11
Si Dabid kan Batseba
1 Do kapayparayon naranaw, do chimpo naw no kangay dan ar-āri saw a machigobat, tinoboy ni Dabid si Joab kontodo siraw komander na saw kan no tābo a bōyot no Israel. Inābak da saw Ammonitaw, kan linakob daw syodad a Rabba. Ki dinitā ni Dabid do Jerosalem.
2 Do asa a karaw, do nakapaysarisari naranaw, naybangon si Dabid, kan minidibidi do atep naw no palasyo na. Do nakapaytatalamad naw, naboya naw asaw a mabakes a myan a mariyos. Taywara so kapintas mabakesaw.
3 Do dāwri, nanoboy si Dabid so mangyahes an sino mabakesaw. Ki binata no natoboyaw a kāna, “Iya abawris Batseba a pōtot ni Eliyam, as kan baket ni Oryas a Heteo?”
4 Sinpangan na, nanoboy si Dabid so mangay a manghap sya. Do nakangayaw no mabakesaw, inoknod na. (Do dāwri, katayoka na pa nangparin so dadakay naw a kapagdalos para do nakatayoka na a narodit.) Sinpangan na, somnabat dana.
5 Nangīnaw iyaw mabakesaw, kan do nakadlaw naw sya a nabōgi, inpaibahey na di Dabid a kāna, “Mabōgi akwaw.”
6 Dawa, inpaibilin ni Dabid di Joab a kāna, “Toboyen mo pa dyaken si Oryas a Heteo.” Dawa, tinoboy ni Joab di Dabid.
7 Do nakangay naw dya ni Oryas, kinomosta dya ni Dabid si Joab kan siraw bōyot naw kan an maypāngo danaw gobataw.
8 Do dāwri, binata ni Dabid di Oryas a kāna, “Mosok ka dwa bahay mwaw kan lablaban mo kokod mwaya.” Komnaro si Oryas do palasyo, ki nangipasarono si āri so sāgot na dya.
9 Ki somnabat aba si Oryas. Basbāli a nakaycheh do asdepanaw do palasyo dyirad magbanbantay saw.
10 Do nakadāmagaw sya ni Dabid a somnabat aba si Oryas, pinatawagan na kan inyahes na a kāna, “Mateng abawriw nakayapwan mo? Āngo ta dyi ka somnabat do bahay mo?”
11 Tinbay ni Oryas si Dabid a kāna, “Iyaw lakāsanaw kan no bōyot no Israel kan Joda, ki omyan sa do tolda saw. Si Joab kan siraw opisyalis na saw no āpo kwaw, ki ari sa magkampo do gagan. Maparin koriw somabat do bahay ko a mangay a koman kan minom, kan machoknod di baket ko? Engga! Akmas kasigorādo no kasibibyay mo, isapata ko a parinen kwabaw komwan!”
12 Do dāwri, inbahey ni Dabid dya a kāna, “Na, mabidin ka dya sicharaw, kan paybidihen konchimo an delak.” Dawa, nabidin si Oryas do Jerosalem do dāwri a araw kan do somaronwaw.
13 As ināwis ni Dabid a machakan kan machinom dya, kan binok iya ni Dabid. As do kapaysarisari naranaw, minohtot si Oryas a nangay a nakaycheh do pakaychehan naw dyirad magbanbantay saw no āpo na, ki somnabat aba do bahay na.
14 Do kamabekasanaw, naytolas si Dabid di Joab, kan inpaw-it na di Oryas.
15 Intolas na a kāna, “Payen nyo si Oryas do salapenaw no linya do yanan no kangitingītan no gobat, as kapagatras nyo, kan nonolay nyo a madiman.”
16 Do nakalakob naw ni Joab so syodadaw, pinangay na si Oryas a Heteo do yananaw a chapatak na yanan dan kayiyitan saw a soldādo no kabōsor daw.
17 Do nakahtot daw no soldādo saw no kabōsor do syodadaw a nanggobat di Joab, nadiman kadwan saw a soldādo do bōyot ni Dabid. Aran si Oryas a Heteo, ki nadiman.
18 Do dāwri, nanoboy si Joab kan inpaibahey na di Dabid tabo dāmagaw a maynamot do gobataw.
19 Ki sakbay a mangay tinoboy naw, inmandar ni Joab dya a kāna, “Anchan tayoka mo a ibahey iyaw dāmagaya maynamot do gobataya di āri,
20 āngwan somdeb soli na, kan iyahes nanchi a kāna, ‘Āngo pinachisngen nyo a taywara do syodadaw a machigobat? Chapatak nyo abawri a ipana daw dāwa no bai da saw a yapo do ahadaw?
21 Sino nangdiman di Abimelek a pōtot ni Jerobbeset? Iyabawriw mabakesaw a napagtos so bakesaw no gilingan dya a yapo do ahadaw tan nadiman do Tebes? Āngo pinachisngen nyo a taywara do ahadaw?’ Ki itbay monchi a kon mo, ‘Na, aran iyaw soldādo mwaw a si Oryas a Heteo, ki nadiman pa.’ ”
22 Nayam iyaw natoboyaw, kan do nakawara naw, inbahey na di Dabid tabo inbilin naw ni Joab a ibahey na.
23 Inbahey no natoboyaw di Dabid a kāna, “Minohtot saw kabōsor saw kan mayīyit saw kan yamen do marahawaw a yanan, ki pinagatras namen sa a pinaybidi do rowanganaw no syodad.
24 Sinpangan na, siraw mangipanapanaw so bai da, ki inpana daw dāwa no bai da saw dyirad soldādo mwaw a yapo do ahadaw. Nadiman saw kadwan saw a soldādo no āri. Aran iyaw soldādo mwaw a si Oryas a Heteo, ki nadiman pa.”
25 Inbahey ni Dabid do natoboyaw a kāna, “Ibahey mo nya di Joab: ‘Mariribokan kaba a maynamot do dyaya, ta chapatak taba an sino madiman do paggogobatan. Ipasnek mo a mirwa gobaten kan sakōpen syodadaw!’ On, ibahey mo nya a pangahwahok dya.”
26 Do nakadāmagaw no baket naw ni Oryas a nadiman si lakay na, dinongdong-awan na.
27 Do nakatayokaw no nakapagdong-aw naw, nanoboy si Dabid so omhap sya a mangyangay do bahay na. Nayparin a baket na, kan inyanak naw pōtot naw ni Dabid a mahakay. Ki do dāwri a pinarin ni Dabid, ki chinahwahok naba ni ĀPO.