No Tolas Ni Apostol Pablo Di Pilemon
No Pakatonngan so Paytābwan no Nya Tolas
Si Pilemon, ki asa mabaknang a tawo a minyan do syodad a Kolosas. Iya, ki asa nanganohed di Jesos. Iya paw no akin adīpen di Onesimo a nayyayo do bahay na a maynamot do nakaoma na do nakaadīpen na.
Nayyayo si Onesimo do mateng a yanan, kan nakarapit do Roma. Dawri, maynamot do naikeddeng a plāno ni Āpo Dyos, nadongso na si Pablo do bahodan. Do nakadngey nas innanawowaw ni Pablo a maynamot di Kristo, ki nanganohed kan nayparin a mapateg a kasidong ni Pablo.
Maynamot ta komwan, naktokto ni Pablo a machita na paybidihen si Onesimo do āmo naw a si Pilemon a nayayowan na. Dawa, iyaw nyaya tolas na di Pilemon a sīt na do Kolosas, ki nangdaw so kapamakawan na di Onesimo a pinaybidi ni Pablo. Kan no hahawen ni Pablo, ki rawaten aba ni Pilemon a napakawan a adīpen lang an dya asa dana kakteh a manganohed di Kristo.
No tawen a nakaitolas ni Pablo so nyaya tolas, ki do A.D. 61 mana 61 a katawen katayoka no nakaiyanak ni Āpo Jesos.
No Naychakarwan no Nya Tolas
Pakatoneng 1-3
No kapammadāyaw di Pilemon 4-7
No kapangdakdaw a para di Onesimo 8-22
No kapanawdyan na 23-25
No Tolas ni Apostol Pablo di
Pilemon
1
1 Nyaya tolas namen, ki mangay dyimo mo Pilemon a mapateg a sīt di Kristo Jesos. Yaken si Pablo a asa nabahod a maynamot do kapagsīrbi ko di Kristo Jesos, kan iyaw rārayay ko dya, ki si Timoteo a kakteh ta do kapanganohed.
2 On, naytolas kami dyinyo mo Pilemon kan di Arpya a mabakes a kakteh namen do kapanganohed kan di Arkipo a rārayay namen a soldādo ni Kristo, as kan tabo manganohed saw di Kristo a makpekpeh do bahay nyowaw daw.
3 Myan pakono dyinyo parābor kan kaydamnayan no kapangtokto nyo a yapo di Āpo Dyos a Āmang ta kan yapo di Āpo Jeso-Kristo.
No Kapagyāman ni Pablo a Maynamot di Pilemon
4 Kakteh ko, pirmi ako a magyāman di Āpo Dyos a maynamot dyimo do kāda kapaydasal ko,
5 ta nadngey ko iyaw maynamot do kayit no kapanganohed mo di Āpo Jesos kan rakoh a adaw mo dyirad tabo siraw tawotawowaw a manganohed.
6 On, paydaydasal ko tan do kayan mo a machisarsarīta a maynamot do kapanganohed mo, ki maypaypangay paw kapakaāwat mo do tabo pamindisyonaya a yapo di Āpo Dyos a myan dyaten a maynamot do kapachichasa ta di Kristo.
7 Magyāman ako pa di Āpo Dyos a maynamot do adaw mo dyirad tawotawowaw a manganohed di Jesos. On, rakoh iyaw soyot ko, kan mahwahok ako na a maynamot dyimo, ta pinasalon-at mo iyaw aktokto dan manganohedaw a maynamot do adaw mo.
No Kapangdakdaw ni Pablo Maynamot di Onesimo
8 Dawa, myan chakey ko a akdawen dyimo. Ta aran myan dyaken toray a yapo di Kristo a mangbilin dyimo tan parinen mo no maganay, ki alit na, parinen kwabaw nawri.
9 On, chakakey ko manahes dyimo maynamot do adaw. Parinen ko nyaya a aran yaken si Pablo a malkem dana, kan sichangori, myan ako na do bahodanaya a maynamot di Kristo a pagsīrbyan ko.
10 Dawa, mangdakdaw ako dyimo a ipaboya mo kāsi mo di Onesimo a nayparin a anak ko do kapanganohed di Kristo do kayan naw dyaken do nakabahodan kwaya.
11 Rawaten ko a do kachwaw, ki akmay abo maisidong na dyimo. Ki sichangori, rakoh danaw sīrbi na dyaten a dadwa.
12 Sichangori, maynamot di Onesimo a oltimo kos chadaw, ki paybidihen ko na dyimo.
13 On, paybidihen ko a aran chaskeskeh ko, ta chakakey ko a bidinen do dya a machasa pa dyaken do kayan kwaya do bahodanaya a maynamot do kapangasaba ko so Maganay a Dāmag tan iyaw akmaw pinakainawan mo a somidong dyaken.
14 Ki aran komwan, nangtokto ako a maganaganay pa an paybidihen ko. Ta chakwan ko an nāw na dyaken, ki ari ko pad rinawat palōbos mo a āmo na. Asa pa, chakey kwabaymo a piliten. Imo daw mangtokto an maypāngo kasidong mo dyaken.
15 Sigōro, nawriw kinarwan na paw dyimo so dēkey a chimpo tan anchan maybidi dyimo, ki magnanayon dana.
16 Sichangori, iktokto mo paba a iya, ki asa adīpen an dya mapatpateg pa a adayo. Ta maynamot do kapanganohed na, ki nayparin dana asa makadadaw a kakteh ta, naten dana dyaken. On, ta aran imo, rakoh pakono iyaw kadaw mo dya a maynamot ta kasidong mwaba lang do inawan an dya kakteh mo pad kapanganohed ta di Āpo Jesos.
17 Dawa, an ibidang mo yaken a rārayay mo do kapanganohed ta, ki rawaten mo a akmas karawat mwaya dyaken.
18 An myan gatos mana ōtang na dyimo, ki yaken anchiw singiren mo.
19 Yaken si Pablo a naytolas so nyaya, kan ipirma kod mismo a kakamay ko tan myan sistīgo mo a tongpalen ko kari ko a magbāyad akonchi do tabo ōtang na dyimo. Ki aran komwan, machita paba ngata a ipanakem ko dyimo a ōtang mo dyaken kapanganohed mo kan abos pandan a byay mo.
20 Dawa, kakteh ko, padayāwan mo paw nya akdaw ko dyimo a maynamot do kapanganohed taya di Āpo Jesos. On, torohan mo pakono yaken so kasoyot kan kaydamnayan aktokto a maynamot ta oyod a maykakteh ta di Kristo.
21 Maynamot do kapagtalek ko dyimo, naitolas ko nyaya dyimo. Ta chapatak ko a tongpalen monchiw inbahey kwaya dyimo, kan chapatak ko pa a arwāro panchiw parinen mo kan inakdaw kwaya dyimo.
22 Ay on sawen, maparin abawri a isagānaan mo yaken so kwarto ko a yanan ko? Ta rakoh hahawen ko a atbayen ni Āpo Dyos kapaydasal nyo, as kan wayawayaan da yaken a magsarongkar dyinyo daw do Kolosas.
No Kapanawdyan Na
23 Si Epapras iyaw kapayngay ko a nabahod a maynamot di Jeso-Kristo, ki pakomostaan naynyo.
24 Mapakomosta pa saw rārayay kwaya a maytarabāko a sa Markos, Aristarko, Demas, kan Lokas.
25 Myan pakono dyinyo parābor ni Āpo Jeso-Kristo.