4
No Kapya do Intīro a Lōbong do Kapagtoray ni ĀPO
(Isayas 2:2-4)
1 Do panawdyan san araw,
iyaw tokonaw a naytēnekan no Timplo ni ĀPO,
ki mayparin anchi a kasisītaan do tabo tokon,
as matwatohos anchi kan tabo a paytokonan.
Nāw danchi a arayāten āro a tawotawo.
2 Āronchiw nasyon a mangay kan batahen da a kon da,
“Ngay, yangay ta songten tokonaya ni ĀPO
do Timplowaya no Dyos ni Jakob.
Inanawo nanchi dyaten daw rarahan na
tan makayam tanchi do ayayaman na.”
Ta do Sion pakayapwan no linteg.
On, iyaw chirin ni ĀPO, ki yapo do Jerosalem.
3 Iyanchiw mangokom do payawan āro a tawotawo,
kan mangngeddeng so pagriridyaran dan mabibīleg saya nasyon a aran do mabawa.
Chīpohen darananchiw ispāda daw a parinen da lōkoy no arādo,
kan parinen darananchi a sasadyit chibot da saw.
Maggogobat pa sabanchiw nasyon kan nasyon,
mana machinanawo sa pabanchi a machigobat.
4 Kāda asa, ki maybibyay dananchi a matalna
do mismo a sirong no kaobāsan kan igos a kayo na.
Apabanchiw mangamomo sira,
ta inkari ni ĀPO a Manakabalin do Tābo nyaya.
5 Aran mononot saw nasyon saya
do ngaran no dyos da sa,
yamen, ki mononot kami do ngaran ni ĀPO
a Dyos ta a abo so pachipandan.
No Kapaybidi dan Tawotawo a Israel yapo do Nakaakawan da
6 “Do dāwri a araw,” bata ni ĀPO a kāna,
“akpehen ko saw tawotawowaw a piday,
siraw naakaw saw, kan siraw inpadōsa ko.
7 Paybadiwen ko sanchiw piday saw a makalāsat.
Siraw naakaw saw, ki payparinen ko sa mabīleg a nasyon.
Yaken a ĀPO, mangitoray anchi dyira do Tokon a Sion
a mangrogi do dāwri a araw kan abos pandan.”
8 As imom Jerosalem, akma kay pagwanawanan no arban,
kan akma kay kōta no tawotawo no Dyos do Sion.
Iyaw sīgod a kapagtoray mo, ki mapaybidinchi.
On, kapagāri, ki mirwa dananchi dyimom Jerosalem.
9 Ki sichangori, āngo ta makalyak ka tomanyis?
Arabawriw āri mo?
Nadiman danawriw mamagbaga mo,
ta dawa, kinemkeman naymo no kaynyin a akmas magpasikalaw?
10 Maypiypisipis kamo a magāsog,
inyo a tawotawo no Jerosalem a akmay maymanganak,
ta machita nyo naw komaro do syodadaya,
kan omyan do bengkag.
Maakaw kamonchi a mabahod a maiyangay do Babilonya,
ki dawrinchiw kaisalākan nanchi inyo ni ĀPO
a yapo do tanoro dan kabōsor nyo.
11 Changori, āro a nasyon
ki nakpeh sa a machikontra dyimo.
Batahen da a kon da, “Machita a maranggasan si Jerosalem!
Boyaen taw karārayaw no Sion!”
12 Ki chapatak daba no nya sa nasyon iskala ni ĀPO.
Maawātan dabaw plāno na.
Chinpeh na sa a akmay nagāpas a trīgo
a maisagāna do kairek da.
13 Bata ni ĀPO a kāna, “Inyo a tawotawo no Jerosalem,
mangay kamo na manyirek so kabōsor nyo!
Payparinen konchi a pasek olong nyo.
Torohan konchi inyo so tombāga saw a koko nyo
tan pitapitahen nyo sanchiw āro saya nasyon.”
Itoroh nyonchi di ĀPO sinamsam da saw,
iyaw kinabaknang daw di Āpo do intīro a lōbong.