as nahay abas nakabōgi ni Rebekka.
22 Nabōgi si Rebekka so singin. Ki do kayan da paw do irahem no bodek na, ki pirmi sa maydiman. Binata ni Rebekka a kāna, “Āngo nya maparin dyaken?” Dawa, nangay a naydasal di ĀPO.
23 Do dāwri, binata ni ĀPO dya a kāna,
“Dadwa sa nasyon myan do irahemaya no bodek mo.
Iyanak monchiw dadwa tawo a mayparin a dadwa maytarek a nasyon.
Mayīyit anchiw asaw. Iyanchiw matonengaw,
ki magsīrbi do ādyenaw.”
24 Sinpangan na, do nakarapit no arawaw a kapaymanganak na, ki singin sa mahakay.
25 Do nakawara no matonengaw, ki manyibayaw kodit naw kan borboran pa. Dawa, pinangaranan da si Esaw.
26 Sinpangan na, naiyanak ādi naw a myan na igpet tobenaw no ākang naw. Dawa, pinangaranan das Jakob. Do dāwri a nakapaymanganak ni Rebekka, nagtawen si Isaak so anem a poho.
No Kaitādi ni Esaw so Tāwid Na a Matoneng a Anak
27 Nayparakoh saw nya mahahakay. Si Esaw, ki nayparin a maganay a manganop, ta chadaw naw midibidi do kakahasan. Ki si Jakob a ādi na, ki maolimek a tawo, as kan makadichan aba do tolda daw.
28 Chinadaw ni Isaak si Esaw maynamot ta chadaw naw michan so maanopanaw ni Esaw. Ki chinadaw ni Rebekka si Jakob.
29 Do asa karaw, nanglaneg si Jakob so agayap a mabaya. Do dāwri, nawaras Esaw a yapo do panganopan, kan taywaraw kapteng na.
30 Binata na di Jakob a kāna, “Oyod ko nayas kapteng! Torohan mo pa yaken so mabayaya a rotongan mo!” Nyaw nakayapwan na a napangaranan si Esaw so Edom.
31 Ki tominbay si Jakob a kāna, “On, torohan koymo an manma mwa itādi dyaken iyaw kalintegan no matoneng a pōtot.”
32 Binata ni Esaw a kāna, “Ngay na, kadidiman ko nayad kapteng. Āngo paw pateg dyaken nawri a kalintegan?”
33 “Na, anchi ka! Manma ikarim pa dyaken ah,” binata ni Jakob. Dawa, nagkari dya si Esaw a itādi narana di Jakob iyaw kalintegan naw a matoneng a pōtot.
34 Sinpangan na, tinorohan Jakob so tināpay kan linaneg naw a mabaya a agayap. Komninan as nakaynom na. Katayoka na, naytēnek as tod a komnaro. Iniktokto na pabaw kalintegan naw a matoneng a pōtot, ta mapateg aba dya.