No Somarono A Libro Ni Samwel
No Pakatonngan so Paytābwan no Nya Libro
No nya libro a Somarono a Samwel, ki katongtong no pakasaritāan ni Dabid a āri do Joda do abagatānen no tana a Israel (kapitalo 1-4), as kan inbahey na an maypāngo nakapagāri na do tabo Israel a magrāman do ammyānan (kapitalo 5-24).
Āro riribok ni Dabid do nakapagāri na. Nachigobat saw Israelita dyirad nasyon saw a omdibon dyira. Iyaw mismwaw a pōtot ni Dabid a si Absalom, ki nachiribīldi dya, kan pinādas na a agawen kinaāri ni āmang na. Ki aran komwan, intoroh no Dyos ballīgi di Dabid kan bonggoy na saw a mahahakay do tabo a nachigobatan da.
Naygatos si Dabid so marahmet do nakapachikamalāla naw di Batseba a baket ni Oryas, as nawriw naynamotan na a nadiman si Oryas do kapādasaw ni Dabid a itayo gatos na. As do naypisa, naygatos pa do Dyos do nakapamidang na siras Israelita (24:1-4, 9-10). Aran komwan, do tabo kadwan a kaparin ni Dabid do ōnos no kabibyay na, ki mapodno a minononot di ĀPO.
Inpaboya no Dyos di Dabid iyaw kāsi kan kadaw na a maynamot do nakapachitōlag na dya. Do dyaya tōlag, inkari na di Dabid a myan anchiw pinakainawan na a yapo do kapotōtan na iyaw magāri anchi a abos pandan (7:1-29). No pakatongpalan anchi no nya kari, ki si Āpo Jeso-Kristo a kapotōtan ni Dabid. On, magāri anchi do tābo (Lk. 1:32-33).
No Naychakarwan no Nya Libro
No kapagāri ni Dabid do Joda (1:1-4:12)
No kapagāri ni Dabid do tabo Israel (5:1-24:25)
No manōma saw a tawtawen no kapagāri na (5:1-10:19)
Si Dabid kan si Batseba (11:1-12:25)
Siraw riribok kan lidyalidyat na (12:26-20:26)
No manawdyi saw a tawtawen na (21:1-24:25)
2 Samwel
1
No Kadāmag ni Dabid so Nakadiman ni Saulo
1 Do nakatayokaw no nakadiman ni Saulo, naybidi si Dabid a yapo a nangraot siras Amalekita saw kan minyan so dadwa karaw do Siklag.
2 Do chatatdo naw a araw, myan nawara a baro a yapo do kampo naw ni Saulo a nahagahagay so laylay kan nahbekan so oho a mangipaboya sya a magdongdong-aw. Do nakapakarapit naw do yananaw ni Dabid, nagrōkob barwaw do tana a magdāyaw dya.
3 Inyahes ni Dabid do barwaw a kāna, “Dino nakayapwan mo?”
Initbay no barwaw a kāna, “Naglības akwaw a yapo do kampo dan Israelitaw.”
4 Binata ni Dabid a kāna, “Ta āngo naparin ta dawa? Ibahey mo pa dyaken.”
Ki binata no barwaw a kāna, “Nayyayo saw soldādo saw do gobataw. Āro dyiraw nadiman. As kan si Saulo kan iyaw pōtot naw a si Jonatan, ki nadiman dana sa.”
5 Ki binata ni Dabid do barwaw a nagpadāmag dya a kāna, “Maypāngo kapatak mo sya a si Saulo kan pōtot naw a si Jonatan, ki nadiman dana sa?”
6 Initbay na a kāna, “Na, nairanaw a myan ako do Tokon a Gilboa, kan myan si Saulo a manareng do chibot naw, as kan maypaypasngen dana saw dya siraw loganaw a pachigobat kan siraw nakakabalyowaw.
7 Do nakaydit naw kan nakaboya naw dyaken, tinawagan naw yaken, kan binata ko a kon ko, ‘Cha ako dya.’
8 “Inyahes na dyaken a kāna, ‘Sino ka?’
“ ‘Na, Amalekita kwaw,’ initbay ko.
9 “Do dāwri, binata na dyaken a kāna, ‘Maypasngen ka dya, kan dimanen mo na yaken! Maybiybitos danayaw byay ko, ki aryak paya sibibiyay.’
10 “Dawa, naypasngen ako dya kan diniman ko, ta chapatak ko a makapaychasaryan paba mabyay do rakohaw a bigar na. As nakahap ko so koronaw do oho na kan porsilas naw a myan do tachay na, kan inyangay ko saw nya dyimo, mo āpo ko.”
11 Do dāwri, si Dabid kan tābo bōyot na a myan dya, ki pinirit da saw laylay da saw do nakadngey daw so nya dāmag.
12 Nagdongdong-aw sa. Tomnanyis kan nagayonar sa nanda do kamahep a para da Saulo kan do pōtot naw a si Jonatan, as kan para do bōyot saw ni ĀPO, masaw dyirad tawotawo no Israel, ta nadiman sa do ispāda.
13 Binata ni Dabid do barwaw a nagpadāmag dya a kāna, “Dino nakayapwan mo?”
Ki tinbay na a kāna, “Yaken, ki pōtot no gan-ganaet a asa a Amalekita.”
14 Inyahes dana ni Dabid a kāna, “Āngo ta abo iyaw kāmo mo a nangdiman so pinidi naw ni ĀPO?”
15 Do dāwri, nanawag si Dabid so asa dyira do bōyot naw, kan binata na dya a kāna, “Ngay, dimanen mo!” Dawa, inasot naw ispāda naw, as nakadiman na so barwaw.
16 Binata ni Dabid dya a kāna, “Imo nangikeddeng so bōkod mo a kadiman do mismwaya tistīgo a minohtot do dangoy mo do nakaibahey mo sya a kon mo, ‘Diniman ko pinidi naw ni ĀPO.’ ”
No Kadong-aw ni Dabid si Saulo kan si Jonatan
17 Do dāwri, kinanta ni Dabid nya a pagdongdong-aw a para di Saulo kan Jonatan,
18 kan inbilin na a machita a mainanawo dyirad tawotawo no Joda iyaw Kanta no Armas a Bai. (Naitolas do Libro ni Jasar.)
19 “No dayag mo, O Israel, ki naharaharag do paytoytokonan!
Maypāngo nakasapwat dan mabibīleg saw!
20 “Ipadāmag nyo aba do syodad a Gat.
Iwaragawag nyo aba do kalkalsāda no Askelon,
ta āngwan magragsak saw mababakes no Pilisteo,
ta āngwan chasoyot dan babbalāsang daw no dyi paw a nakōgit.
21 “Inyo a tokotokon no Gilboa,
abo pakono apon mana chimoy a maychahesday dyinyo.
As do hakawan nyo, ki hopes pakono paray a idāton nyo.
Ta dawriw nakainonolayan no sarāpa dan mabibīleg.
Iyaw sarāpa ni Saulo, ki napapotan paba so lana.
22 Yapo do raya no nadiman,
yapo do asi dan mabibīleg,
no bai ni Jonatan, ki nagatras aba do kapangdiman,
as no ispāda ni Saulo, ki maybidi aba a abos sīrbi.
23 “Sa Saulo kan Jonatan, ki mapateg kan makadadaw sa.
Do kabibyay kan do kadiman da, ki naysyay saba.
Maal-alibtak sa kan siraw kangkang,
kan mayīyit pa sa kan siraw lion.
24 “O inyo a mababakes no Israel,
dongdong-awan nyo si Saulo
a nanglaylay dyinyo so mababaya kan mapipino
a nangbisti so laylay nyo so balitok.
25 “Maypāngo nakasapwat dan mabibīleg do pachigobatan da saw!
Si Jonatan, ki naharaharag a nadiman do paytoytokonan.
26 Magdong-aw ako so para dyimo, mo Jonatan a kakteh ko.
Taywara a mapateg ka dyaken.
No kadaw mo dyaken, ki makaskasdāaw
a homisen no kadaw dan mababakes.
27 “Maypāngo nakasapwat dan mabibīleg saw!
Siraw armas da, ki nainonolay dana sa!”