2
No Kapidi ni Dabid a Āri no Joda
1 Do nakatayoka no nya saya, inyahes ni Dabid di ĀPO a kāna, “Somonget akori do asa dyirad idiidi saya no Joda a omyan daw?”
Tinbay ni ĀPO a kāna, “Naon, somonget ka.”
Inyahes dana ni Dabid a kāna, “Na, dino daw ngayan ko?”
“Do Hebron,” kāna ni ĀPO.
2 Dawa, somnonget si Dabid kan siraw dadwaw a baket na a sa Ahinoam a taga Jesreel kan Abigail a bālo ni Nabal do Karmel.
3 Inyonot pa ni Dabid bonggoy na saw a mahahakay a nachirapa dya. Kāda asa, ki myan pamilya na. Minyan sa Dabid do Hebron kan dyirad masngen saw a idiidi.
4 Sinpangan na, nangay saw panglakayen no Joda do Hebron. Dawriw nangpadwan da so lana do oho ni Dabid a nayparin a āri no Joda.
Do nakaibahey daw di Dabid a siraw mahahakay no Jabes-gilead iyaw nangitābon di Saulo,
5 nanoboy siras mangibahey dyirad mahahakay saw do Jabes-gilead a kon da, “Bindisyonan pakono inyo ni ĀPO, ta inpaboya nyo kapodno nyo di Saulo a āpo nyo do nakaitābon nyo sya.
6 Si ĀPO pakono, mangipaboya dyinyo so kanāw no kadaw kan kapodno na. Komwan met a parinen konchiw maganay dyinyo maynamot do dya pinarin nyo.
7 Changori, payiten kan patoreden nyo inawan nyo, ta nadiman dana si Saulo a āpo nyo, kan siraw tawotawo no Joda, ki pinidi darana yaken a magāri dyira.”
No Kapayparin ni Is-boset a Āri no Israel
8 Ranan a napariparin nya, si Abner a pōtot ni Ner a iyaw komander no bōyot ni Saulo, ki inhap na si Is-boset a pōtot ni Saulo, kan inyangay na do Mahanaim.
9 Do dāwri, pinayparin ni Abner iya a magāri do tanatana a Gilead, Jesreel, Epraim, Benhamin, siraw Asorita, kan do tabo Israel.
10 Si Is-boset a pōtot ni Saulo, ki nagtawen so apat a poho do nakapagāri na do Israel, kan nagāri so dadwa a katawen. Ki siraw tawotawo no Joda, ki inonotan da si Dabid.
11 No kahay no nakapagāri ni Dabid do Hebron dyirad tawotawo no Joda, ki papito a katawen kan anem a kabohan.
No Gobat Da Israel kan Joda
12 Do asa karaw, si Abner a pōtot ni Ner kan bōyot saw ni Is-boset a pōtot ni Saulo, ki komnaro sa do Mahanaim kan nangay sa do Gibeon.
13 Si Joab a anak ni Seroyas kan siraw bonggoy na saw a mahahakay ni Dabid, ki binayat da sa do līnaw naw do Gibeon. Naydisnaw asaw a gropo do bīt naw no līnaw. As iyaw asaw a gropo, ki naydisna sa met do bīt naw.
14 Sinpangan na, inbahey ni Abner di Joab a kāna, “Paglalabānen ta saw kadwan sayad babbaro saya do kasalasalapan taya.”
“Ngay, naon ah,” tinbay ni Joab.
15 Dawa, naychatetēnek sa, as nakapamidang da. Asa poho kan dadwa iyaw mangitēnek para di Is-boset a pōtot ni Saulo, kan asa poho met kan dadwa iyaw mangitēnek para di Dabid.
16 Kāda naglāban, ki naysin-gammat sa so oho kan naysinbagkong sa so ispāda do bakrang no kalāban da, as nalba sa a dadwa. Dawa, nya yanan do Gibeon, ki napangaranan so Helkat-hassorim.
17 Taywara a maranggas iyaw nakapaggogobat da do dāwri a araw. Si Abner kan siraw mahahakay saw no Israel, ki inābak sa no bonggoy na saw a mahahakay ni Dabid.
18 Siraw tatdwaw a anak ni Seroyas, ki myan sa daw a sa Joab, Abisay, kan Asahel. Si Asahel, ki makapayyayo so akmas katarayaw no ogsa.
19 Nāw na linakatan ni Asahel si Abner a dya nagsardeng, kan polos a dya somniwal do kawanan mana do kaholi a nanda do nakadas na sya.
20 Minidit si Abner do dichodan naw kan inyahes na a kāna, “Imo nawrim Asahel?”
“On, yakenaw,” initbay ni Asahel.
21 Do dāwri, binata ni Abner dya a kāna, “Yaken abaw lakatan mo ah! Midit ka do kawananaya mana do kaholyaya, as kalakat mos asa dyirad baro saya kan hapen mo armas naw.” Ki nakey aba si Asahel a nagsardeng a nanglakat sya.
22 Minirwa dana inilyak ni Abner si Asahel a kāna, “Magsardeng ka na manglakat dyaken! Chakey kwaba imo a dimanen. Maypāngo danaw kapachisalap konchi do kakteh mwaw a si Joab?”
23 Ki chinaskeh ni Asahel nagsardeng a manglakat sya. Dawa, pinalbot ni Abner chibot naw do bodek naw ni Asahel, kan nagbalsot do bokot naw. Nalba do tana kan nadiman do dawri a yanan. As tabo a nangay do dawri a yanan a nakasdayan kan nakadimanan ni Asahel, ki nagsardeng a naytēnek daw kan dinondong-awan da.
24 Do nakapatak daw da Joab kan Abisay so naparinaw, linakatan da si Abner. Do kasdep danaw no araw, nakarapit sa do paytokonanaw no Ammah a masngen do Giyah, do rarahanaw a komwan do let-ang no Gibeon.
25 Siraw mahahakay a yapo do trībo no Benhamin, ki naychichipeh sa a mangitēnek para di Abner. Nāsa sa a nagsagāna a machigobat do tōtok naw no paytokonan.
26 Nginēyan ni Abner si Joab a kāna, “Nāw ta nawri a maysindidiman do ispāda a magnanayon? Maktokto mo abawri a makpakpad pachipandan na? Kāngo kabilin mo siras mahahakay mwaya a magsardeng dana sa a manglakat dyirad kakakteh da saya a Israelita?”
27 Binata ni Joab a kāna, “Ta akmas kasigorādo no kasibibyay no Dyos, an dyi ka maylilyak, sigorādo a nāw danchi a lakatan no mahahakay saya siraw kakakteh da saw a mandan mabekas.”
28 Dawa, inalopan ni Joab iyaw trompītaw, kan nagsardeng sa tabo mahahakay a dyira na. Tinongtong da pa saba a linakatan Israelitaw, kan linabānan da pa saba.
29 Naychararakan sa Abner kan bonggoy na saw a mahahakay a nagmarcha a nagkelsat do Payahosongan no Jordan. Namtang sa do Oksong a Jordan, kan tinongtong da a naychamabekasan mandan nakarapit sa do Mahanaim.
30 Sinpangan na, somnabat dana sa Joab a yapo do nakalakat naw si Abner, kan inakpeh naw bonggoy na saw a mahahakay. Do nakabidang naw siras rarayay naw a mahahakay, napatakan na a asabaw asa poho kan sasyam a yapo do bonggoy ni Dabid malaksid di Asahel.
31 Ki diniman da no bonggoy ni Dabid tatdo a gasot kan anem a poho a Benhaminita a nachibonggoy di Abner.
32 Inhap daw bangkayaw ni Asahel, kan intābon da do aschip a tanem ni āmang na do Betlehem. Sinpangan na, si Joab kan bonggoy na saw a mahahakay, ki naychararakan sa nagmarcha a nandan nakapakarapit da do Hebron do kapaysēsedang.