No Tolas A Naitoroh Dyirad Hebreo
No Pakatonngan so Paytābwan no Nya Tolas
Nyaya tolas, ki abaw inbahey na an sino akin tolas. Ki no naytolasan na, ki asa gropo no Jodyo mana Hebreo (Eks. 2:11; 3:18) a nahay dana nanganohed di Jesos. Ki aran komwan, siraw nya saya Hebreo, ki chakey da tadyichokodan kapanganohed da kan maybidi do sīgod a kapanganohed dan Jodyo a maynamot do kapaypangay no lidyat a madididiw da. Dawa, no paynamotan no nangitolasaw, ki yokayen na sa a maynamot do kaipanakem na dyira so maynamot do kabīleg kan katoray ni Jesos.
Myan tatdo a ibahey no naytolasaya a maynamot di Jesos. Si Jesos, ki iyaw abos pandan a Anak no Dyos. Maynamot ta komwan, matortoray si Jesos kan siraw propīta do kaychowa kan siraw anghilis kan aran si Moyses. No chadadwa a ibahey na, ki si Jesos, ki iya danaw abos pandan a Katotohosan a Pādi ta a pinakainawan no tawotawo no Dyos, ta mapatpateg pinarin naw kan siraw papādi saw a Jodyo. No chatatdo na, ki si Jesos mangyangay dyaten so bayo a tōlag a maynamot do nakadiman na do kros. Iyaw adan a tōlag, ki akmay anyino lang no bayowaw a tōlag. Ta iyaw nanomaw, ki pirmi a machitaw dāton a raya no binyay tan mapakawan tawotawo do gatogatos da. Ki do bayo a tōlag, ki naypisa lang, ta indāton ni Jesos mismo a byay na tan aran sino a manganohed dya, ki maisalākan kan mapalinteg do salapen no Dyos.
Ipanakem pa dyira no nangitolasaw iyaw kayit no kapanganohed dan kapoonan da saw do kapagtalek da do Dyos a aran nalidyatan sa. No hahawen na, ki tolāden da sa. Kapanawdyan na, ahwahoken na sa a nāw da mangtokto a maynamot di Jesos kan anōsan daw aran āngo a lidyat tan dyi sa machibawa do Dyos, basbāli a maybibyay sa a monot do chakey no Dyos.
No Naychakarwan no Nya Tolas
Pakatoneng: si Jesos Anak no Dyos 1:1-3
Matortoray si Jesos kan siraw anghilis 1:4-2:18
Matortoray si Jesos kan Moyses 3:1-4:13
Si Kristo, ki katotohosan a pādi 4:14-7:28
Maganaganay bayo a tōlag kan adanaw 8:1-9:28
Maganaganay dāton ni Jesos kan siraw papādi 10:1-31
No kasisīta no kapanganohed 11:1-12:25
No kapanawdyan na 13:1-25
No Tolas a Naitoroh Dyirad
Hebreo
1
Si Jesos, Mangipakatoneng so Dyos
1 Do kaychowa, pinaychirin sa ni Āpo Dyos propīta na saw a pinakainawan na dyirad kapoonan ta saw a Hebreo a sigon do nakapangosar na so āro a matatarek a pangipakatonngan nas chakey na.
2 Ki sichangori, do manawdyi saya a araw, inpaipakatoneng no Dyos dyaten iyaw chirin na a maynamot do Anak naya a si Jeso-Kristo. Iyaw nyaya a Anak na, ki inpaparswa ni Āpo Dyos dyaw tabo a myan do hanyit kan tana, as kan iya paw pinidi ni Āpo Dyos a mangrawat so tabo tan dyira narana tabo naparswa.
3 Iyaw Anakayaw pakaboyan so sēdang no makaskasdāawaya a bīleg no Dyos. Iyaw oyod a pakaboyan so mismo a kadyos na. Iyaw Anakayaw mangitoray so tabo a naparswa a maynamot do mabīlegaya a chirin na. As do nakapamarin naw so pakapakawanan tawotawo do gatogatos da, ki naybidi do hanyit a naydisna do mangketaw do kawanan no Manakabalin a Dyos, kan dawriw yanan na a mangitoray.
Matortoray Anak kan Siraw Anghilis
4 Dawa, pinayparin no Dyos Anak naya a adayo a matortoray kan siraw anghilis saw. Masaw iyaw āwag naw a intawag ni Āpo Dyos dya, ki mas madaydāyaw a adayo kan āwag daw.
5 Ta aba polos dyirad anghilis saw nangibaheyan no Dyos so akmas binata naw do Anak naya a naitolas do Masantwan a Tolas a kāna,
“Imo, ki Anak ko, as sichangori,
ipaboya ko a yaken, Āmang mo.”
Myan paw naitolas a chirin no Dyos a kāna,
“Yaken Āmang mo, kan imo Anak ko.”
Ki aba polos binata na komwan dyirad anghilis na saw.
6 Binata pa no Dyos do kakalo naw a manoboy so Anak naya do lōbongaya,
“Machita magdāyaw sa dya tabo anghilis no Dyos.”
7 Ki an maynamot dyirad anghilis saya, ki nyaw binata no Dyos do Masantwan a Tolas a kāna,
“An chakey na, ki mapayparin na a salawsaw no anghilis saw,
as kan mapayparin na sa akmay apoy tobotoboyen na saw.”
8 Ki an maynamot do Anak naya, ki nyaw binata no Dyos a kāna,
“Imom Dyos, ki nāw mo na a magtoray a abos pandan.
Iyanchiw baston no kapagtoray mo, ki baston no kinalinteg.
9 Chadaw mo kalinteg, as kan ipsok mo karahet.
As dawa, nyaw paynamotan na a yaken a Dyos mo,
ki taywara pinasoyot koymo do ārwaro a dāyaw
a intoroh ko dyimo kan siraw rārayay mo saya.”
10 Myan paw matarek a naitolas do Masantwan a Tolas a maynamot do dya Anak a kāna,
“Do nanman pan araw, ki imom Āpo,
namarswa so tanaya kan tabo a myan do hanyit.
11 Ki tabo saw nyaya, ki mabo sanchi, kan omadan sanchi a akmay laylay.
Ki imo, ki nāw monchi a abos pandan.
12 On, iyaw hanyit kan tana, ki makomelkomel sanchi,
as mapawakdit sanchi.
Ki imo, polos a dyi ka mabdibdis kan lomakay kaba.”
13 Ki siraw anghilis saw, aba polos binata no Dyos dyira a akmas binata naw do Anak naya a akmas nya,
“Maydisna ka do kawanan kwaya
a mandan kaābak ko siras kabōsor mo saya,
kan ipapitapita ko sa do kokod mwaya.”
14 An komwan, sino sad Āpo Dyos anghilis saya? Siraw nya anghilis, ki kasidong sa tabo no Dyos. Ispirito sa a tobotoboyen Āpo Dyos a somidosidong dyirad tawotawo saw a mangrawat anchi so kaisalākan.