3
No Kapaydabdab ni Mikyas do Pangpangōlo saw no Israel
1 Sinpangan na, binata ko a kon ko,
“Mangadngey kamo, inyo a pangpangōlo ni Jakob,
inyo a magtotoray no nasyon a Israel!
Rebbeng nabawri a chapatak nyo nainkalintegan?
2 Basbāli a ipsok nyowayaw maganay, kan chadaw nyowayaw marahet.
Lalāten nyowayaw kodit dan tawotawo ko saya a sibibyay,
as kalisalisay nyo so asi a myan do tohatohang da.
3 Akma kamo magparti a koman so asi dan tawotawo ko.
Hathaten nyowayaw kodit da,
kan potopototen nyo payaw tohatohang da.
Sagsagen nyo saya akmay karni a mapangay do palyok,
kan akmay asi a myan do kardiro.
4 Ītonchiw chimpo a tomanyis kamo a mapasidong di ĀPO,
ki atbayen nabanchi inyo.
Mangolib anchis rōpa na dyinyo,
ta marahet pinarin nyo.”
5 Iyaw nyaw bata ni ĀPO a kāna,
“Siraw propīta saw a mapāwaw siras tawotawo ko,
an myan mamakan dyira, ikari daw talna dyira.
An myan dya makaitoroh dyira so makan,
nakasagāna sa machigobat dyira.
6 Dawa, īto danaw mahep a mangabong dyinyo, kan apabanchiw parmata nyo.
On, sari anchiw myan dyinyo, kan makapangipadto kamo paba.
Somdep anchiw araw dyirad dyaya propīta,
kan no sēdang, ki mayparin anchiw sari dyira.
7 Masnesneskan sanchiw mamadto,
ta maparin sabanchiw ipadto da.
Bengbengen danchiw dangoy da do asnek da,
ta abanchiw atbay no Dyos dyira.”
8 Ki an yaken, napno ako so panakabalin
do Ispirito ni ĀPO.
Napno ako pa so nainkalintegan kan kabīleg
a sitotored a mangikontra di Jakob so maynamot do kapachiribīldi na.
On, mangibahey di Israel so gatos na.
9 Mangadngey kamo, inyo a pangpangōlo no kapotōtan Jakob,
inyo a magtotoray do nasyon a Israel
a mangipsok so nainkalintegan
kan dyīdohen nyo tabo a kosto.
10 Pinatnek nyo Sion do maraya a kapangdiman
kan Jerosalem do kinaranggas a abos kinalinteg.
11 Inyo a pangpangōlo, mangokom kamo an myan pasoksok.
Inyo a papādi, mangnanawo kamo an myan tangdan.
Inyo a propīta, mangipadto kamo an myan kwarta.
Ki alit na, pachinareng nyo di ĀPO a kon nyo,
“Ari abawri dyaten si ĀPO?
Aryoriw mangay a didigra dyaten? Polos!”
12 Dawa, maynamot dyinyo,
maaradonchiw Sion a akmay tālon.
Iyaw Jerosalem, ki mayparin anchi a bonton,
as mayaspet anchiw paytokonanaw a yanan timplo.